Адыгеим и ЛIышъхь: «ТшIэрэр зэкIэ цIыфхэм афытегъэпсыхьэгъэн фае»

Адыгэ Республикэм и ЛIышъхьэу КъумпIыл Мурат тыгъуасэ Мыекъопэ районым ипоселкэу Каменномостскэм щыIагъ ыкIи къэралыгъо программэу «Къоджэ чIыпIэхэм хэхъоныгъэ ашIыныр» зыфиIорэм къыдыхэлъытэгъэ проектхэр псэупIэм зэрэщагъэцакIэхэрэр ыуплъэкIугъ. Iофтхьабзэм хэлэжьагъэх АР-м иминистрэхэм я Кабинет хэтхэр, Мыекъопэ районым иадминистрацие ипащэу Олег Топоровыр, Каменномостскэ къоджэ псэупIэм ипащэу Владимир Петровыр.

Республикэм ипащэ къэралыгъо программэм игъэцэкIэн къыдыхэлъытагъэу зэтырагъэпсыхьэхэрэ социальнэ псэолъэ заулэмэ аIухьагъ, IофшIэнхэр зэрэлъыкIуатэхэрэм зыщигъэгъозагъ. Ахэм ащыщых поселкэм дэт кIэлэцIыкIу IыгъыпIищэу игъэкIотыгъэ гъэцэкIэжьынхэр зыщыкIохэрэр. Мы псэуалъэхэр блэкIыгъэ лIэшIэгъум ия 60 — 70-рэ илъэсхэм ашIыгъагъэх. Ахэм гъэцэкIэжьынхэр арашIы­лIэхэу къыхэкIыгъ, ау мыщ фэдэу загъэ­кIэжьыхэрэр апэрэ. IофшIэнхэм къадыхэ­лъытагъэу унашъхьэр зэбла­хъущт (кIэ­лэцIыкIу IыгъыпIэу N 24-м), джащ фэдэу шъхьангъупчъакIэхэр ахагъэуцощтых, инженернэ коммуникациехэр, гъэсэныгъэм иучреждениехэм акIоцIхэр, ащ къапэIулъ чIыпIэхэр зэтырагъэпсыхьащтых. Ащ нэмыкIэу кIэлэцIыкIу IыгъыпIэхэм ачIэтыгъэ гъэфэбэпIэ системэхэр зэблахъугъэх.

АщкIэ мэхьанэшхо зиIагъэр ыпшъэкIэ зигугъу къэтшIыгъэ къэралыгъо программэм къыдыхэлъытагъэу Каменномостскэм ирайон цIыкIухэм гъэстыныпхъэ шхъуан­тIэр зэралъыIэсыгъэр ары. ТапэкIэ къо­джэ псэупIэм Iофтхьабзэу щызэхащэщтхэм яшIуагъэкIэ илъэситIум къыкIоцI газыр зылъыIэсыгъэхэм япчъагъэ джыри нахьыбэ хъущт.

Джащ фэдэу культурэм и Унэ гъэкIэ­жьыгъэныр мы программэм къыдыхэлъы­тагъ. Ар 1968-рэ илъэсым ашIыгъ, непэрэ шапхъэхэм адиштэжьырэп. Шъолъырыр мы программэм зэрэхэлажьэрэм ыкIи федеральнэ мылъку къызэрэIэкIэхьагъэм ишIуагъэкIэ культурэм иучреждение зэрифэшъуашэу зэтырагъэпсыхьащт. ПсэолъэшIхэм унашъхьэр зэблахъугъ, гъэ­фэбэпIэ системэр зэтырагъэуцо, нэмыкI IофшIэнхэр агъэцакIэх.

АгъэкIэжьырэ культурэм иучреждение тхылъеджапIэр, хореографием икружокхэр, орэдыIо ыкIи театральнэ студиехэр къыщызэIуахынхэу агъэнафэ. ГъэцэкIэжьынхэм ауж залым чIыпIэ 238-рэ иIэщт, ащ 3Д-кинотеатр дыхэтыщт.

Аужырэ шапхъэхэм адиштэрэ шIыкIакIэхэр агъэфедэнхэм мэхьанэшхо зэриIэр, ау ащ дакIоу псэуалъэм ижъырэ иархитектурнэ теплъэ къэгъэнэжьыгъэн зэрэфаер Адыгеим и ЛIышъхьэ хигъэунэфыкIыгъ. Джащ фэдэу паркыр зэрэзэтырагъэпсыхьагъэр республикэм ипащэ зэригъэлъэгъугъ. ЛъэсрыкIохэм къызщакIухьан алъэкIыщт гъогухэр мыщ щашIыгъэх, сценэр, зыгъэпсэфыпIэ чIыпIэхэр, кIэлэцIыкIу площадкэр къыдэуцуа­гъэх. Паркым пэмычыжьэу щыт саугъэтымрэ ыпэкIэ кинотеатрэу щытыгъэ псэуалъэмрэ непэ гъэцэкIэжьынхэр ащэ­кIох. Владимир Петровым къызэри­IуагъэмкIэ, зекIоным зызэриушъомбгъурэр къыдалъытэзэ, мы чIыпIэм къэбарлъыгъэIэс гупчэрэ къэгъэлъэгъуапIэрэ къыщызэIуахынхэу ары.

Къоджэ псэупIэхэм адэсхэм загъэпсэфыным ыкIи шIуагъэ къытэу яуахътэ агъэ­кIоным, ятворчествэ хагъэхъоным, кIэлэцIыкIухэм гъэсэныгъэ тэрэз зэра­гъэгъо­тыным мэхьанэшхо зэриIэр, ащ фэдэ амал ятыгъэныр пшъэрылъ шъхьаIэу зэрэщытыр Адыгеим и ЛIышъхьэ къы­Iуагъ. Ар гъэцэкIэгъэным фэшI федеральнэ программэу «Гъэсэныгъэм хэхъо­ныгъэ ышIыныр» зыфиIорэм республикэр хэ­хьагъ. ИскусствэхэмкIэ кIэлэцIыкIу еджа­пIэхэр гъэкIэжьыгъэнхэр ары мыщ дэжьым анахь шъхьаIэр.

Мыщ фэдэ екIолIакIэм ишIуагъэкIэ поселкэу Каменномостскэм дэт искусствэхэмкIэ кIэлэцIыкIу еджапIэм игъэцэкIэжьын сомэ миллион 28,5-рэ пэIуагъэхьащт, непэрэ мафэм IофшIэнхэр щэкIох.

— Зэфэхьысыжьыр ары анахь шъхьа­Iэр. ТшIэрэр зэкIэ цIыфхэм афытегъэпсыхьэгъэн фае. Арышъ учреждениехэм ягъэцэкIэжьын зэхэщагъэ зэрэхъурэм пытагъэ хэлъэу тылъыплъэн фае. Нэужым егъэджэн IофшIэным зэрифэшъуашэу тыкъе­кIолIэным, сабыйхэм ящыкIагъэр ядгъэгъотыным, сэнаущыгъэу ахэлъым зыкъызэIуихын амал яIэным тыпы­лъын фае, — къы­Iуагъ КъумпIыл Мурат.

АР-м и ЛIышъхьэ
ипресс-къулыкъу.