Гъэтхасэхэм япхъын аухыгъ

Зэпахырэ узэу дунаир зэлъызыкIугъэм зи­Iоф­шIэн къызэтыримыгъэуцуагъэхэм чIыгу­лэжь­хэ­ри ащыщых.

Коронавирусым зызэриушъом­бгъурэм Iофыгъуабэ къыхьыгъэ нахь мышIэми, гъэтхасэхэм яхэлъхьанкIэ ар пэрыохъу афэ­хъугъэп.

Адыгеим ичIыгулэжьхэм пстэумкIи гъэтхэсэ лэжьыгъэу гектар 102657-рэ мыгъэ халъхьанэу агъэнэфэгъагъ. АР-м мэкъу-мэщымкIэ и Министерствэ тызэрэщигъэгъозагъэмкIэ, ахэм япхъын аухыгъ. Вирусым зимыушъомбгъуным фытегъэ­псыхьэгъэ санитарнэ шэпхъэ пстэури агъэцакIэзэ игъом лэжьыгъэр чIыгум рагъэкIугъ.

Зэрэхабзэу, тыгъэгъазэм анахьыбэу рагъэубытыгъ. Ары пакIошъ, муниципальнэ обра­зованиехэм ащыщхэм гухэлъэу яIагъэм зышIуагъэкIым, пстэумкIи республикэм щагъэнэфэ­гъэгъэ гектар 52203-м рагъэ­хъуи 55162-рэ апхъыгъ. БлэкIыгъэ илъэсым егъэпшагъэмэ, ар гектар 7680-кIэ нахьыб.

Лэжьыгъэ чылапхъэ ашIыщт натрыфым ятIонэрэ чIыпIэр еубыты. ПстэумкIи гектар 23991-рэ халъхьагъ. Джащ фэ­дэу зэнтхъ гектар 1136-рэ, гъэ­тхэсэ хьэу 384-рэ, былымIус ашIыщт натрыфэу, уц зэ­фэшъхьафэу гектар 2363-рэ апхъыгъ, хэтэрыкIхэр 434-м ехъух, нашэм, хъырбыдзым ыкIи къэбжъыем гектар 523-рэ зэ­кIэм­кIи арагъэубытыгъ.

Илъэс къэс Адыгеим пынджэу щалэжьырэм хагъахъо. Мары мыгъэ гектар 9559-рэ апхъыгъ. Ар блэкIыгъэ илъэсым егъэпшагъэмэ, 500-м ехъукIэ нахьыб. Мы культурэм анахь зыщыпылъхэр Тэхъутэмыкъое районыр ары. Ащ ипынджлэжьхэм агъэ­нэфэгъэгъэ гектар 6254-м рагъэхъуи 6464-рэ халъхьагъ.

Ахэм ауж итых Красно­гвардейскэ районым ипынджлэжьхэр. Коронавирусым мы муниципальнэ образованиер къин чIыпIэ ридзагъэ нахь мы­шIэми, гъэтхэсэ лэжьыгъэу агъэ­нэфэгъагъэм фэдиз халъхьагъ. Пынджэу мыщ щапхъыгъэр гектар 2260-рэ мэхъу.

Джащ фэдэу Теуцожь районым — 230-рэ, Шэуджэн райо­ным — 605-рэ пынджэу ащапхъыгъ.

ТичIыгулэжьхэр зыгъэохъугъэ закъор ощхыр ары. Ащ ыпкъ къикIыкIэ агъэнэфэгъа­гъэм ма­кIэу, ау къыщызгъэкIагъэхэр муниципальнэ образова­ниехэм ахэтых. Арэу щытми, халъхьагъэр хэзыгъэ имыIэу къэхъумэ, лэжьыгъэ бэгъуагъэ зэрэIуахы­жьыщтым яцыхьэ телъ.

ХЪУТ Нэфсэт.