ЩымыIэжьхэр ащыгъупшэхэрэп

Зипшъэрылъхэр зыгъэцакIэхэзэ зэо-зэпэуцужьхэм ахэкIодэгъэхэ къулыкъушIэхэр зыщагъэтIылъыгъэ чIыпIэхэр илъэс къэс агъэкъэбзэнхэр хэбзэшIу афэхъугъ Лъэпкъ гвардием Адыгэ РеспубликэмкIэ и ГъэIорышIапIэ ихэушъхьафыкIыгъэ подразделениеу ОМОН-м иIофышIэхэм.

Республикэу Дагъыстан и Цунтинскэ район къулыкъур щихьызэ, 2012-рэ илъэсым Iоныгъом и 15-м къаукIыгъэ полицием ипрапорщикэу, Урысыем и ЛIыхъужъэу Артем Гармаш зыщагъэтIылъыгъэ къэхалъэу Мыекъуапэ дэтым дзэкIолIхэр щыIагъэх.

Артем лIыгъэу къыхэфагъэм ишIуагъэкIэ уIэшыгъэ бзэджэшIэ купыр къызэтырагъэуцон алъэкIыгъ, ау ежь уIэгъэ хьылъэу къытыращагъэхэм къыхэкIыкIэ идунай ыхъожьыгъ. Къэралыгъом ипащэ иунашъокIэ «Урысые Федерацием и ЛIыхъужъ» зыфиIорэ щытхъуцIэр къыфагъэшъошагъ.

ЯтIонэрэ чIыпIэу къулыкъушIэхэр зыдэкIуагъэхэр полицием ипрапорщикэу Вячеслав Кравцовыр зыщагъэтIылъы­гъэр ары. 2012-рэ илъэсым шышъхьэIум и 5-м Дагъыстан ит селоу Шаури ар щыфэхыгъ. ОМОН-р зыдэщытыгъэ чIыпIэм къыфэзыузэнкIыгъэ бзэджэшIэ купым ар пэуцужьыгъ. КъызэрауIагъэзэ къызэкIэмыкIоу, къатебэнагъэхэр шъэфэу постым къыримыгъэкIолIэнхэ ылъэкIыгъ. Къулыкъур ыхьызэ зыпсэ зыгъэтIылъыгъэ Вячеслав Кравцовым ЛIыхъужъныгъэм иорден къыфагъэшъошагъ.

— Апэрэ илъэсэп мы къэхалъэм тыкъызэрыкIорэр, — къеIуатэ ОМОН-м икомандирэу, полицием иполковникэу Владимир Ивченкэм. — Тхьапэхэр тэугъоих, чъыгхэр къэтэупкIыхьэх, къэр къызэрышIыхьэгъэ чэухэр тэгъалэх. Къулыкъур ахьызэ зыпсэ зытыгъэ ти­кIалэхэр тщыгъупшэхэрэп. Ахэм лIы­хъужъныгъэу зэрахьагъэм ишIэжь тыгухэм арылъыщт.