Медальхэм афэбанэх

2019 – 2020-рэ илъэс ешIэгъур апшъэрэ купым хэт футбол коман­дэхэм аухыным фэшI зэIукIэгъоу къафэнагъэр макIэп.

Хэгъэгум изэнэкъокъу командэ 16 хэлажьэ. Дышъэр «Зенит» ыхьыным пэблагъ, нэмыкI медальхэр къыдэзыхыщтхэр, Европэм икубокхэм афэбэнэщтхэр шIэхэу къэнэфэщтхэп.

Зичэзыу ешIэгъухэр

Мэкъуогъум и 30-м ыкIи бэ­дзэо­гъум и 1-м апшъэрэ купым щыкIогъэ зэIукIэгъухэм якIэуххэр зэтэ­гъапшэх.

«Локомотив» — «Крылья Советов» — 1:1, ЦСКА – «Спартак» — 2:0, «Уфа» — «Рубин» — 0:0, «Тамбов» — «Зенит» — 1:2, «Арсенал» — «Ахмат» — 1:3, «Ростов» — «Краснодар» — 1:1, «Шъачэ» — «Динамо» — 1:1.

Аужырэ такъикъхэр гумэкIыгъох

ЕшIэгъу уахътэр аухыфэ «Зенит» текIоныгъэм фэбэнэныр шэнышIу фэхъугъ. «Тамбов» иухъумакIохэм ар къыдалъытагъэп. С. Азмун, А. Дзюбэ, нэмыкI­хэри апэкIэ илъыхэзэ, ухъумакIохэр бэрэ агъэгумэкIыгъэх. ЗэIукIэгъур зыщаухыщт уахътэм «Зенит» къэлапчъэм Iэгуаор дахэу дидзи, 2:1-у «Тамбов» текIуагъ.

ЦСКА-р 1:0-у «Спартак» текIозэ, Никола Влашич аужырэ такъикъым къэлапчъэм Iэгуаор ятIонэрэу дидзи, 2:0-у ЦСКА-м зэIукIэгъур къыхьыгъ.

«Краснодар» Ростов-на-Дону щешIагъ. Я 13-рэ такъикъым «Краснодар» иешIакIохэр апэкIэ илъыгъэх. Олссон ешIапIэм тефэзэ шъхьэкIэ ытыгъэ Iэгуаом Берг лъычъи, хъагъэм ридзагъ — 0:1 пчъагъэр хъугъэ.

«Краснодар» ащ ыуж зигъэ­рэхьатыгъэп. Къэлапчъэм Iэгуаор дидзэнэу амалышIухэр иIа­гъэх. М. Сулеймановыр тIэкIу зэ­рэгужъуагъэм къыхэкIэу хъа— гъэм Iэгуаор дидзэн ылъэкIыгъэп.

ЕшIэгъу уахътэр аухыгъэу судьям къафыхигъэхъогъэ я 5-рэ такъикъыр зыщаухыщтым «Краснодар» иухъумакIохэм ащыщ Iэгуаор ыIэ къытефагъ. Пенальтир И. Поповым ыгъэцэкIагъ. Къэлапчъэм ар зыдаом, М. Сафоновыр, ар «Краснодар» икъэлэпчъэIут, лъхъанчэу быбырэ Iэгуаом лъыIэсыгъ, ау къызэкIидзэжьын ылъэкIыгъэп — 1:1.
Такъикъи 110-м нахьыбэрэ командэхэр зэдешIагъэх. Судьяу В. Машковым зэIукIэгъур зыщаухыщт уахътэр ыгъэунэфын зэримылъэкIыщтыгъэр гурыIогъуаеу къэлъагъощтыгъ.
ЕшIэгъум икIэух дахэ хъугъэп.

Игорь Черевченкэм илъэIу

«Арсенал» иешIэгъухэр мыгъэ шIуахьых, зы текIоныгъ нэмыIэми къыдихыгъэп. «Ахматрэ» «Ар­сеналрэ» Тулэ зыщызэIо­кIэхэм 3:1-у Чэчэным иешIакIохэм текIоныгъэр къыдахыгъ.

ЗэIукIэгъур зэраухыгъэм лъыпытэу «Арсенал» итренер шъхьа­Iэу Игорь Черевченкэр къыкIэлъэIуи, иIэнатIэ IукIыжьыгъ.

Зэтэгъапшэх

1. «Зенит» — 59
2. «Локомотив» — 48
3. «Краснодар» — 45
4. «Ростов» — 42
5. ЦСКА – 40
6. «Спартак» — 32
7. «Уфа» — 32
8. «Динамо» — 32
9. «Шъачэ» — 29
10. «Арсенал» — 28
11. «Урал» — 28
12. «Рубин» — 27
13. «Ахмат» — 27
14. «Тамбов» — 25
15. «Крылья Советов» — 23
16. «Оренбург» — 23.
Я 26-рэ зэIукIэгъухэр
4.07, 16:30
«Динамо» — «Арсенал»
4.07, 18:30
«Спартак» — «Тамбов»
4.07, 18:30
«Крылья Советов» — «Ростов»
4.07, 20:30
«Локомотив» — «Шъачэ»
4.07, 20:30
«Ахмат» — ЦСКА
5.07, 16:30
«Уфа» — «Урал»
5.07, 18:30
«Рубин» — «Оренбург»
5.07, 20:30
«Краснодар» — «Зенит»

«Зенит» текIощта?

«Зенит» «Краснодар» зытекIокIэ апэрэ чIыпIэр хэгъэгум изэнэкъокъу къыщыдихыщт, дышъэ медальхэр фагъэшъошэщтых.

«Краснодар», емыгъэхь!

Европэм и Кубок «Краснодар» занкIэу фэбэнэным фэшI Урысыем изэнэкъокъу ятIонэрэ чIыпIэр къыщыдихын фае. ЕшIэгъум еплъынхэу Адыгэ Респуб­ликэм нэбгырабэ икIыщт. «Краснодар» «Зенит» текIонэу, тигъэгушIонэу фэтэIо. Командэхэм футбол дахэ къагъэлъэгъонэу тафэлъаIо.