Лъэпкъ проектхэр ыкIи къэралыгъо программэхэр

ЦIыфхэм ящыIэкIэ-псэукIэ нахьышIу шIыгъэным фытегъэпсыхьэгъэ лъэпкъ проектхэм ыкIи къэралыгъо программэхэм ягъэцэкIэн Адыге­им щылъагъэкIуатэ.

Мыщ дэжьым анахьэу анаIэ зытетыр къуаджэм хэхъоныгъэ ышIыныр ары. Къэралыгъо программэу «Къоджэ чIыпIэхэм хэхъоныгъэ ашIыныр» зыфиIорэм къыдыхэлъытагъэу республикэм инженернэ коммуникациехэр щызэтырагъэ­псыхьэх, социальнэ псэолъа­кIэхэр ашIых, къуаджэм дэс унэгъо ныбжьыкIэхэм ыкIи спе­циалистхэм псэукIэ амалэу яIэр нахьышIу ашIы.

Мы программэм къыдыхэ­лъытэгъэ Iофтхьабзэхэм зэу ащыщ Шэуджэн районым икъу­тырэу Семено-Макаренскэм километри 3,5-рэ зикIыхьэгъэ газрыкIуапIэу щашIырэр. Зэра­гъэнэфагъэмкIэ, мы илъэсым мэкъуогъум объектыр атыщт, ар ухыгъэ зыхъукIэ муниципалитетым гъэстыныпхъэ шхъуан­тIэр къызэрэIэкIахьэрэр проценти 100 хъущт. Непэрэ мафэм ехъулIэу мы гурыт къэ­гъэлъэгъоныр шъолъырымкIэ процент 77,1-рэ мэхъу.

Программэм игъэцэкIэн къы­дыхэлъытагъэу мы илъэсым газрыкIопIэ километрэ 71,4-рэ ашIынэу щыт, 2019-рэ илъэсым егъэпшагъэмэ, а пчъагъэр фэди 7-кIэ нахьыб.

Джащ фэдэу псырыкIопIэ километрэ 13, гъогу километри 7,5-рэ, Красногвардейскэ районым культурэм иунитIу, Джэджэ районым зы фельдшер-мамыку IэзапIэ, Теуцожь районым физкультурнэ-псау­ныгъэр зыщагъэпытэрэ парк цIыкIу ащашIынхэу программэм къыдыхэлъытагъ. Ащ нэмыкIэу Кощхьэблэ, Мыекъопэ ыкIи Шэуджэн районхэм якъоджэ чIыпIэхэр зэтырагъэпсыхьанхэу проект 12 щыI. Унэгъо 11-мэ псэукIэ амалэу яIэхэр на­хьышIу ашIынхэ алъэ­кIыщт.

Программэм ыпэкIэ хэмы­тыгъэу кIэу къыхэхьагъэри ма­кIэп. ГущыIэм пае, километри 4 зикIыхьэгъэ электрическэ рыкIуапIэ Адыгэкъалэ щагъэ­псыщт, Мыекъопэ районым ит культурэм иучреждении 4-мэ, АдыгэкъалэкIэ зым игъэкIотыгъэ гъэцэкIэжьынхэр арашIы­лIэщтых. Джащ фэдэу медицинэм иучреждениехэм язэтегъэпсыхьанкIэ, ящыкIэгъэ ав­тотранспортыр, оборудованиер ягъэгъотыгъэнымкIэ Iоф­шIэныр лъагъэкIотэщт. КIэлэцIыкIу IыгъыпIи 3-м игъэкIотыгъэ гъэцэкIэжьынхэр ащыкIощтых, Мыекъопэ районым игурыт еджэпIи 8-мэ автобусхэр къафащэфыщтых.

— Непэ Iофхэм язытет хьылъэу щыт нахь мышIэми, лъэпкъ проектхэм ыкIи къэралыгъо программэхэм ягъэцэкIэн мэхьанэшхо етэты. Псэуа­лъэхэр нахь псынкIэу тшIынхэ ыкIи уахътэу дгъэнэфагъэм ехъулIэу ттынхэ фае. Ащ ишIуагъэкIэ къэкIорэ илъэсым телъытэгъэ лимитхэм ягъэфедэн нахь псынкIэу тыфежьэн тлъэкIыщт, — къыIуагъ Адыгеим и ЛIы­шъхьэу КъумпIыл Мурат.

ТХЬАРКЪОХЪО Адам.