КъумпIыл Мурат: «Непэрэ шапхъэхэм адиштэрэ псэупIэхэр шIыгъэнхэмкIэ шъолъырым амалышIухэр IэкIэлъ мэхъу»

УФ-м и Къэралыгъо совет иIофшIэкIо купэу псэолъэшIыным, псэу­пIэ-коммунальнэ хъызмэтым, къэлэ щыIакIэм илъэныкъо фэгъэзагъэм зэ­хэсыгъоу иIагъэм хэлэжьагъ Адыгэ Республикэм и ЛIышъхьэу КъумпIыл Мурат.

Видеоконференцие шIыкIэм тетэу кIогъэ Iофтхьабзэм тхьа­мэтагъор щызэрихьагъ Урысыем и Президент иIэпыIэгъоу, Госсоветым исекретарэу Игорь Левитиным. Джащ фэдэу ащ хэлэжьагъэх УФ-м и Правительствэ и Тхьаматэ игуадзэу Марат Хуснуллиныр, Республикэу Татарстан ипрезидентэу, IофшIэкIо купым ипащэу Рустам Миннихановыр, УФ-м псэолъэ­шIынымкIэ ыкIи псэупIэ-коммунальнэ хъызмэтымкIэ иминист­рэу Вла­димир Якушевыр, федеральнэ ведомствэхэм ялIыкIохэр, къэралыгъом исубъектхэм ягубернаторхэр.

Игорь Левитиным зэхэсыгъор къызэIуихызэ къыхигъэ­щыгъ «2030-рэ илъэсым нэс Урысые Федерацием хэхъоныгъэ ышIынымкIэ лъэпкъ гухэлъхэм афэгъэхьыгъ» зыфиIорэ унашъом УФ-м и Президентэу Владимир Путиныр зэрэкIэтхагъэр. Къэгъэлъэгъон гъэнэфагъэхэм акIэхьэгъэныр документым къыдыхэлъытагъ. ГущыIэм пае, Iэрыфэгъу ыкIи щынэгъончъэ къэлэ щыIакIэм епхыгъэу илъэсым къыкIоцI унэгъо миллионитфым къы­щы­мыкIэу псэукIэ амалэу яIэхэр нахьышIу ашIынхэ, псэупIэу къашIырэм илъ квадратнэ мет­рэр миллиони 120-м нахь мымакIэу щытыным къыфэкIогъэн фае.

IофшIэкIо купым ипащэу Рустам Миннихановым къызэри­IуагъэмкIэ, псэолъэшIыным IэпыIэгъу фэхъугъэнымкIэ лъэ­бэкъоу ашIыгъэхэм яшIогъэшхо къэкIуагъ. Ащ хэхьэх проценти 6,5-рэ зыпылъ ипотекэр, фэ­гъэкIотэныгъэ зиIэ къоджэ ипо­текэр, нэмыкIхэри.

Мы лъэныкъом хэщагъэхэм IэпыIэгъу афэхъугъэнымкIэ УФ-м и Правительствэ унэшъо гъэнэфагъэхэр ышIыгъэх, ащи зэфэхьысыжь дэгъухэр фэхъугъэх.

— Мы отраслэм тапэкIи IэпыIэгъу тызэрэфэхъущтыр къагурыIоным фэшI цIыфхэм зэ­дэгущыIэгъухэр адашIынхэу шъолъырхэм япащэхэм закъы­фэсэгъазэ, — къыIуагъ вице­-премьерэу Марат Хуснуллиным.

ПсэолъэшIыным хэщагъэхэм ящыкIэгъэ тхьапэхэр агъэхьазырынхэмкIэ, яIоф нахь агъэ­псынкIэнымкIэ амалэу щыIэхэм зэхэсыгъом хэлэжьагъэхэр атегущыIагъэх.

— УФ-м и Президентэу Владимир Путиным псэупIэхэм яшIынкIэ IофшIэныр нахь гъэлъэшыгъэн, пэрыохъоу щыIэхэр дэгъэзыжьыгъэнхэ зэрэфаем епхыгъэ пшъэрылъым игъэцэ­кIэн тицIыфхэм псэукIэ амалэу яIэхэр нахьышIу шIыгъэнымкIэ шъолъырхэм амалышIухэр къаретых, — къыIуагъ КъумпIыл Мурат зэхэсыгъом зэфэхьысыжьхэр къыфишIызэ.

Шъугу къэдгъэкIыжьын, лъэпкъ проектым къыдыхэлъы­тэгъэ шъолъыр проектэу «Псэу­пIэ» зыфиIорэр Адыгеим ща­гъэцакIэ. Ащ къызэригъэна­фэрэмкIэ, 2024-рэ илъэсым нэс квадратнэ метрэ миллиони 2,1-рэ зэрылъ унэхэр респуб­ликэм щашIынхэ фае. БлэкIыгъэ илъэсым квадратнэ метрэ мин 257-рэ атыгъ, мы илъэ­сымкIэ а къэгъэлъэгъоныр мин 262-м кIэхьанэу агъэнафэ.

АР-м социальнэ-экономи­ческэ хэхъоныгъэхэр ышIынхэмкIэ иунэе план къыдыхэ­лъытагъэу муниципалитетхэм проектнэ-сметнэ документациер агъэхьазырыным мы илъэсым сомэ миллион 86-рэ фэдиз пэIуагъэхьащт.