ЯIофшIэн рагъэжьэжьыгъ

Пыдзэфэ пытэхэм ядэщын фэгъэзэгъэ шъолъыр операторым иофисхэри, нэмыкIыбэхэм афэдэу, коронавирусым ыпкъ къикIыкIэ зэфэшIыгъагъэх. Джы мары мэкъуогъум и 1-м къыщыублагъэу ахэр къызэIуахыжьыгъэх, цIыфхэр арагъэблагъэх.

Офисхэм яIофшIэн падзэжьыным пае санитарнэ шапхъэу агъэцэкIэн фаехэр Роспотребнадзорым къыгъэнэфагъ. Ахэм къащыдэлъытагъэу цIыфыр вирусым щызыухъумэрэ пстэури «ЭкоЦентрэм» испециалистхэм къаIэкIигъэхьагъ. IофшIэгъу сыхьатхэм зытIо-зыщэ кабинетхэм жьы ачIагъахьэ, къатхьакIых.

ЦIыфэу къяуалIэхэрэм маскэ аIулъын, Iалъэхэр апылъынхэ фае. Ар мы уахътэм шIокI зимыIэ Iофэу щыт. Ащ имызакъоу, чэзыум ежэхэрэм метрэрэ ныкъорэ нахь мымакIэу азыфагу илъэу щытынхэ е щысынхэ фае. Ащ пае шъхьадж зыдэщытыщтыр агъэнэфагъ, ахэм ашIокIхэ хъущтэп.

Офисхэм нахьыпэрэ графикым тетэу Iоф ашIэ, зэзэгъыныгъэхэр зэрашIыщтыгъэхэр, счетхэм арытыр зэрэзэблахъущтыгъэр, нэмыкIэу зэшIуахыщтыгъэхэр зытетыгъэм тетэу къэнэжьыгъэх. Джащ фэдэу пэIудзыгъэ шIыкIэм тетэуи специалистхэм цIыфхэм Iоф адашIэ. Региональнэ операторым иэлектроннэ адреси, телефонхэри хэкIыр зэрэIуащырэм ыуасэ зэрыт тхылъым итхагъэх, интернет нэкIубгъоу https://adygeya.clean-rf.ru зыфиIорэми ибгъотэщтых.

Офисхэм яадресхэри шъугу къэтэгъэкIыжьых: къалэу Мыекъуапэ, урамэу Пионерскэр 297-рэ, поселкэу Яблоновскэр, урамэу Школьнэр 10/1.

ООО-у «ЭкоЦентрэм» и Адыгэ шъолъыр къутамэ ипресс-къулыкъу.