Анахь дэгъухэм ахэтых

«Российский союз молодежи» зыфиIорэм и Адыгэ регион къутамэ шъолъыр организацие анахь дэгъу хъугъэ.

АР-м гъэсэныгъэмрэ шIэныгъэмрэкIэ и Министерствэ къы­зэрэщаIуагъэмкIэ, «Лучшие региональные организации РСМ в проектной деятельности» зыфиIорэ лъэныкъомкIэ ар къыхагъэщыгъ. 2018-рэ илъэсым егъэпшагъэмэ, 2019-рэ илъэсым ащ иIофшIэн нахь чанэу зэхищагъ.

Адыгэ къэралыгъо университетым и Мыекъопэ къэралыгъо гуманитар-техническэ колледж, Адыгэ кIэлэегъэджэ колледжэу Андырхъое Хъусен ыцIэ зыхьырэм, Мыекъопэ индустриальнэ техникумым «Российский союз молодежи» зыфиIорэм Iоф дашIэнэу рагъэжьагъ.

Джащ фэдэу блэкIыгъэ илъэсым шъолъырым итренинг гупчэу «Точка роста» зыфиIорэр къызэIуахыгъ. АР-м IофшIэнымкIэ ыкIи социальнэ хэхъоныгъэмкIэ и Министерствэ игрант IэпыIэгъукIэ ащ иIофшIэн ригъэжьагъ.

Гъэсэныгъэм ипроектэу «Фыщт», лъэпкъ премиеу «Студент года — 2019», форумэу «Ошъутэн», фестивалэу «Студентым игъатх», нэмыкIхэри ыпэкIэ зигугъу къэтшIыгъэ организацием зэхищагъэх. Урысые акциехэр, лъэпкъ зэфэшъхьафхэм зыкIыныгъэ ахэлъыным фэIорышIэрэ зэIукIэгъухэр, текIоныгъэм фэгъэхьыгъэ зэхахьэхэр рагъэкIокIыгъэх..

Гъонэжьыкъо Сэтэнай.