СтIашъу Мамыр дышъэр егъэшIэты

Урысые Федерацием кушъхьэфэчъэ спортымкIэ изэнэкъокъу бэдзэогъум и 31-м къалэу Ижевскэ щыкIуагъ.

Адыгэ Республикэм кушъхьэ­фэчъэ спортымкIэ испорт еджапIэ ипащэу Анатолий Лелюк тызэрэщигъэгъозагъэу, хэгъэгум изэнэкъокъу тиспортсменхэр чанэу хэлэжьагъэх, медальхэр къыдахыгъэх.

Хъулъфыгъэхэм «Критериум» зыфиIорэ зэIукIэгъум яIэпэIэсэныгъэ къыщагъэлъэгъуагъ. Километрэ 50 хъурэ гъогум зыщызэнэкъокъухэм Адыгэ Респуб­ликэм щапIугъэ нарт шъаоу, спортымкIэ дунэе класс зиIэ мастерэу СтIашъу Мамыр апэрэ чIыпIэр къыдихи, дышъэр къыфагъэшъошагъ.

— Ижевскэ сыкIоным ыпэкIэ Адыгеим испорт псэуалъэхэм, къушъхьэ гъогухэм пэшIорыгъэ­шъэу защызгъэхьазырыгъ, — къыти­Iуагъ Урысыем кушъхьэфэчъэ спортымкIэ ихэшыпыкIыгъэ командэ хэтэу СтIашъу Мамыр. — ТиеджапIэ ипащэу Анатолий Лелюк, зэхэщэн IофыгъохэмкIэ IэпыIэгъу къытфэхъу­гъэхэм тафэраз.

Елизавета Ошурковам имедалитIу

Урысыем и Кубок кушъхьэ­фэчъэ спортымкIэ къыдэхыгъэным фэгъэхьыгъэ зэнэкъокъу Ижевскэ щызэхащагъ. Хэгъэгум ихэшыпыкIыгъэ командэ хэтэу Елизавета Ошурковар километрэ 25-рэ къэзыкIугъэхэм янэкъо­къугъ. Адыгеим испортсменкэ ятIонэрэ чIыпIэр къыдихи, тыжьыныр къыфагъэшъошагъ.

Хэгъэгум ибзылъфыгъэхэм «Критериум» зыфиIорэм яIэпэIэ­сэныгъэ къызыщагъэлъагъом, Елизавета Ошурковам джэрзыр къыдихыгъ. Тренерэу Алексей Войновым Е. Ошурковар егъасэ.

ШышъхьэIум и 12-м Урысыем кушъхьэфэчъэ спортымкIэ изэ­нэкъокъу Самарэ щыкIощт. Хъулъ­фыгъэхэри, бзылъфыгъэхэри хэгъэгум изэIукIэгъухэм ахэлэжьэщтых. Адыгеим испортсменхэм зэнэкъокъум гъэхъагъэ щашIынэу тагъэгугъэ.