Пенсиехэр

IофшIапIэхэм аIутхэм

Пенсионерэу 2019-рэ илъэсым IофшIапIэхэм аIуты­гъэхэм япенсиехэм къахэ­хъуагъэу шышъхьэIу мазэм къатынэу рагъэжьагъ.

Мыщ пае пенсионерым лъэIу тхылъ ытын ищыкIагъэп. Ыныбжь нэсыгъэу е сэкъатныгъэ иIэ хъугъэу страхованиемкIэ пенсиер зыфагъэпсыгъэу, IофшIэпIэ чIыпIэм Iутэу взносхэр къызфатыгъэхэр зэкIэри къыхеубытэх.

НэмыкIхэм индексациеу афашIырэм фэмыдэу, мыр пенсионерым лэжьапкIэу къыратырэм бэкIэ елъытыгъ. Ау анахьыбэу къыхэхъощтыр пенсионнэ коэффициентищым ауасэм фэдиз. 2020-рэ илъэсым ар сомэ 93-рэ зэрэхъурэр, къафыхэхъощтыр сомэ 279-м шIокIыщтэп.

IофшIапIэхэм аIут пенсионерэу Адыгеим исыр нэбгырэ мин 28-м ехъу.

ЕмыкIуалIэхэу афагъэпсыщт

УФ-м IофшIэнымкIэ ыкIи цIыфхэр социальнэу къэухъумэгъэнхэмкIэ и Министерствэ иунашъоу мэкъуогъу мазэм къыдэкIыгъэм къызэрэщиIорэмкIэ, бэдзэогъум и 28-м къыщыублагъэу сэкъатныгъэ зиIэ хъугъэу пенсие зыфагъэнэфагъэхэр ПенсиехэмкIэ фондым екIолIэнхэшъ, лъэIу тхылъ атын ищыкIагъэп.

Фондым испециалистхэм сэкъатныгъэ зиIэхэр зыщытхыгъэ федеральнэ реестрэм итым къыпкъырыкIыхэзэ мэфипшIым къыкIоцI ахъщэ тыныр агъэпсы. ЦIыфым къэралыгъо фэIо-фашIэхэм япортал щыриIэ «унэе кабинетым» е иэлектроннэ почтэ ар къыратхэ, телефонымкIэ къыфагъэхьэуи мэхъу.

Сэкъатныгъэр зэрагъэнафэрэ ыкIи ащ пае пенсиер зэрагъэпсырэ шIыкIэхэр нахь къызэрыкIо шIыгъэнхэм фытегъэпсыхьэгъэ Iофтхьабзэхэм мыр зэу ащыщ. Федеральнэ реестрэр зыфашIыгъэри ащ пай. ЦIыфэу сэкъатныгъэ зиIэм электроннэ шIыкIэм тетэу лъэIу тхылъыр зитыкIэ, нэмыкIэу ищыкIагъэр зэкIэ ащ къыдахы.

БлэкIыгъэ илъэсым Федеральнэ реестрэм иIэпыIэгъукIэ сомэ миллионрэ мини 100-рэ ахъщэ тынэу агъэпсыгъ. Ахэм янахьыбэр, сомэ мин 723-р, мазэ къэс къатырэ ахъщэ тын, сомэ 388,5-р сэкъатныгъэ зиIэхэм афагъэнэфэгъэ страховой е къэралыгъо пенсиер ары.

Мы уахътэм цIыфым сэкъатныгъэ зэриIэри медицинэм иучреждение къытыгъэ тхылъхэм къапкъырыкIыхэзэ агъэунэфы. Зэпахырэ узэу дунаир зэлъызыкIугъэм зимыушъомбгъуным пае аущтэу ашIыгъ, 2020-рэ илъэсым ичъэпыогъу мазэ и 1-м нэс шапхъэм кIуачIэ иIэщт.

Cэкъатныгъэ зэриIэм пае пенсиер апэрэу зыфагъэнэфагъэм, ар къызэрэIэкIэхьащт шIыкIэу ежь зыфаер къызщиIорэ лъэIу тхылъыр ытын фай, ау нахьыпэкIэ къыфакIощтыгъэмэ, ар ищыкIэгъэщтэп.

Мэлылъфэгъу мазэм къыщегъэжьагъэу пенсиехэри, ахъщэ тынхэри пэIудзыгъэ шIыкIэм тетэу фондым егъэпсых, къелъытэжьых, цIыфхэм IэпыIэгъоу ящыкIагъэри ареты. ТапэкIи а шIыкIэр лъигъэкIотэщт.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.