АР-м хэгъэгу кIоцI IофхэмкIэ и Министерствэ къеты

Шъэожъыем IэпыIэгъу фэхъугъэх

АР-м хэгъэгу кIоцI IофхэмкIэ иминистрэу, полицием игенерал-майорэу Владимир Алай фэкIорэ рэзэныгъэ тхылъ бэмышIэу ведомствэм къыIэкIэхьагъ. Мыекъуапэ щыпсэурэ Евгений Митрошкиныр Адыгеим и Къэралыгъо автоинспекцие икъулы­къушIэхэм ясэнэхьаткIэ IэпэIэсэныгъэшхо къызэрэзхагъэфагъэм фэшI зэрафэразэр письмэмкIэ къыреIотыкIы.

2020-рэ илъэсым мэкъуогъум и 11-м гъогу-патруль къулыкъум иIофышIэхэу, полицием истаршэ лейтенантэу СтIашъу Руслъанрэ полицием илейтенантэу Владимир Александровымрэ Мыекъуапэ икъыдэхьэгъу къулы­къур щахьызэ, IэкIыбым къыщашIыгъэ автомобилым иводитель гумэкI зэрэхэфагъэр къапшIэу къыIулъэдагъ.

«Хъулъфыгъэр зэрэгумэкIырэмкIэ къыдгурыIуагъ гузэжъогъу чIыпIэ зэрифагъэр ыкIи IэпыIэгъу зэрищыкIагъэр. Хъулъфыгъэм игъусэ ишъхьэгъуси сабыир ыIыгъэу машинэм къикIыгъ. Илъэси 3 зыныбжь шъэ­ожъыем иакъыл щыуагъэу, зыкъымышIэу янэ ыIы­гъыгъ ыкIи ар сымэджэщым псынкIэу нэгъэсын фэягъэ», — ыгу къэкIыжьы Владимир Александровым.

КIэлэцIыкIум янэ-ятэхэм къаIотагъ ящагу дэтыгъэ чэум шъэожъыер зыдэпшыем ащ пэгъунэгъоу рыкIорэ гъучIычым теIаби, электрическэ токыр къызэреуагъэр.
Полицием иIофышIэхэр псынкIэу дежурнэ частым теуагъэх ыкIи бзылъфыгъэм шъэожъыер ыIыгъэу патруль машинэм рагъэтIысхьи, макъэ къэзыгъэIурэ хэушъхьафыкIыгъэ пкъыгъор хэгъэнагъэу псынкIэу сымэджэщым нагъэсыгъэх.

Ащ нэсыфэхэ, инспекторэу СтIашъу Руслъан шъэ­ожъыем янэ еушъыизэ ыгу ыухъумагъ ыкIи шъэожъы­ем апэрэ медицинэ IэпыIэгъур ригъэкIыгъ.

«Адыгеим хэгъэгу кIоцI къулыкъум зисэнэхьат хэшIыкIышхо фызиIэхэм ямызакъоу, гукIэгъулэ къулыкъушIэхэри щэлажьэх. IэпыIэгъу ыкIи зишIогъэшхо къытэзыгъэкIыгъэхэ къулыкъушIэхэр мыхъугъагъэхэмэ, къэшIэгъуае тишъэожъыеу Матвей ипсауныгъэ къырыкIощтыгъэр», — къыщеIо рэзэныгъэ письмэм.

Мы хъугъэ-шIагъэм ыуж мэфэ заулэ тешIагъэу, щынэгъончъэным ишапхъэхэр къызфагъэфедэхэзэ, инспекторхэр Митрошкинхэм яунагъо еблэгъагъэх, шъэожъыем ипсауныгъэ изытет зыщагъэгъозагъ ыкIи пхъэшъхьэ-мышъхьэхэмрэ IэшIу-IушIухэмрэ шъэожъы­ем фащагъэх.

Водитель нэбгыри 9-р къаубытыгъ

Зыгъэпсэфыгъо мафэхэм, мэкъуогъум и 20 ыкIи и 21-м Адыгеим игъогухэм хъу­гъэ-шIэгъи 3 къатехъухьагъ, ахэм апкъ къикIэу нэбгыри 7-мэ шъобжхэр атещагъэхэ хъугъэ. Джащ фэдэу мы уахътэм зыпарэми лые зыримыхыгъэ гъогу хъугъэ-шIэгъэ 18 агъэунэфыгъ. Нахьыбэу ахэр зыщагъэунэфыгъэхэр Тэхъутэмыкъое ыкIи Теуцожь районхэр арых.

Адыгеим и Къэралыгъо автоинспекцие къызэритыгъэмкIэ, хъугъэ-шIагъэхэм лъапсэ афэхъугъэр къызэкIакIохэзэ зэрэзэутэкIыгъэхэр ыкIи машинэхэм азыфагу илъ гъогууанэр зэраукъуагъэр арых. ГъогурыкIоным ишапхъэхэр аукъуагъэу хъугъэ-шIэгъэ 578-рэ къыхагъэщыгъ. Ешъуагъэхэу автомобилыр зезыфэщтыгъэхэ водитель нэбгыри 9-мэ административнэ пшъэдэкIыжь атыралъхьагъ.

Джащ фэдэу лъэсрыкIо нэбгырэ 60-мэ алъэныкъокIэ административнэ протоколхэр зэхагъэуцуагъэх. Автоинспекцием иIофышIэхэм водительхэм зафагъазэ сакъыныгъэ къызхагъэфэнэу ыкIи гъогурыкIоным ишапхъэхэр амыукъонхэу.

