Бизнес цIыкIум ыкIи гурытым ащылажьэу, чIыфэ ищыкIагъэу предпринимательхэм IэпыIэгъу ягъэгъотыгъэнымкIэ Адыгэ Республикэм и Фонд зыкъыфэзгъэзагъэхэм ятхылъхэм комиссиер ахаплъи, бэмэ адыригъэштагъ. ПстэумкIи кредитэу аратыгъэр сомэ миллион 27-рэ мэхъу. 
Зэпахырэ узэу дунаир зэлъызыкIугъэм анахьэу иягъэ зэригъэкIыгъэ предпринимательхэм ащыщэу щымэ ящыкIэгъэ товархэр, оборудованиер ащэфынэу, бэджэнд уасэр, лэжьапкIэхэр атынхэу сомэ миллион зырыз чIыфэу аратыгъ. Шапхъэу ащ пылъхэм къызэращыдэлъытагъэмкIэ, апэрэ илъэсэу ар затыжьыщтым зы процент ныIэп техъощтыр.
Пхъэм псэуалъэхэр зыщыхашIыкIырэ цехым игъэкIэжьын пэIуигъэхьанэу, оборудованиеу, нэмыкIэу ищыкIагъэхэр рищэфынхэу сомэ миллиони 5 фагъэкIуагъ зы предпринимателым. Ащ илъэсым проценти 4,5-рэ техъощт.
Бзылъфыгъэм ыгъэпсыгъэ бизнесым IэпыIэгъу етыгъэным фэгъэхьыгъэ программэм къыдыхэлъытагъэуи нэбгыритIумэ миллион тфырытф кредит аратыгъ. Мыкощырэ мылъкум игъэIорышIэн епхыгъэ предприятием IофшIэпIэ чIыпIэу къытыхэрэм ахигъэхъоным пае фэгъэкIотэнхэр къыдэлъытагъэхэу сомэ миллиони 5 фагъэкIуагъ. Мы кредитым илъэсым проценти 5 техъощт.
Кредитэу сомэ миллиони 5 ыкIи промышленностым зегъэушъомбгъугъэнымкIэ Адыгэ Республикэм и Фонд шыхьат фэхъугъэу, сомэ миллионрэ мин 500-рэ ратыгъ мэкъумэщ-фермерскэ хъызмэтшIапIэм. АщкIэ щэ бэу къэзытырэ былымышъхьэу иIэхэм ахигъэхъощт.
Къыхэдгъэщымэ тшIоигъор предпринимательхэм IэпыIэгъу ягъэгъотыгъэнымкIэ Адыгэ Республикэм и Фонд «Малое и среднее предпринимательство и поддержка предпринимательской инициативы» зыфиIорэ лъэпкъ проектым къыщыдэлъытагъэхэм атетэу Iоф зэришIэрэр ары.