Унашъор аштагъэгоп

Урысыем волейболымкIэ изэнэкъокъу хэлэжьэрэ командэхэу апшъэрэ купэу «Б-м» хэтхэм 2020 – 2021-рэ илъэс ешIэгъум зыфагъэхьазыры.


Мыекъопэ «Динамо-МГТУ-м» итренер шъхьаIэу, Адыгэ Респуб­ликэм изаслуженнэ тренерэу Павел Зборовскэм къызэрэтиIуа­гъэу, тиешIакIохэу Къошк Руслъан, Никита Турсковым, Юрий Пичуевым, нэмыкIхэм хэушъхьафыкIыгъэу Iоф зыдашIэжьы. Командэр зэрэугъоижьыгъэгоп.

Илъэс ешIэгъур апшъэрэ купым зыщырагъэжьэщтым Москва щытегущыIэнхэу щытыгъ, ау уахътэр зэблахъугъ. Мэкъуогъум и 15-м Урысыем волейболымкIэ и Федерацие изэхэсыгъо унашъоу щаштэщтым тежэ.

Купым командэ пчъагъэу щешIэщтыр, зэнэкъокъур зэрэкIощт шIыкIэр, нэмыкI Iофыгъохэри зэхэщэкIо купым ыгъэунэфыщтых.