Псыхъохэм якъэбзагъэ уигъэрэзэнэу щыт

Адыгэ Республикэм, Краснодар краим, Волгоградскэ хэкум япсы объ­ект­хэм язытет дэгъоу зэрэщытыр гидрометеорологиемкIэ ыкIи тыкъэ­зыу­цухьэрэ чIыопсым лъыплъэгъэнымкIэ Федеральнэ къулыкъум къытыгъ.

Зигугъу къэтшIыгъэ ведомствэм 2019-рэ илъэсым зэрихьэгъэ Iоф­шIэныр зэфихьысыжьыгъ. КъызэрэнэфагъэмкIэ, псым изытет зэрэзэIыхьэрэр псыIыгъыпIэхэм япхыгъ. Специалистхэм къабзэу алъытэгъэ псыхъо заулэ щыI.

— Промышленнэ предприятиехэм псы шIойхэр е икъоу амыгъэ­къэбзагъэхэр псыхъохэм зэрэха­тIупщыхьэхэрэм къэралыгъом ит псы объектхэм язытет лъэшэу ягуаох, — къыщаIуагъ ведомствэм.

Псым изытет купи 5-у агощы — «къабзэм» къыщегъэжьагъэу «шIой дэдэм» щиухыжьэу. КъызэрэнэфагъэмкIэ, Урысыем ишъо­лъырхэм псыхъо къабзэу арытыр мэкIэ дэд, изытет узыгъэрэзэщтхэри бэп.

ГидрометеорологиемкIэ федеральнэ къулыкъум къызэриты­гъэм­кIэ, Темыр-Кавказ федеральнэ шъолъырым ит псыхъохэр зэ­кIэ­мэ анахь къабзэхэу къычIэ­кIыгъ. Темыр Осетиер ыкIи Ставропольер анахь лъэгэпIэ инхэм анэсых. Осетием ит псыIыгъыпIэхэм япроцент 47,1-р «къэбзэ дэдэхэм» ыкIи япсыхъо процент 17-р «макIэу шIойхэм» ахалъытагъэх. Ставрополь краим ит псыхъохэм яна­хьыбэр «макIэу шIойхэм» ащыщых, проценти 5,5-р ары ныIэп «шIой дэдэр».

Гупчэ федеральнэ шъолъырым экологиемкIэ изытет хьылъэ дэд. Московскэ хэкум ипсыхъохэм атет зэIухыпIэхэм япроцент 56,7-р, Вла­димирскэ ыкIи Тульскэ хэкухэм — япроцент 76-р ыкIи 71,4-р шIой­хэм ахалъытагъэх.
Iэшъынэ Сусан.