ЦIыфхэм ягумэкIыгъохэр дэгъэзыжьыгъэнхэм фэшI

Адыгэ Республикэм и ЛIышъхьэу КъумпIыл Мурат Тэхъутэмыкъое районым ит къуаджэу АдыгеякIэм тыгъуасэ щыIагъ ыкIи цIыфхэм ямылъку зыхэлъ фэтэрыбэу зэхэт унэхэр ухыжьыгъэнхэмкIэ, псэупIэ­хэм яшIын зиахъщэ хэзылъхьагъэу агъэпцIагъэхэм ягумэкIыгъохэр дэгъэзыжьыгъэнхэмкIэ пшъэрылъхэр зэшIохыгъэхэ зэрэхъурэр ыуплъэкIугъ.

Шъугу къэдгъэкIыжьын, Адыге­им и ЛIышъхьэ муни­ципалитетымрэ республикэм псэолъэшIынымкIэ и Минис­терствэрэ пшъэрылъ афишIыгъ цIыфхэм IэпыIэгъу афэхъунхэу ыкIи мы къуаджэм щагъэпсырэ гумэкIыгъо зыпылъ псэупIэ комплексэу «Тургеневский-2» зыфиIорэм ишIын аухыжьынэу. ПсэолъэшI IофшIэнхэр зыгъэцакIэщтыгъэ унэе предпри­нимателэу ЕмтIылъ Аскэрбый 2018-рэ илъэсым Iоныгъом банкротэу алъытагъ ыкIи ащ имылъку IуагъэкIынэу рагъэ­жьагъ.

Iофхэм язытет къиныгъ нахь мышIэми, Адыгеим ипащэхэм мы гумэкIыгъом ылъэныкъокIэ хэкIыпIэ къагъотыгъ. Респуб­ликэм и ЛIышъхьэ цIыфхэм пчъагъэрэ аIукIагъ, псэуалъэхэм яухыжьын зэрэзэхащэщтыр агурагъэIуагъ. Джы мы Iофым фэгъэзагъэр финанс гъэIоры­шIакIор ары. Фэтэрыбэу зэхэт унэхэм яшIын зыухыжьыщт организациери къагъотыгъ, ар пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Форвард» зыфиIорэр ары.

Финанс гъэIорышIакIом къызэриIуагъэмкIэ, проектым игъэ­цэкIэн сомэ миллиони 142,8-рэ тефэщт, зэкIэмкIи уни 9 аухы­жьынэу къапыщылъ. Непэрэ мафэм ехъулIэу ахэр зэрэхьазырхэр зэфэшъхьафых, процент 38-м къыщегъэжьагъэу 99-м нэс.

Подрядчикым илIыкIо къызэриIуагъэмкIэ, унэхэр едзыгъо­-едзыгъоу аухыжьыщтых. Мы илъэсым псэолъи 4 зэтырагъэ­псыхьащт (13,14, 15, 16), унэ пэпчъ фэтэр 64-рэ хэт. ЗэрагъэнафэрэмкIэ, къихьащт илъэ­сым ахэр атыщтых.

Адыгеим и ЛIышъхьэ зэкIо­лIагъэр унэу N 16-р ары, мыщ щыкIорэ псэолъэшI IофшIэнхэр ыкIэм фэкIуагъэх. Адрэ унищым язэтегъэпсыхьан ыуж ихьагъэх, инженернэ коммуникациехэр аращэлIэнхэу къапыщылъ.

— Унэхэм яшIын ухыжьы­гъэным цIыфхэр къежэх. Ахэр япсэупIэхэм псынкIэу ачIэхьа­жьынхэм амалэу тиIэр етхьы­лIэн фае. ЦIыфхэм яшIоигъо­ныгъэхэр ары пстэуми анахь шъхьаIэр. Ежь цIыфхэми пшъэ­дэкIыжьэу ахьырэр къагуры­Iоным, япшъэрылъхэр игъом агъэцэкIэнхэм мэхьанэшхо иI, — къыхигъэщыгъ республикэм ипащэ.

Мы мафэм Адыгеим и ЛIы­шъхьэ аIукIагъ илъэс пчъагъэ хъугъэу поселкэу Яблоновскэм щашIырэ псэупIэ комплексэу «Подсолнух» зыфиIорэм зиахъщэ хызылъхьагъэхэм ащыщхэм. Мы гумэкIыгъор дэгъэзыжьы­гъэным республикэм ихэбзэ къулыкъухэм анаIэ зэрэтетыр, хэкIыпIэ къагъотыным тапэкIэ зэрэпылъыщтхэр КъумпIыл Мурат къыIуагъ.

АР-м и ЛIышъхьэ ипресс-къулыкъу