Щагу 23-рэ зэтырагъэпсыхьагъ

Проектэу «ШэпхъэшIухэм адиштэрэ къэлэ щыIакIэр гъэпсыгъэныр» зыфиIорэм 2020-рэ илъэсымкIэ игъэцэкIэн къыдыхэлъытагъэу Мыекъуапэ дэт фэтэрыбэу зэхэт унэ 33-мэ къахиубытэрэ щагу 23-мэ язэтегъэпсыхьан епхыгъэ IофшIэнхэр аухыгъэх.

Мыекъопэ къэлэ администрацием ыпашъхьэ щытыгъэ пшъэ­рылъхэр зэкIэ зэшIуихыгъэх, унэ чIэхьапIэхэр агъэцэкIэжьыгъэх, паркхэр зэтыра­гъэпсы­хьагъэх, тIысыпIэхэр, къэзы­гъэнэфырэ пкъыгъохэр агъэуцугъэх, щынэгъончъэным ди-штэу кIэлэцIыкIу ыкIи спорт площадкэхэр агъэпсыгъэх. ЗэкIэмкIи мыщ сомэ миллион 88-м ехъу пэIуагъэхьагъ. Мылъкур бюджет зэфэшъхьафхэм къахагъэкIыгъ.

Къэлэ администрацием къызэрэщаIуагъэмкIэ, IофшIэнхэр заухыгъэ нэуж ахъщэ къафэ­нагъ. Ар зэтегъэпсыхьан Iоф­шIэнхэм апэIуагъэхьащт.

— ЦIыфхэм ящыIэкIэ-псэукIэ нахьышIу шIыгъэнымкIэ щагу­хэм язэтегъэпсыхьан мэхьанэшхо иI. ЩытхъукIэ афэплъэгъу­нэу щыт къэлэдэсхэр мы программэм чанэу зэрэхэла­жьэхэрэр, дизайн-проектхэм яшIынкIэ яшIошIхэр къызэрэраIотыкIы­хэрэр, псэолъэшI IофшIэнхэм яIахь зэрэха­лъхьэрэр. Ахэм яшIуагъэкIэ шэпхъэшIухэм адиштэрэ щыIакIэ дгъэпсын тэлъэкIы. Мы IофшIэнхэр къи­хьащт илъэсми лъыдгъэ­кIо­тэщтых, — къыIуагъ Мые­къуапэ имэрэу Андрей Гетмановым.

Пандемием ыпкъ къикIыкIэ IофшIэнхэр агъэцакIэхэ зэхъум Роспотребнадзорым къыгъэ­нэфэгъэ шапхъэхэр зэкIэ къыдалъытагъэх. Къалэм изэтегъэ­псыхьан зэрэлъыкIуатэрэм ынаIэ тет АР-м и ЛIышъхьэу Къум­пIыл Мурат.