КъызэIуахыным фэхьазыр

Адыгеим и ЛIышъхьэу КъумпIыл Мурат мыл Ор­дэунэу «Ошъутен» зы­фиIорэм тыгъуасэ щыIагъ ыкIи мыр къызэIуа­хыным зэрэфэхьазырым зыщигъэгъозагъ.


Шъугу къэдгъэкIыжьын, федеральнэ программэу «Спортыр — щыIэныгъэм ишапхъ» зыфиIорэм къыды­хэлъытагъэу объектыр агъэ­псыгъ, зэкIэмкIи ащ сомэ миллион 262-м ехъу пэIуа­гъэхьагъ. Аужырэ шапхъэ­хэм адиштэу зэтырагъэпсы­хьэгъэ объектым чIыпIэ 360-рэ къыдыхэлъы­тагъ, спорт­сменхэм, мыщ къе­кIо­лIэрэ цIыфхэм загъэ­сэ­нымкIэ амалышIухэр щыIэх.

АР-м физическэ культурэмкIэ ыкIи спортымкIэ и Комитет итхьаматэу Дэ­­гужъые Мурат къызэри­IуагъэмкIэ, хоккеир зикIа­сэхэу республикэм щы­псэухэрэм илъэс заулэкIэ узэкIэIэбэжьымэ Федерацие зэхащагъ, ащ нэбгырэ 25-рэ хэхьагъ.

Мы мафэм спорткомплексым иаренэ къытехьагъэх ыкIи яIэпэIэсэныгъэ къагъэлъэгъуагъ Адыгеим хоккеимкIэ и Федерацие ипащэу КIыкI Ахьмэдрэ спортсмен ныбжьыкIэу Шъхьэлэхъо Тимуррэ.

АР-м и ЛIышъхьэ ахэм гущыIэгъу афэхъугъ, Адыге­им щыщ спортсмен ныбжьыкIэу къалэу Воскре­сенскэ иклубэу «Химик» зыфиIорэм щешIэрэм игъэ­хъагъэхэм защигъэгъозагъ.

— Мы аренэм ныбжьыкIэхэр къызэрищэлIэнхэу, ащ иамалкIэ япсауныгъэ агъэпытэным анаIэ тырагъэтынэу тыщэгугъы. Мы аужырэ илъэсхэм шъолъы­рым испорт инфраструктурэ зэхъокIыныгъэшIухэр фэхъугъэх. Джы проектэу «Спортыр — щыIэныгъэм ишапхъ» зыфиIорэм ишIуа­гъэкIэ хоккеим ыкIи фигурнэ катанием Адыгеим защаушъомбгъущт, ама-лы­шIухэр аIэкIэлъхэ хъущт, — къыIуагъ КъумпIыл Мурат.