ИгъэкIотыгъэ уплъэкIун Iофтхьабзэу «Линия здоровья» зыфиIорэм ипхырыщын Адыгеим щаублагъ

Коронавирусым зиушъомбгъуным ищынагъо зыщыщыIэ лъэхъаным цIыф­хэм япсауныгъэ пэшIорыгъэшъэу уплъэкIугъэным ар тегъэпсы­хьагъ. Апэ зыщыпхыращыщтыр къалэу Мыекъуап.

Мы илъэсым ишышъхьэIу мазэ иапэрэ мафэ къыщыу­благъэу итыгъэгъэзэ мазэ нэс Iофтхьабзэр ателъытагъ.

Программэм пшъэрылъэу иIэхэр зыныбжь илъэс 39 — 60-м нэсыгъэхэм хэужъыны­хьэгъэ уз яIэмэ нахьыжьэу къы­хэгъэщыгъэныр ыкIи цIыфхэм къагъашIэрэм хэгъэхъо­гъэныр арых.

Проектым къыхиубытэу зигугъу къэтшIыгъэ ныбжь зиIэхэм анахьэу анаIэ зыкIытырагъэтырэр Iоф зышIэшъущтхэм ащыщэу гу-лъынтфэ, адэбз уз­хэм апкъ къикIэу ядунай ахъо­жьыным ищынагъо нахь къызэряутэкIырэр ары.

«COVID-19-м» зызщиушъомбгъурэм илъэхъан зэшIуахынэу агъэнафэрэр нэбгырэ мини 10 фэдизмэ кIэупчIэнхэр арагъэ­кIунхэр ары. Узыр къызэкIуным ищынагъо зиIэхэр агъэу­нэфынхэр, медицинэ уплъэкIунхэр афызэхащэнхэр ыкIи санитарнэ шапхъэу щыIэхэр агъэцакIэхэзэ яIэзэнхэр пшъэрылъхэм ащыщых.

«Линия здоровья» зыфиIорэ программэр пэшIо­рыгъэшъ медицинэ Iофтхьа­бзэхэр зы­щызэшIуахыхэрэ ­республикэ гупчэм щызэхащэщтых Адыгэ Республикэм и ЛIышъхьэ IэпыIэгъоу, псау­ныгъэр къэухъу­мэгъэнымкIэ министерствэр, къалэу Мые­къуапэ иадминист­рацие, Iахьзэхэлъ обществэу «Ухъумэ­нымкIэ компаниеу «СО­ГАЗ-Мед» зыфиIорэр къы­хэлажьэ­хэзэ.

Проектыр уцугъуитIоу гощыгъэщт.

Апэрэм къыхиубытэу:

1) онлайн-кIэупчIэнхэр зэ­рэзэхащэщтхэмкIэ ащ къы­рагъэубытыщт цIыфхэм ухъу­мэнымкIэ компанием макъэ арегъэIу;

2) онлайн-кIэупчIэнхэм къы­дыхалъытэхэрэр:

— кIэупчIэнхэр медицинэ учреждением иIофышIэхэм телефон номерэу 52-09-00-мкIэ зэхащэщтых;

— къэбар-телекоммуника­ционнэ хъытыоу ИнтернетымкIэ сайтэу http://www.adygheya.ru зыфиIорэм мы къыкIэлъыкIорэ инэкIубгъо — http://www.adygheya.ru/anketa/ — цIыфхэм ежь-ежьырэу упчIэхэм яджэуапхэр къаратынхэ фае.

ЯтIонэрэм къыхиубытэу:

1) медицинэ учреждением иIофышIэхэм:

— кIэупчIэнхэр зэхафыжьых;

— щынэгъо купым хахьэхэрэр агъэунэфых;

— медицинэ уплъэкIунхэм язэкIэлъыкIуакIэ, ячэзыу зэхагъэуцо ыкIи цIыфхэр ауплъэкIух;

— телефон зэпхыныгъэр агъэфедэзэ цIыфхэр уплъэ­кIунхэм къарагъэблагъэх пэ­шIо­рыгъэшъ медицинэ Iофтхьа­бзэхэр зыщызэшIуахыхэрэ рес­публикэ гупчэу мыщ фэдэ адрес зиIэм:

Къалэу Мыекъуапэ, ур. Крас­нооктябрьскэр, 43-рэ.

Санитарнэ ыкIи эпидемием пэшIуекIорэ Iофтхьабзэхэр агъэ­цакIэхэзэ пстэури зэшIуа­хын фае.
ШIоигъоныгъэ зиIэ цIыфхэр арых программэм хэлэжьэнхэ зылъэкIыщтхэр.