«ЭкоЦентрэм» къеты

Игъом ыпкIэ птымэ нахьышIу

Пыдзэфэ пытэхэм ядэщынкIэ пшъэ­рылъэу иIэхэр шъолъыр опе­раторым икъоу егъэцакIэх. Арышъ, фэIо-фа­шIэхэм ауасэ республикэм щы­псэухэрэми игъом къатын фае.


ХэкIыр зэрэIуащырэм ыуасэ кассэхэм уякIуалIэмэ пIахыщт. Офисхэм яадресхэр шъугу къэтэгъэ­кIы­жьых: къалэу МыекъуапэкIэ урамэу Пионерскэр, 297-рэ, поселкэу ЯблоновскэмкIэ урамэу Школьнэр, 10/1-рэ. Джащ фэдэу ПАО-у «Сбербанкым», Урысые почтэм ыкIи ООО-у «МадиКом» зыфиIорэм яотделениехэм ащыптын плъэкIыщт.
ИнтернетымкIэ нахь Iэрыфэгъужь. Ащ пае телефон приложениеу «Сбербанк онлайныр» къыздебгъэ­Iэнышъ, квитанцием тет QR-кодымкIэ е лицевой счетымкIэ птыщт. Мыщ дэжьым комиссиер щыхаубытыкIырэп.

ХэкIыр зэрэIуащырэм ыуасэ игъом ымытэу чIыфэр зэIузгъакIэхэрэм законым тетэу пшъэдэкIыжь ахьыщт.

Тхылъхэр апилъхьащтых

Пыдзэфэ пытэхэм ядэщынкIэ систе­мэм зэхъокIыныгъэу фэхъугъэхэм фе­дэу ахэлъым цIыфхэм уасэ зэ­ра­фашIырэр хэкIитэкъупIэ пло­щад­кэ­хэм язытет ары.

Ау ар лъэныкъо зэфэшъхьафыбэхэм япхыгъэу зэрэщытым макIэ егупшысэрэр. Шъолъыр опе­раторыр хэкIыр зэрэIуищыщт графикэу ыгъэнэфагъэм темыкIыныр ахэм зэу ащыщ.

Пыдзэфэ пытэхэм апае площадкэр зыщыгъэпсыгъэ чIыпIэр, шапхъэхэм атетэу, гъэчъыгъэн ыкIи къэшIыхьэгъэн фае. Ащ къыпэIулъ чIыпIэм изытет лъыплъэнэу зипшъэрылъыр фэтэрыбэу зэхэт унэхэм ящагухэр зыгъэкъабзэхэрэр ары. Унэу мы хэкIитэ­къупIэм епхыгъэхэм ачIэс нэбгырэ пчъагъэу гъэIорышIэкIо компанием къыгъэлъэгъуагъэм, пыдзэфэ пытэхэр зэрэзэIукIэн фэе шапхъэхэм къапкъыры-кIызэ шъолъыр операторым бак пчъагъэу щытыщтыр ыкIи графикэу пыдзафэхэр зэрэIуищыщтыр егъэнафэх. Мы зэпстэур гъэцэкIагъэ хъумэ, площадкэхэр ренэу къэбзэщтых.

ГухэкIыми, Iофхэм язытет нэмыкI. Графикым дэмыхэу автомашинэхэм хэкIыр Iуащыми, площадкэхэм къабзэу ахэтыр макIэ. Ащ фэшI, шъолъыр операторым хэкIитэкъупIэ площадкэ пэпчъ тхылъ (паспорт) пилъхьащт. Ащ адресыр, бак пчъагъэу тетыр, ахэм арыфэрэр, пыдзафэхэр зэрэIуащырэ графикыр, хэкIэу цIыфхэми коммерческэ организа­циехэми къырахырэр зыфэдизыр итхэгъэщтых.

— ХэкIыр бащэу зыщызэIукIэрэ площадкэхэм апэу паспортхэр афэдгъэпсыщтых, — къыIуагъ ООО-у «ЭкоЦентр» зыфиIорэм и Адыгэ шъолъыр къутамэ ипащэу Алыбэрд Налбый. — Ащ къэбарыр тэрэзэу итхэгъэным пае, нэбгырэ пчъагъэу пыдзафэхэр къе­зыхьылIэрэр, хэкIэу щызэрэугъоирэр зыфэдизыр икIэрыкIэу тыуплъэкIужьыщт. Джащ фэд ныIэп площадкэхэр зэрэдгъэкъэбзэнхэ тлъэкIыщтыр.

ООО-у «ЭкоЦентр» зыфиIорэм
и Адыгэ шъолъыр къутамэ
ипресс-къулыкъу