ГукIэгъуныгъэм ипэгъокIэу

Зэпахырэ узэу дунаир зэлъызыкIугъэм илъэхъан пенсионерхэм, кIэлэцIы­кIу ибэхэм алъыплъэнэу пшъэрылъ зыштагъэхэм ахъщэ IэпыIэгъоу афагъэ­нэ­фагъэр афитIупщынэу УФ-м ПенсиехэмкIэ ифонд и Къутамэу АР-м щыIэм ригъэжьагъ.

Мэзищыр, мэлылъфэгъу, жъоныгъокIэ, мэкъуогъу мазэхэр, ары ар къызатыщтыр, сомэ 12130-рэ мэхъу. ЦIыфыр зылъыплъэрэ пэпчъ ащ фэдиз къы­фэкIощт.

Сэкъатныгъэ зиIэу, нэжъ-Iужъэу, кIэлэцIыкIу ибэу е лъыплъэн имыIэу къэнагъэу социальнэ организацием чIэсыр ыIы­гъынэу зэзыщэлIэжьыгъэм, охътэ гъэнэфагъэм лъыплъэнэу зыштагъэм мы ахъщэ тедзэр къыратынэу къытефэ. Ащ пае чъэпыогъум и 1-р къэмысызэ къэралыгъо фэIо-фашIэхэм япортал, ПенсиехэмкIэ фондым ичIыпIэ органхэм е МФЦ-м лъэIу тхы­лъыр ащитын фае. Нэ­мыкI ыгъэхьазырынэу ищыкIагъэп. Субъектым ихэбзэ органхэм агъэпсыгъэ реестрэмкIэ ахъщэ IэпыIэ­гъур къызэратыщтхэр агъэ­нафэх.

Реестрэр нэшэнэ гъэнэфагъэ иIэу зэрэгъэпсыгъэм къыхэкIыкIэ, цIыфым лъэIу тхылъитIу ытын фаеу мэхъу. Ащ ыцIэ, СНИЛС-р, ителефон, банкым щыриIэ счетэу ахъщэр къызэра­гъэхьащтыр ритхэнхэу щыт. Тхылъым IофшIэгъу мэфи­тфырэ хаплъэх, мэфищым къыкIоцI ахъщэр къа­тIупщы.

ЗыгорэкIэ ахъщэ тыныр къыфэкIонэу къытемыфэу алъытагъэмэ, ащ ушъхьагъоу фэхъугъэм щагъэгъо­зэщт. Тхылъыр къэзыты­гъэм ыцIэ реестрэм хэмытымэ е къыритхагъэхэр мытэрэзхэмэ ары ащ къы­темыфэу залъытэрэр.

ЦIыфым нэмыкI социальнэ IэпыIэгъу къыратын зыхъукIэ, мы ахъщэ тедзэр къыдалъытэрэп. Ипсауныгъэ изытет ыпкъ къикIэу Iоф ышIэн амал зимыIэм зэрэлъыплъэрэм фэшI непэ сомэ 1200-рэ компенса­циеу е мазэ къэс ахъщэ тынэу сомэ 10000 къызэратыхэрэр мы социальнэ IэпыIэгъум къыхиубытэ­хэрэп.