Медальхэм афэбанэх

Хэгъэгум футболымкIэ иапшъэрэ куп щыкIорэ зэнэкъокъур мыгъэ аухы­нымкIэ командэ пэпчъ ешIэгъуи 3 къыфэнагъ.

Я 27-рэ зэIукIэгъухэр

Бэдзэогъум и 7 — 9-м зэрешIагъэхэр зэфэтэхьысыжьых.

«Тамбов» — «Ахмат» — 1:2, «Арсенал» — «Крылья Советов» — 2:4, «Оренбург» — ЦСКА — 0:4, «Зенит» — «Шъачэ» — 2:1, «Спартак» — «Локомотив» — 1:1, «Ростов» — «Уфа» — 1:2, «Урал» — «Динамо» — 2:1, «Рубин» — «Краснодар» — 1:0.

2019 — 2020-рэ илъэс ешIэгъур аухынымкIэ командэхэм ешIэгъу плIырыплI къафэнагъэу «Зенит» апэрэ чIыпIэр къыдихи, дышъэ медальхэр къыфагъэшъошагъэх.

— Яблэнэрэу «Зенит» хэгъэгум ичемпион хъугъэ, — къыIуагъ спорт журналистэу Геннадий Орловым. — ИлъэситIо  зэкIэлъыкIоу «Зенит» апэрэ чIыпIэр къыдихыгъ. Ащ фэдэ гъэхъагъэхэр ышIыщтхэми сшIэгъахэп.

Хэта шIозыхьыщтыр?

2020 — 2021-рэ илъэс зэнэкъокъур джыри рагъэжьагъэп, ау дышъэр зыхьын зылъэкIыщтым игъэкIотыгъэу джырэ уахътэ тегущыIагъэх. Тренер цIэрыIоу Рашид Рахимовыр футбол дэгъоу ешIэщтыгъ, IэкIыб къэралхэм ащашIэ. Ащ зэрилъытэрэмкIэ, «Зенит» дышъэр къэкIощт илъэсым къыдихыщт. Пхъашэу къенэкъокъун, дышъэм фэбэнэн зылъэкIыщтхэм «Краснодар» ащыщ.

Урысыем футболымкIэ и Союз ипрезидентэу Александр Дюковыр «Санкт-Петербург» щыкIогъэ зэхахьэм «Зенит» щыфэгушIуагъ, игъэхъагъэхэм ахигъэхъонэу фиIуагъ.

«Зенит» итренер шъхьаIэу Сергей Семак изэфэхьысыжьхэм ащыхигъэунэфыкIыгъ «Зенит» Урысыем икомандэхэм анахь лъэшэу зэрэщытыр.

Европэм сыда щигъэхъэщтыр?

Урысыем апэрэ чIыпIэр «Зенит» къызэрэщыдихыгъэр дэгъу. Европэм и Кубок фэбэнэным фэхьазыра? А упчIэр бэмэ къаIоу зэхэтэхы. Командэр мылъкум  щыкIэрэп, ешIакIоу къыригъэблэгъэн ылъэкIыщтыр макIэп. Урысыем зэрэщылъэшым фэдэу, Европэм изэнэкъокъухэм гъэхъагъэхэр ащишIынхэу «Зенит тигъэгугъэнэу чIыпIэ ит.

«Спартак» — «Локомотив» зыIокIэм Понсе къэлапчъэм Iэгуаор дидзагъ. «Локомотив» иешIакIоу Алексей Миранчук пенальтикIэ «Спартак» икъэлапчъэ Iэгуаор  дидзи, зэIукIэгъур 1:1-у аухыгъ.

ЕшIэгъур къызэрыкIоу щытыгъэп. «Спартак» итренер шъхьаIэу Тедеско тамыгъэ плъыжьыр судьям къыригъэлъэгъуи, ешIэгъур зэрищэн фимытэу хъугъэ.  «Локомотив» 1:1-у зэрешIагъэм ишIуагъэкIэ ятIонэрэ чIыпIэм нахь зыщигъэпытагъэми, тыжьыныр къыдихын ылъэкIыщтми къэшIэгъуае.

ЦСКА-м аужырэ ешIэгъуищыр къыхьыгъ. «Спартак» 2:0-у, «Ахмат» 4:0-у, «Оренбург» 4:0-у атекIуагъ. Виктор Гончарен-
кэм ЦСКА-м къызегъэзэжьым, командэр иешIакIэ нахьышIоу лъыхъоу фежьагъ. Ухъумэн Iофыгъохэр ыгъэцакIэхэзэ, ыпэкIэ илъыным зэрэпылъым зыкъегъэшъыпкъэжьы.

