Чъэпыогъум и 1-м нэс вакцинациер кIощт

Ащ къыпкъырыкIызэ АР-м и ЛIышъхьэу КъумпIыл Мурат IофшIапIэхэм япащэхэм унашъо афишIыгъ гриппым пэуцужьыгъэнымкIэ цIыфхэр прививкэ шIыгъэнхэ фаеу.

— Зэпахырэ узэу коронавирусым зимыушъомбгъунымкIэ шъолъырым иэпидемиологическэ зытет зэрэмыдэгъу­шхом, гриппымрэ пэтхъу-Iутхъумрэ цIыфыбэмэ къызэряуталIэрэм тыкъыпкъырыкIызэ, цIыфхэм япсауныгъэ щынэгъончъэу щытыным ыкIи экономикэм зыпкъ итэу Iоф ышIэнымкIэ республикэм щыпсэухэрэм, джащ фэдэу мэкъумэщ субъектхэм яIофышIэхэм вакцинэр ахэлъхьэгъэн фае. Мы Iофтхьабзэм хахьэу цIыфхэм япроцент 60-мэ, узыр къяолIэнымкIэ «щынагъо» зышъхьащытхэм япроцент 75-мэ вакцинэр ахалъхьащт. Адыгеим зэпахырэ узым зыщимыушъомбгъуным, джащ фэдэу цIыфхэм ясанитарнэ-эпидемиологическэ зытет зыпкъ итыным, цIыфхэм яIофшIэн къызэтегъэнэжьыгъэным ыкIи щынэгъончъэным афэшI 2020-рэ илъэсым чъэпыогъум и 1-м нэс гриппым пэшIуекIорэ вакцинэр цIыфхэм ахэлъхьэгъэным шъунаIэ тежъугъэтын фае, — закъыфигъэзагъ АР-м и ЛIышъхьэу КъумпIыл Мурат.

Мы унашъом къыпкъырыкIызэ, АР-м игъэцэкIэкIо хэбзэ къулыкъухэм, муниципальнэ образованиехэм япащэхэм, джащ фэдэу мы Iофым епхыгъэу Iоф зышIэхэрэм, организациехэм ыкIи унэе предпринимательхэм гриппым пэшIуе­кIорэ вакцинэр ахэлъхьэгъэнымкIэ ащ къэбарэу пылъым цIыфхэр щыгъэгъозэгъэнхэ фаеу республикэм ипащэ къафигъэпытагъ.

Гриппым пэшIуекIорэ вакцинэр зыхябгъэлъхьаным пае чIыпIэ медицинэ учреждением зыфэбгъэзэн плъэкIыщт. IофшIапIэм иахъщэкIэ мы фэIо-фашIэр къыпфагъэцэкIэным фэшI АР-м икъэралыгъо учреждениеу «Аптечная база» зыфиIорэм зыфэбгъэзэн плъэкIыщт. Ащ ителефон номерыр +7 (8772) 56-88-98-рэ.

КIАРЭ Фатим.