КIэлэцIыкIухэм шъуафэсакъ!

КIэлэцIыкIухэм апкъ къикIыкIэ машIом макIэп зыкъызэриштэрэр.

Ахэр сырнычхэм, электро­пкъыгъохэм, зажигалкэхэм ары­джэгунхэу щытэп. МашIом зэрэщыщынэхэрэм къыхэкIэу кIэлэцIыкIухэм пIэкIор чIэгъым, шкафхэм, унэм икъогъупэ горэхэм анахьэу защагъэбылъы. ЗыщымыщынэгъопIэ чIыпIэм чъэнхэу, IэпыIэгъу къеджэнхэу ахэм ашIэрэп. ЩынэгъопIэ чIыпIэхэм ахэр зэращызекIонхэ фаер агурагъэIоныр нахьыжъхэм япшъэрылъ шъхьаIэхэм ащыщ. КIэлэцIыкIу IыгъыпIэми, гурыт еджапIэми кIохэрэр машIом зызэрэщаухъумэщт шIыкIэм фэзыгъасэхэрэр агукIэ рэхьатыщтых.

Унэгъо кIоцIым электрическэ приборхэр, газ горелкэхэр, къызыкIэнэн ылъэкIыщт пкъыгъохэр зэрэщыжъугъэфедэхэрэм епхыгъэу машIом зыкъимыштэнымкIэ шэпхъэ гъэнэфагъэхэр шъумыукъох. ТхьамыкIагъо къэмыхъуным пае ны-тыхэми, кIэлэегъаджэхэми Iофышхо ашIэн, машIом унэ кIоцIым зыкъыщимыштэнымкIэ шапхъэу щыIэхэр арагъэшIэн фае.
Сырнычхэу, зажигалкэхэу, нэмыкI пкъыгъохэу машIор зэрэзэкIагъанэрэр джэгуалъэ­хэп. Ны-тыхэм ахэр нахь чы­жьэу, кIэлэцIыкIухэр нэмысынэу агъэтIылъын фае. ЗыгорэкIэ апэ къызифэхэкIэ, кIэлэцIыкIухэм ахэр къаштэ хъущтэп.
Унэр зэрагъэплъырэ электропкъыгъохэу агъэкощыхэрэмкIэ гыкIыгъэхэр жъугъэчъэпхъы­нэу шъуфемыжь. Элетропкъыгъохэм машIо къакIэнэн ылъэ­кIыщтышъ, зи алъымыплъэу ахэр къэшъумыгъанэх. Унэм шъу­къикI зыхъукIэ, элетропкъыгъохэр, газыр, светыр гъэкIосагъэхэмэ шъуеплъ. Зэщыкъогъэ электропроводкэми, газ хьакуми тхьамыкIагъо къыздахьын зэралъэ­кIыщтыр зыщышъумыгъэгъупш.
Электричествэр загъэкIуасэкIэ, унэгъуабэмэ шэф е парафин остыгъэхэр агъэфедэх, ахэмкIэ унэр агъэнэфы. КIэлэцIыкIухэр ащ фэдэ машIом лъыплъэхэу, ахэм арыджэгухэ ашIоигъоу бэрэ къыхэкIы. Ау шэф остыгъэхэм ямашIо щынагъоу зэрыщытыр, къыпэблэгъэ пкъыгъохэм ащ заридзын зэрилъэкIыщтыр сабыйхэм агурыжъугъаIу.
Зиэлектропроводкэ зэщыкъо­гъэ е жъы дэдэ хъугъэ фэтэрхэм электропкъыгъохэр ащышъумыгъэфедэмэ нахьышIу. Ащ фэдэ фэтэрхэм электрооборудование пчъагъэ зэу ащыпышъумыгъан. КIэлэцIыкIухэмкIэ щынэгъончъэ хъуным пае розеткэхэр шъу­ухъумэх.
МашIом зыкъиштагъэу зышъу­лъэгъукIэ, ащ лъыпытэу телефонэу 01-мкIэ е 112-мкIэ мэшIогъэкIосэ къулыкъум шъутеу.
А.Р. Мамый.
МашIом зыкъимыштэнымкIэ къалэу Мыекъуапэрэ Мые­къопэ районымрэ якъэралыгъо инспектор.