КIэлэцIыкIу IыгъыпIакIэ Мыекъуапэ къыщашIы

Республикэм икъэлэ шъхьа­Iэ иурамэу Михайловым ыцIэ зыхьырэм щашIы­рэ псэуалъэм комму­ника­циехэр ращэлIагъэх: гъэ­фэбапIэр, псырыкIуапIэр, нэмыкIхэри. Жьыр къезы­гъэкIокIырэ системэм Iоф зэришIэрэр ауплъэкIу. Объектым ыкIоцI зэте­гъэ­псыхьэгъэнымкIэ Iоф­шIэнхэр ыкIэм фэкIуагъэх, къэзыгъэнэфырэ пкъыгъохэм ягъэуцун фежьагъэх.

Гъэсэныгъэм иучреждение имыза­къоу, ащ къыпэIулъ чIыпIэми изэтегъэпсыхьан ыуж итых: асфальтыр тыралъхьэ, лъэс­рыкIо гъогум плиткэр рагъэкIу ыкIи чъыг цIыкIухэр агъэтIысых.

Псэуалъэр ыкIи ащ къыпэIулъ чIыпIэр зызэтырагъэпсыхьэрэ нэуж хъэренхэр, тIысыпIэхэр ыкIи нэмыкI архитектурнэ пкъыгъо цIыкIу зэфэшъхьафхэр мыщ щагъэуцунхэу агъэнафэ.

Лъэпкъ проектэу «Демографием» илъэныкъоу бзылъфы­гъэхэм IофшIапIэхэр ягъэгъотыгъэнхэм ыкIи аныбжьыкIэ илъэсищым нэмысыгъэ сабый­хэм кIэлэцIыкIу IыгъыпIэм чIыпIэхэр ащыряIэнхэм фытегъэ­псыхьагъэм мыр къыдыхэлъытагъэу щыт.

КъызэраIуагъэмкIэ, гъэсэныгъэм иучреждениякIэ игъэпсын сомэ миллиони 159,7-рэ пэIуагъэхьащт. Мылъкур федеральнэ ыкIи республикэ бюджетхэм къахэхыгъ.

Лъэпкъ проектхэм ягъэцэкIэн къыдыхэлъытэгъэ социальнэ псэуалъэхэм яшIын ыкIи язэтегъэпсыхьан зэхэщагъэ зэрэхъу­рэм, псэолъэшI IофшIэнхэр зэрэлъыкIуатэхэрэм лъэплъэ Адыгэ Республикэм и ЛIышъхьэу КъумпIыл Мурат.

Шъугу къэдгъэкIыжьын, Урысые Федерацием и Президентэу Владимир Путиным пшъэрылъ къыгъэуцугъ 2021-рэ илъэсым ехъулIэу къэралыгъом щыпсэурэ сабыйхэм зэкIэми кIэлэцIыкIу IыгъыпIэхэм чIыпIэхэр ащыряIэнхэу. «2024-рэ илъэсым нэс УФ-м хэхъоныгъэ ышIынымкIэ лъэпкъ гухэлъхэмрэ стратегическэ пшъэрылъхэмрэ афэгъэ­хьыгъ» зыфиIорэ унашъом ар епхыгъ.

ЫпшъэкIэ къызэрэхэдгъэщыгъэу, сабый зиIэ бзылъфыгъэхэм Iоф ашIэн амал яIэныр ары мыщ дэжьым анахь шъхьаIэу щытыр. Мы пшъэрылъым игъэ­цэкIэн республикэм игъорыгъоу щызэшIуахы. Илъэси 3 — 7 зыныбжь сабыйхэм кIэлэцIыкIу IыгъыпIэхэм чIыпIэхэр ащыряIэнхэмкIэ гумэкIыгъо щыIэ­жьэп, джы илъэси 3-м нэс зыныбжьхэм алъэныкъокIэ къэ­уцурэ Iофыгъохэр зэшIуахых. Ащ пае 2020-рэ илъэсым нэбгыри 120-мэ ателъытэгъэ кIэлэцIыкIу IыгъыпIэ къутырэу Гавердовскэм ыкIи чIыпIэ 240-рэ зиIэ гъэсэныгъэм иучреждение микрорайоныкIэу Кобл Якъубэ ыцIэ зыхьырэм иурам ащагъэпсыгъэх.

Сурэтхэр Мыекъопэ къэлэ администрацием исайт къыхэхыгъэх.