Псыр икъоу аIэкIэхьаным фытегъэпсыхьагъ

Селоу Красногвардейскэм щыпсэухэрэм псыр зэраIэкIахьэрэм изытет нахьышIу шIыгъэным фэшI мы илъэсыр екIыфэ псыугъоипIэ афашIыщт.

Мы псэупIэм иурамэу Чапаевым ыцIэ зыхьырэм щагъэпсырэ псыугъоипIэр лъэпкъ проектэу «Экология» зыфиIорэм ипрограммэу «Псы къабзэм» къыдыхэлъытагъ.

— ХэгъэунэфыкIыгъэн фае, Адыгеим и ЛIышъхьэу КъумпIыл Мурат пшъэрылъ шъхьаIэу къытфигъэуцугъэхэм ащыщ шъолъырым иэкологическэ зытет на­хьышIу шIыгъэныр, — къыщаIуагъ Красногвардейскэ район администрацием.

Объектэу агъэпсырэм ишIуагъэкIэ район гупчэм щыпсэухэрэр зашъохэрэ псы къабзэм ыкIуачIэ нахь лъэш хъущт. Мы уахътэм IофшIэныр зыщыкIорэ чIыпIэм электричествэр ращэлIагъ, псыр къызыщычIащыщт гъуанэр ашIы. ПстэумкIи проектым къыдыхэлъытагъ псыр зэры­хъощт башнэм ишIын ыкIи псы къычIэщыпIитIу убырыугъэнхэр. IофшIэнхэр мы илъэсым ыкIэм нэс аухынхэу агъэнафэ. Проектым сомэ миллион 11,7-рэ пэIу­хьащт.

Iэшъынэ Сусан.