Зыхьыщтыр шэмбэтым къэнэфэщт

Хэгъэгум футболымкIэ и Кубок къыдэхыгъэным фэбэнэрэ командэхэу финалныкъом нэсыгъэхэр бэдзэогъум и 19-м зэдешIагъэх.

«Урал» — «Химки» — 1:3.
ТекIоныгъэпр «Урал» къыдихыщтэу командэм итренер шъхьаIэу Д. Парфеновыр, ешIакIохэр гугъэщтыгъэх. «Химки» 2019 — 2020-рэ илъэс зэнэкъокъум апэрэ купыр ары зыщешIагъэр, ятIонэрэ чIыпIэр къыдихыгъ. «Урал» ап­шъэрэ купым хэт нахь мышIэми, зэIукIэгъум дэгъоу зыфигъэхьазырын ылъэкIыгъэп.

ЕшIэгъум иапэрэ кIэлъэныкIо «Химки» къэлапчъэм Iэгуаор гъогогъуищэ дидзагъ. Е. Гапон, А. Трошечкиным, А. Полярус хъагъэм Iэгуаор зырызэ радзагъ.

Гуетыныгъэ хэлъэу «Урал» кIэухым ешIагъ, ау текIоныгъэр къыдихыным фэмыхьазырэу къэ­лъэгъуагъ.

«Зенит» — «Спартак» — 2:1

ЗэIукIэгъур гъэшIэгъонэу кIуа­гъэ. А. Дзюбэ пенальтикIэ я 24-рэ такъикъым къэлапчъэм Iэгуаор дидзагъ. «Спартак» иешIакIоу А. Соболевыр ухъума­кIохэм ябэнызэ, шъхьэкIэ Iэгуа­ом еуи, я 45-рэ такъикъым къэ­лапчъэм дидзагъ. Судьям къафыхигъэхъогъэ уахътэр Д. Кузяевым ыгъэфеди, къэлап­чъэм пэблагъэу щытэу хъагъэм Iэгуаор ридзагъ — 2:1.

Пчъагъэм хагъэхъонэу командэхэм амалышIухэр яIагъэх. «Спартак» хэкIыпIэмэ алъыхъу­зэ, ешIэгъур зыщаухыщт уахътэм бэрэ ыпэкIэ илъыгъ, ау гъэхъагъэ ышIынэу инасып къыхьыгъэп.

Ю. Жирковым шапхъэхэр зеукъохэм судьям пенальтир ыгъэу­нэфыгъэп. С. Азмун ухъумакIор къызынэсым, ешIапIэм тефагъ, пенальтир А. Дзюбэ ыгъэцэкIагъ. Судьяр нахь зафэ къэс, ешIэгъум идэхагъи хэхъощт.

Бэдзэогъум и 25-м Екатеринбург «Зенит» ыкIи «Химки» зэдешIэщтых. ТекIоныгъэр къыдэзыхырэм Урысыем и Кубок фагъэшъошэщт.

Урысыем изэнэкъокъу

«Краснодар» — «Динамо» — 0:2.
Бэдзэогъум и 19-м зэдешIа­гъэх.

Къэлапчъэм Iэгуаор дэзыдзагъэхэр: Грулев, Жаозиньо.

Я 30-рэ ешIэгъухэр бэдзэо­гъум и 22-м яIэщтых.