Ашхырэм иягъэ къямыкIынэу

КIэлэеджакIохэм апкъышъол къекIоу, япсауныгъэ зэщимыгъакъоу еджапIэхэм зэрэщагъэшхэщтхэм фэгъэхьыгъэ шапхъэхэр зэрыт тхылъ цIыкIу Роспотребнадзорым къыдигъэкIыгъ. Ащ къыделъытэ сабыйхэм агу къэIэтыгъэным фытегъэпсыхьэгъэ Iофыгъохэри.

«Мафэ къэс кIэлэеджакIохэм шхыныгъо стыр афызэхэщэгъэныр, гъомылэпхъэ къабзэ ягъэ­шхыгъэныр IофыгъошIоу щыт. Сабыйхэм шIэныгъэ зэрагъэ­гъотынымкIэ, яакъыл нахь псын­кIэу Iоф ышIэнымкIэ, дэгъоу еджэнхэмкIэ, физическэ культурэмрэ спортымрэ гъэхъагъэ­хэр ащашIынхэмкIэ ыкIи зэпахырэ узхэр къямыолIэнхэмкIэ ащ мэхьанэшхо зэриIэм щэч хэлъэп. Джащ пае зэ-рэ­шхэщтхэ шIыкIэри зэхэугуфыкIыгъэн фае», — къаIуатэ Рос­потребнадзорым иIофы­шIэхэм.

Джащ фэдэу зишIуагъэ къа­кIорэмэ ащыщэу алъытэ а зы уахътэм зэрагъашхэхэрэм, ащ пкъышъолъыр гъомылапхъэу IэкIэхьащтым фегъэхьазыры.

Тхылъэу къыдагъэкIыгъэм къыдагъэхьагъэхэм ащыщ кIэлэеджакIом мафэ къэс ебгъэшхынэу щытхэр. ГущыIэм пае, пчэдыжьышхэм шIокI имыIэу хэтынхэ фае пIэстэ шъабэр, къое гъэушкъоигъэ ыкIи кIэнкIэ зыхэлъ гъомылапхъэхэр, ащ игъусэнэу щыт щаир е какаор. Пчэдыжьышхэр джыри вита­минхэмкIэ, микроэлементхэмкIэ ыкIи клетчаткэхэмкIэ бгъэбаймэ ишIуагъэ къэкIощт.

Ащ хэхьэх хэтэрыкIхэр, дэхэр, йогуртхэр.

Щэджэгъуашхэм хэтэрыкIхэм ахэшIыкIыгъэ салатыр, стыры­псыр, лым е пцэжъыем крупэ зэфэшъхьафхэм ахэшIыкIыгъэ гарнирыр голъэу, компот е ки­сель ягъусэжьэу хэхьэх.

Непэрэ кIэлэеджакIохэр ма­фэм тфэгъогогъо шхэнхэ фаеу Роспотребнадзорым иIофы­шIэхэм алъытэ. ЯтIонэрэ пчэдыжьышхэр ыкIи ятIонэрэ пчы­хьэшъхьашхэр зэрашIын фаер тхылъым къыщеIо. Ау ащ дакIоу агу къегъэкIыжьы илыягъэу шхэхэ зэрэмыхъущтыри, анахьэу пчыхьэ кIасэм мы­шхэжьыхэмэ зэрэнахьышIур.

Сабыйхэм ашхырэм е за­шъохэрэм шъоущыгъоу ахатакъо­рэр джэмышхитIум, щыгъур зы джэмышхыжъыем ашIо­кIымэ къызэрягоощтыр ха­гъэунэфыкIы. Щыгъубэ зыхэлъ гъомы­лапхъэхэу нэкулъыр, консервэ зэфэшъхьафхэр кIэлэеджакIохэм араты хъущтэп, джащ фэд шъоущы­гъубэ зыхэлъхэри: конфетхэр, шоколадхэр, вафлехэр, печенье­хэр, коржикхэр, булкэхэр, кекс­хэр. Ахэр пхъэшъхьэ-мышъхьэ­хэмкIэ ыкIи дэ­хэмкIэ зэблэ­хъугъэнхэ фае.
(Тикорр.).