Гъогухэр зэтырагъэпсыхьэх

«Щынэгъончъэ ыкIи шэпхъэшIухэм адиштэрэ автомобиль гъогухэр» зыфиIорэ лъэпкъ проектым къыдыхэлъытагъэу гъэсэныгъэм иучреждениехэм якIурэ гъогухэр Урысыем ишъолъыр 83-мэ мы илъэсым ащагъэцэкIэжьыщтых. ПстэумкIи километрэ 1327-мэ IофшIэнхэр ащыкIонэу агъэнафэ. Зэтырагъэпсыхьан фэе псэолъэ 826-м инахьыбэм  илъэсыкIэ еджэгъур къэмысызэ гъэцэкIэжьынхэр ащаухыщтых.

Гъогум щынэгъончъэу щызекIонхэр лъэпкъ проектым ипшъэрылъ анахь шъхьаIэхэм ащыщ. Гъогу зэпырыкIыпIэхэр гъэкIэжьыгъэнхэм, нэфрыгъуазэхэр, гъэсэныгъэм иучреждениехэм гъогу тамыгъэхэр ащыгъэуцугъэнхэм япхыгъэ IофшIэнхэр шъолъырхэм зэкIэми ащэкIох.

ГъэцэкIэжьынхэр зыщашIыщт гъогухэм якъыхэхын общественностым илIыкIохэр къыхэлэжьагъэх. Ахэм яшIошI къыраIотыкIыным мэхьанэшхо иI, сыда пIомэ лъэпкъ проектым пшъэрылъ шъхьаIэу иIэр — цIыфхэм ящыIэкIэ-псэукIэ нахьышIу шIыгъэныр ары. Ащ къыхэкIэу пстэуми апэу социальнэ мэхьанэ зиIэ учреждениехэм якIурэ шъолъыр ыкIи чIыпIэ мэхьанэ зиIэ гъогухэм гъэцэкIэжьын IофшIэнхэр ащарагъэжьагъэх.

Мыекъуапэ игурыт еджапIэу N 16-м екIурэ урамэу Свердловым, кIэлэцIыкIу IыгъыпIэу «Жемчужина» зыфиIорэм блэкIырэ гъогоу Димитровым ыцIэ зыхьырэм гъэцэкIэжьынхэр ащаухыгъэх. Джащ фэдэу псэупIэу Яблоновскэм дэт гурыт еджапIэу N 5-м  блэкIырэ гъогуми IофшIэнхэр щэкIох.

ГъэцэкIэжьын IофшIэнхэм адакIоу нэфрыгъуазэхэм ягъэкIэжьыни лъэплъэх. Социальнэ мэхьанэ зиIэ объектхэр зыдэщыт чIыпIэхэр щынэгъончъэнхэм мэхьанэшхо иI.

— Зыщыдгъэгъупшэ мыхъущтыр автомобильхэм акIэрысхэм ямызакъоу лъэсрыкIохэми къалэр ашIогупсэфэу щытын зэрэфаер ары. Димитровым ыцIэ зыхьырэ урамым къыпэIулъ лъэсрыкIо гъогум гъэцэкIэжьынхэр щыкIуагъэх. Гъогу зэпырыкIыпIэхэм ыкIи общественнэ транспортыр къызщыуцурэ чIыпIэхэм анахьэу анаIэ атырагъэтыгъ. КIэлэцIыкIу IыгъыпIэм сабыйхэр зыщэрэ ны-тыхэм зэхъокIыныгъэхэм псынкIэу анаIэ атырадзэщт ыкIи ягуапэ хъущт, — къыщаIуагъ къэлэ администрацием.

Гъонэжьыкъо Сэтэнай.