МашIом нэбгыри 4 къыхахыжьыгъ

Адыгеим игъогу-патруль къулыкъу иинспекторхэу, поли­цием икапитанэу Бэрэтэрэ Алыйрэ старшэ лейте­нантэу ТхьалI Рустамрэ чIылъэм тет псэупIэу машIом зэ­лъишта­гъэм исыгъэхэм IэпыIэгъу афэхъугъэх.

Бэдзэогъум и 7-м чэщым инспекторхэм Мые­къуапэ къулыкъур щахьыщтыгъ. Сыхьатыр 00.30-м адэжь урамэу Гагариным ыцIэ зыхьырэм тет унэм машIом зыкъыщиштагъэу къалъэгъугъ. Полицейскэхэм къулы­къухэм псынкIэу макъэ арагъэIугъ. А уахътэм къыкIоцI унашъхьэр мэшIошхом зэлъикIугъэу стыщтыгъэ ыкIи шIэхэу зэхэтакъоу ыублагъ.

— ГъогурыкIоныр щы­нэгъончъэнымкIэ Къэралыгъо автоинспекцием иIофышIэхэр псэупIэм ыкIоцI цIыфхэр зэрисынхэ ылъэкIыщтым, машIом икъэбар зэрамышIэрэм егупшысэхи IэпыIэгъу афэхъунхэу чъагъэх. А чэщым ныбжь зиIэ нэ­б­гыритIурэ зыныбжь имыкъугъэ ныбжьыкIитIурэ полицейскэхэм унэм къы­ращыгъэх. Инспекторхэр игъом ыкIи псынкIэу зэ­рэзекIуагъэхэм ишIуа­гъэкIэ нэбгыри 4-мэ ящы­Iэныгъэ къызэтырагъэ-
нагъ, — къыщаIуагъ ведомствэм.

Ежь офицерхэу Бэрэтэрэ Алыйрэ ТхьалI Рус­тамрэ зэралъытэрэмкIэ, яIофшIэнкIэ пшъэдэ­кIы­жьэу ахьырэр агъэцэкIагъэу ары.

— Унэм исхэр къит­щынхэу игъо тифэным нэмыкI тегупшысагъэп, — ыгу къэкIыжьы Бэ­рэтэрэ Алый.

МэшIогъэкIуасэхэм акIуачIэкIэ хъугъэ-шIагъэр дагъэзыжьыгъ, ма­шIом зыкъыштэным ушъхьагъоу фэхъугъэр джы зэхафы.