«Краснодар», «Ростов»…

Медальхэм афэбэнэнхэу мурад зышIыгъэхэ «Краснодар», «Ростов» зичэзыу ешIэгъухэр ашIуахьыгъэх. «Краснодар» «Рубин» зыIокIэм, къэлапчъэм бэрэ дэуагъэми, хъагъэм Iэгуаор зыкIи ридзагъэп. ГухэкIыр «Краснодар» ыпэкIэ лъыкIотэным фэшI амалэу ыгъэфедэрэр зэрэмакIэр ары. Къэлапчъэм  дэощт ешIакIохэр хэушъхьафыкIыгъэхэу къэлъагъохэрэп, М. Сулеймановыр ухъумэн Iофхэм апылъэу ыпэкIэ лъыкIотэным  фэмыхьазырэу уахътэ къыхэкIы.

ЧIэнагъэу «Краснодар» ышIыгъэр къегоощт — медалэу къыдихыщтыр зыми ышIэрэп.

Европэм и Кубок икъыдэхын фэбэнэщтэу «Динамэм» имурадыгъ, ау «Урал» къытекIуагъ. Я 93-рэ такъикъым Павел Погребняк «Динамэм» икъэлапчъэ Iэгуаор дидзагъ. «Динамэр» «Краснодар» дешIэнэу щыт, «Оренбург», «Уфа», «Крылья Советов» — ахэри «Динамэм» IукIэщтых. Я 6-рэ чIыпIэр къыдэзыхыщтыр Европэм и Кубок фэбэнэщтхэм ащыщ хъун ылъэкIыщт.

Ауж къинэхэрэр

Апшъэрэ купым къыхэнэжьынхэм ауж къинэрэ командэхэр фэбанэх. Гугъэр зыми зэрэчIимынагъэм зэнэкъокъур къегъэдахэ. «Крылья Советов» итренер шъхьаIэу Андрей Талалаевыр иIэнатIэ зыIухьагъэм къыщегъэжьагъэу командэм очко пчъагъэу иIэм хегъахъо, ау илъэс ешIэгъум щимыгъэхъагъэр аужырэ  ешIэгъухэм къащихьыжьын ылъэкIыщтмэ къэшIэгъуае.

«Химки» хьазырэп

Москва хэкум икомандэу «Химки» апэрэ купым ятIонэрэ чIыпIэр къыщыдихи, апшъэрэ купым щешIэнэу фитныгъэ иIэ хъугъэ, ау командэр ащ фэмыхьазырэу клубым ипащэхэм къаIуагъ. «Химки» апшъэрэ купым зыхэмыхьэкIэ зы команд ныIэп анахь лъэшхэм якуп къыхагъэкIыщтыр.

«Оренбург», «Крылья Советов», «Ахмат», «Тамбов», «Рубин» — ахэр арых апшъэрэ купым къыхэзынхэмкIэ гумэкIыгъо зиIэхэр.

«Спартак» ипащ

«Спартак» Москва идиректор шъхьаIэу Щамил Газизовыр агъэнэфагъ. НахьыпэкIэ ащ «Уфа» Iоф щишIэщтыгъ.

— СишIэныгъэ хэзгъэхъощт, «Спартак» гъэхъагъэхэр ышIынхэм  сишъыпкъэу сыпылъыщт, — къыIуагъ Щамил Газизовым.

 Хэт тыдэ щыIа?

Я 27-рэ ешIэгъухэм ауж командэхэр чIыпIэу зыдэщытхэм, очко пчъагъэу яIэм гъэзет еджэхэр ащытэгъэгъуазэх.

  1. «Зенит» — 65
  2. «Локомотив» — 50
  3. ЦСКА – 46
  4. «Краснодар» — 45
  5. «Ростов» — 43
  6. «Уфа» — 36
  7. «Урал» — 35
  8. «Спартак» — 33
  9. «Рубин» — 33
  10. «Динамо» — 32
  11. «Арсенал» — 31
  12. «Шъачэ» — 30
  13. «Ахмат» — 30
  14. «Тамбов» — 28
  15. «Кр.Советов» — 27
  16. «Оренбург» — 23.

Я 28-рэ зэIукIэгъухэр

11.07, 16:00

«Арсенал» — «Тамбов»

11.07, 18:30

«Ахмат» — «Зенит»

11.07, 20:30

«Шъачэ» — «Спартак»

12,07, 14:00

«Оренбург» — «Ростов»

12.07, 16:30

«Локомотив» — «Уфа»

12.07, 18:30

ЦСКА — «Рубин»

12.07, 18:30

«Динамо» — «Кр.Советов»

12.07, 20:30

«Краснодар» — «Урал».

Зэнэкъокъу щырыщ къафэнагъэр

Илъэс ешIэгъур аухынымкIэ командэ пэпчъ ешIэгъуищ къыфэнагъэр. Зэнэкъокъур гъэшIэгъон къэзышIырэр медальхэр зыхьыщтхэр, ауж къинэщтхэр къэшIэгъуае зэрэхъугъэхэр ары.

ЕмтIылъ Нурбый.