Домбайхэр къалъытэжьыгъэх

Кавказ заповедникым домбаеу хэтыр зыфэдизыр бэдзэогъу мазэм и 24-м къыщегъэжьагъэу и 30-м нэс къалъытэжьыгъ. Ащ икъэралыгъо инспекторхэмрэ научнэ отделым ишIэныгъэлэжьхэмрэ чIыпIэ зэфэшъхьафхэм Iоф ащашIагъ. Домбай зэрэугъоигъэхэм якупитф ауплъэкIугъэр.

ШIэныгъэлэжьхэм а уахътэм алъэгъугъэр 835-рэ мэхъу. Заповедникым хэтыр 1200-рэ, домбай щырхэр зыкIыгъухэр 233-рэ. Ахэм япроцент 11,6-мэ аныбжь джыри илъэс хъугъэп, гъэрекIо къэхъугъэхэр проценти 8,2-р ары.

Илъэс 18-м къыкIоцI Кавказ заповедникым домбаеу хэтыр фэди 8-кIэ нахьыбэ хъугъэ. 2002-рэ илъэсым 140-рэ къа­лъытэгъагъ. А лъэхъаным мы хьэкIэ-къокIэ лъэпкъыр кIодыжьыным ищынагъо щыIагъ. Арэу щытми, заповедникым икъэгъэгъунэн зэрагъэлъэшы­гъэм ишIуагъэкIэ пчъагъэм хэхъо. 2014-рэ илъэсым домбаеу хэтыр 830-рэ хъущтыгъ, 2017-м а пчъагъэр 1100-м нэсыгъ, 2019-рэ илъэсым 1150-рэ къалъытэгъагъ.

Заповедникым къызэрэща­IуагъэмкIэ, илъэсым тIо домбайхэр къалъытэжьых. КIымэфэ уахътэм зыдэщыIэхэр зэрагъэшIэнхэм пае, ошъогумкIэ алъэп­лъэх.