Нэбгыри 5-мэ лые арихыгъ

Мэкъуогъум и 21-м чэщым, сыхьатыр 3-м такъикъи 10-кIэ ежьагъэу, Мыекъуапэ иурам­хэу Жуковскэмрэ Первомайскэмрэ зыщызэуалIэхэу нэфрыгъуазэр зытетым автомобилитIу щызэутэкIыгъ.

ПэшIорыгъэшъэу зэрагъэунэфыгъэмкIэ, илъэс 22-рэ зыныбжь водителыр нэфрыгъуазэм ишапхъэхэр ыукъо­хи, гъогум зытелъадэм, илъэс 30 зыныбжь водителэу ВАЗ-м кIэрысыгъэм еутэкIыгъ. Мы хъугъэ-шIагъэм ыпкъ къикIэу водителитIуми, ащ къадисыгъэхэ нэбгырищыми шъобжхэр атещагъэхэ хъугъэ.

Полицием икъулыкъушIэхэм хъугъэ-шIагъэм лъапсэ фэхъугъэр зэрагъашIэ.

Сомэ миллион фэдиз ашIуаты­гъугъ

Мэкъуогъум и 12-м къыщегъэжьагъэу и 17-м нэс гъэпцIагъэ зыхэлъ бзэджэшIагъэ цIыфхэм адызэрахьагъэу Адыгэ Респуб­ликэм хэгъэгу кIоцI IофхэмкIэ икъулыкъу­хэм тхыгъи 6 къаIэкIэхьагъ. Зэкъо­дзакIохэм гъэпцIагъэ зыхэлъ а зы шIыкIэр ренэу къызфагъэфедэ.

ГущыIэм пае, банкым икорпоратив номерэу 8 495..,-м ехьщырэу къыригъажьэрэмкIэ бзэджашIэр илъэс 53-рэ зыныбжь бзылъфыгъэу Красногвардейскэ районым щыпсэурэм фытеуагъ. Банкым иIофышIэу гуригъа­Iуи, бзылъфыгъэм исчет цыхьэшIэгъунчъэу зэрэщытыр къыриIуагъ. Адрэм ар ышIошъ хъуи, гъэпцIакIом къыриIорэм тетэу зекIуагъэ. Нэужым ащ икартэ илъы­гъэ сомэ мин 29-р бзэджашIэм рихыгъэу ыгъэунэ­фыгъ.

Мобильнэ телефоныр къызфагъэфедэзэ Тэхъутэмыкъое районым мыщ фэдэ бзэджэшIэгъитIу щызэрахьагъ. IофитIумкIи зэрарыр сомэ мин 800-м ехъу.

ЫпшъэкIэ къызэрэтIуагъэм фэдэу, Мыекъуапэ щыщ бзылъфыгъитIуми гъэпцIакIом цыхьэ фашIи, сомэ мин 80 фэдиз зэхэтэу ашIокIодыгъ.

Ащ нэмыкIэу Интернетым иамалхэр къызфагъэфедэхэзэ бзэджэшIагъэхэр зэрахьэх. ЩакIоу аIозэ мэкъэгъэIухэр сайтхэм къарагъахьэх, нэужым цIыфхэр агъэделэх. ГущыIэм пае, Мыекъуапэ щыпсэурэ бзылъфыгъэу курэжъые зыщэфын гухэлъ зиIагъэм сомэ мини 5 шIуахьыгъ. Курэжъыем тефэрэ ахъщэр щакIом фыригъахьи, товарыр къызырамытыжьыр ары ныIэп бзылъфыгъэм хэбзэухъумэкIо къулыкъухэм зызафигъэзагъэр. ГъэпцIакIохэм якъычIэгъэщын епхыгъэ хъугъэ-шIагъэхэмкIэ Адыгеим иполицие Iофтхьабзэхэр зэрехьэх.

Мэфи 6-м къыкIоцI гъэпцIакIохэм сомэ миллион фэдиз цIыфхэм ашIуатыгъугъ.

АР-м хэгъэгу кIоцI IофхэмкIэ и Министерствэ цIыфхэм агу къегъэкIыжьы телефонымкIэ къараIогъэ къэбарыр ашIошъ амыгъэхъунэу, амышIэрэ цIыфым цыхьэ фамышIынэу ыкIи гъэпцIакIохэм зарамыгъэгъэ­делэнэу.

Iофтхьабзэхэр адызэрахьагъэх

Къэралыгъо автоинспекцием икъулыкъу­шIэхэм Мыекъопэ районым ит псэупIэхэм ящагухэм кушъхьэфачъэмкIэ къащызы­чъыхьэхэрэ кIэлэцIыкIухэм пэшIорыгъэшъ Iофтхьабзэхэр адызэрахьагъэх.

КIэлэцIыкIухэм агу къагъэкIыжьыгъ кушъхьэфа­чъэмкIэ гъогум узэрэщызекIощтым пылъ шапхъэхэр, анахьэу анаIэ зытырагъэтыгъэр лъэсрыкIо зэпырыкIыпIэхэм адэжь гъогурыкIоныр щынэгъончъэу щытыныр, нэмыкIхэри.

Ащ нэмыкIэу кушъхьэфачъэмкIэ узекIоным шап­хъэу пылъхэр къизыIотыкIырэ тхьапэхэр кIэлэцIыкIухэм афагощыгъэх. Ащ итхагъэх ар зыгъэIорышIэхэрэм шъобжхэр атещагъэхэ мыхъунхэм фэшI ашIэн фаехэр.

Къэзыгъэхьазырыгъэр КIАРЭ Фатим.