КIэлэцIыкIухэм зыщагъэпсэфыщт

Медицинэм иIофышIэхэм якIэлэцIыкIухэр зыгъэпсэфыпIэ гупчэу «Орленок» зыфиIорэм агъэкIощтых. Республикэм щыщ сабыйхэм Урысые кIэлэцIыкIу гупчэхэу «Орленок», «Артек» зыфиIорэхэм защагъэпсэфынымкIэ ыкIи япсауныгъэ щагъэпытэнымкIэ ищыкIэгъэ Iофтхьабзэхэр зэхащэнхэу АР-м и ЛIышъхьэу КъумпIыл Мурат унашъо ышIыгъ.

Апэрэ кIэлэцIыкIу купэу нэбгырэ 40 хъурэр бэдзэогъум и 17-м «Орленок» кIощт. Ахэм янахьыбэр медицинэм иIофышIэхэм ясабыих. Джырэ уахътэ кIэлэцIыкIухэм медицинэ уплъэкIунхэр арагъэшIых. КъыкIэлъыкIорэ сменэми респуб­ликэм икIэлэеджакIохэм апае путевкэ 40 къаратыщт. Шышъхьэ­Iум «Артек» сабыйхэр агъэ­кIонхэм джырэ уахътэм тегущыIэх.

Республикэм изекIо отрасл анаIэ тырагъэтынэу КъумпIыл Мурат пшъэрылъ къыгъэуцугъ. Бэдзэогъум ар къызэIуахы­жьыгъ. ЗекIохэр къырагъэблэгъэнхэм Адыгеир зэрэфэхьазырыр ауплъэкIунэу межведомственнэ IофшIэкIо куп зэха­щагъ. Респуб­ликэм мы лъэныкъомкIэ Iоф щызышIэрэ организацие 48-м щыщэу 43-р ауплъэкIугъ. Адыгэ Республикэм зекIонымрэ зыгъэпсэфыпIэхэмрэкIэ и Комитет къызэрэщаIуагъэмкIэ, хьакIэщхэм янахьыбэр шапхъэ­хэм адештэх, хэукъоныгъэу къахагъэщыгъэхэр псынкIэу агъэтэрэзыжьыгъэх.

Гъонэжьыкъо Сэтэнай.