«ЭкоЦентрэм» къеты

ХэкIым хэшъу­лъхьан шъуфитэп

Пыдзэфэ пытэхэм яитэкъупIэу Мыекъуапэ щыгъэпсыгъэхэм автомобиль щэрэхъхэм япокрышкэ­хэр ащыратэкъужьхэу къызэрэхэкIырэр нахьыбэ хъугъэ. Ахэр зиягъэ къэкIорэ пыдзафэхэм аха­лъы­тэх, ащ фэшI региональнэ операторым Iуищыхэрэп.

— Автомобиль покрышкэхэр, экологием иягъэ римыгъэкIыным фэшI, шэпхъэ гъэнэфагъэ пылъэу ащ фэгъэзэгъэ хъызмэтшIапIэхэм агъэкIодыжьых. Арышъ, тэ ахэр Iутщыхэрэп, — къыIуагъ ООО-у «ЭкоЦентрэм» и Адыгэ шъолъыр къутамэ ипащэ техническэ IофхэмкIэ игуадзэу Александр Алисовым.

Экологхэм къызэраIорэмкIэ, автомобиль покрышкэхэр тэрэзэу амыIыгъыхэмэ, амыгъэкIодыхэмэ тыкъэзыуцухьэрэ дунаим зэрарышхо къыфахьы, илъэс пчъагъэми ар зыпкъ ибгъэуцожьын плъэкIырэп. ЧIыгум ахэр зэрэхэкIодэщтхэм илъэсишъэм нахь мымакIэу ехьы, а уахътэм ахэм зиягъэ къэкIорэ вещество зэфэшъхьафыбэ къахэкIы.

Автомобиль зиIэхэм ар къыдалъытэнэу, тыкъэзыуцухьэрэ дунаим фэсакъынхэу региональнэ операторыр къялъэIу. Покрышкэхэр шапхъэу пылъым диштэу агъэкIодынхэр шIокI зимыIэ Iоф. Ежьхэм ар ашIокъи­нымэ, покрышкакIэхэр къызщащэфыгъэм жъыр къы­чIанэжьыми хъущт. Ащ шапхъэхэм атетэу щагъэ­кIодыжьых.

Контейнерхэр зэблехъух

ХэкIитэкъупIэ площадкэу Адыгеим щыгъэпсыгъэ­хэм атет контейнерэу жъы хъугъэхэр региональнэ операторым зэблехъух.

Ащ Iоф зишIэрэм къыщыублагъэу фэтэрыбэу зэхэт унэхэм ачIэсхэм яхэкIитэкъупIэхэм бак 1500-рэ кIэу ащигъэуцугъах. ГъэIорышIэкIо компаниехэмрэ псэупIэ кой администрациехэмрэ мы Iофым къыхэлажьэх, «ЭкоЦентрэм» иIофышIэхэр ащ лъэплъэх.

Шъугу къэтэгъэкIыжьы, хэкIым идэщын ылъэныкъо­кIэ гумэкIыгъо зиIэр мы телефонхэмкIэ къытеон ылъэкIыщт: 8-800-707-05-08, 8(8772)21-06-00, 8-962-868-14-62.

УпчIэ-джэуап

ХэкIыр зэрэIуащырэм ыуасэу унагъом ытыщтым кIэлэцIыкIухэр къызкIыдэлъытагъэм бэрэ къыкIэупчIэх, ахэм хэкI зыпари къапымыкIэу нахьыбэхэм алъытэ. Ащ джэуап къетэтыжьы.

ЦIыкIуми, иными нэбгырэ пчъагъэу исым телъытагъэу пыдзэфэ пытэхэр зэрэдащыхэрэм ыуасэ къалъытэ. Ар законым щыгъэнэфагъ.

ЩыIэныгъэм къызэригъэлъагъорэмкIэ, сабыеу къэхъугъакIэми иудзыжьын фае горэ къыпэкIы. ГущыIэм пае, памперсхэр, ышхыщтыр зэрылъыгъэ къэмланхэр, нэмыкIыбэхэр. Ыныбжь зыхахъокIэ джэгуалъэхэр фащэфых, ахэр мэкъутэх, щыгъынхэр, анахьэу цуакъэхэр, елажьэхэшъ къырадзыжьых. Нахьыжъхэм анахьыбэу кIэлэцIыкIухэм хэкI къызэрапыкIырэр ны-ты пстэумэ ашIэ.

Унагъом хахъо иIэмэ е кIэлэцIыкIоу исыгъэм ыныбжь икъуи еджакIо кIуагъэмэ, къулыкъу ехьымэ е Iоф ышIэнэу нэмыкI псэупIэ къыхихыгъэмэ, региональнэ операторыр ащ щыжъугъэгъозэн фае. Ащ пае офисым шъукъекIуалIэми хъущт: МыекъуапэкIэ урамэу Пионерскэр, 297-рэ, поселкэу ЯблоновскэмкIэ урамэу Школьнэр, 10/1. Джащ фэдэу «ЭкоЦентрэм» иинтернет нэкIубгъо щышъутхыни шъулъэкIыщт. Мары адресыр: https:adygeya.clean-rf.ru.

ООО-у «ЭкоЦентрэм» и Адыгэ шъолъыр
къутамэ ипресс-къулыкъу.