ХэбзэIахьым къырагъэгъэзэжьын алъэкIыщт

ЦIыфым ипенсие зыщызэIукIэрэм ыгъэкIонэу къытыгъэм къэралыгъоми иIахь къыхилъхьаным фэгъэхьыгъэ программэм хэлажьэхэрэм 2019-рэ илъэсым пстэумкIи сомэ миллиони 9 счетхэм къарагъэхьагъ. Ар нэбгырэ 1164-рэ. Ахэм зэкIэми хэбзэIахьхэм къарагъэгъэзэжьынэу (налоговый вычет) амал яI.

ГущыIэм пае, законым къы­зэрэщыдэлъытагъэм тетэу, 2019-рэ илъэсым сомэ 2000-м къыщымыкIэу, ау 12000-м шIомыкIэу къыригъэхьагъэмэ, ащ ипроцент 13-м мы илъэсым къыгъэзэжьынэу ыгъэпсын фит. Ащ пае хэбзэIахьхэмкIэ инспекцием зыфигъэзэн фае. Ащ имызакъоу ыпэрэ 2017 — 2018-рэ илъэсхэмкIи декларациехэр ышIынхэшъ, ащыгъум ытыгъэмкIи къаIихыжьынхэ ылъэкIыщт.

Шъугу къэдгъэкIыжьын, программэм къызэрэщыдэ­лъытагъэм тетэу, цIыфым ытыгъэм фэдиз къэралыгъоми къыхелъхьэ. 2015-рэ илъэсым ищылэ мазэ и 31-м нэмысызэ взнос зышIыгъэ пстэуми мыщ хэлэжьэнхэу фитыныгъэ яIагъ.

Апэрэ взносыр цIыфым зитыгъэм къыщыублагъэу илъэси 10 хъугъэу къэралыгъом иIахь къыхелъхьэ. Мыщ хэлэжьэнэу зэ нэмыIэми взнос зышIыгъэм ар къызэтыригъэуцони, нэужым пидзэжьыни фит.