Ермэлыкъхэр къызэIуахыжьыщтых, транспортыр атIупщыжьыщт

Зэпахырэ узэу дунаир зэлъызыкIугъэм пэшIуекIорэ Iофтхьабзэхэм къадыхэлъытагъэу бэдзэршIыпIэхэр зэрэзэфашIыгъэхэм дакIоу, ермэлыкъхэм язэхэщэни Адыгеим къыщагъэуцугъагъ.


Мазэрэ ныкъорэ фэдизым Iоф амышIагъэу, мы тхьамафэм икъихьагъухэм бэдзэршIыпIэхэм яIофшIэн рагъэжьэжьынэу фитыныгъэ аратыгъ. Джы мары мы шэмбэт мафэу къэблагъэрэм, жъоныгъуакIэм и 23-м, ермэлыкъхэри къызэIуахыжьыщтых. Ар Оперативнэ штабым изичэзыу зэхэсыгъо щырахъухьагъэхэм ащыщ. Джащ фэдэу Мыекъуапэ общественнэ транспортыр щатIупщыжьынэу ащ щытыраубытагъ, мы мафэхэм зыфагъэхьазыры.

АР-м и ЛIышъхьэу КъумпIыл Мурат къэлэ гупчэм ит бэдзэршIыпIэм мэфэ заулэкIэ узэкIэIэбэжьмэ щыIагъ, коронавирусым зимыушъомбгъуным пае санитарнэ шапхъэу къагъэнэфагъэхэр зэрагъэцакIэ­хэрэм ежь ышъхьэкIэ зыщигъэгъозагъ.
Республикэм ипащэ щакIохэм гущыIэгъу афэхъугъ, сатыур зэрэкIорэм, цIыфхэм анахьэу ащэфырэм акIэупчIагъ. Санитарнэ шапхъэхэр агъэцэкIэнхэр шIокI зимыIэ Iофэу зэрэщытым, ахэр Iэпэдэлэл ашIыгъэхэу загъэунэфыкIэ джыри бэдзэршIыпIэхэр зэрэзэфашIыжьыщтхэм ащ къыкIигъэтхъыгъ.

— КъыдгурэIо, мэкъумэщышIэу ылэжьыгъэр IуигъэкIымэ зышIоигъохэмкIи, цIыфэу шапхъэхэм адиштэрэ гъомылэпхъэ тэрэз зищыкIагъэхэмкIи бэдзэршIыпIэхэм Iоф ашIэным мэхьэнэшхо иI, — къыIуагъ Адыгеим и ЛIышъхьэ. — Арэу щытми, щынэгъончъагъэр пстэумэ анахь шъхьаIэшъ, Рос­потребнадзорым къыгъэнэфагъэхэр зымыгъэ­цакIэхэрэм пхъашэу тапэгъокIыщт.
КъумпIыл Мурат Мыекъуапэ иадминистрацие, экономикэ хэхъоныгъэмкIэ ыкIи сатыумкIэ Министерствэм, Роспотребнадзорым АР-мкIэ и ГъэIорышIапIэ япащэхэм закъыфигъазэзэ, ермэлыкъхэр зыщызэхащэхэрэми лъэшэу алъыплъэнхэу, шапхъэхэр амыгъэцакIэхэу ашIомыкIынхэу афигъэпытагъ.

ХЪУТ Нэфсэт.