Шъузфэсакъыжь, шъукъэзыуцухьэхэрэми шъуафэсакъ!

ЖъоныгъуакIэм и 12-м къыщегъэжьагъэу коронавирусым пэуцужьыгъэнымкIэ чэзыукIэм тызэрэхахьэрэм, шап­хъэу ыпэкIэ агъэуцугъагъэхэр тIэкIу-тIэкIузэ зэрэща­гъэ­зые­жьыщтхэм афэгъэхьыгъэу Урысыем и Президентэу Владимир Путиным макъэ къыгъэIугъ.

Шэпхъэ гъэнэфагъэхэр хэгъэгум зыкIыщаштэгъагъэхэр зэпахырэ узым икъоу пэуцужьыгъэным шъолъырхэм зыфагъэхьазырыным фэшI. Джы шъо­лъырхэм япащэхэм амалэу яIэр къызфагъэфедэзэ, Iофым изытет хъурэм елъытыгъэу Iофтхьабзэу зэрахьащт-­
хэмкIэ унашъохэр аштэщтых.

Адыгэ Республикэм и ЛIышъхьэу КъумпIыл Мурат зипэщэ Оперативнэ штабыр Адыгеим щызэхащагъ. ЦIыфхэм ящыIэныгъэ зэпхыгъэ къулыкъухэмрэ псэуалъэхэмрэ чэщи-мафи Iоф ашIэ. Лабораториехэр, ящыкIэгъэщт пIэкIор пчъагъэм фэдиз агъэхьазырыгъэх. Медицинэ оборудованиеу ящыкIэгъэщтым фэдиз къызIэкIагъэхьагъ, ИВЛ-мкIэ ап­паратхэм язапас щыIэ хъугъэ. Коронавирусым лъэшэу ыгъэгумэкIыхэрэм IэпыIэгъу дэгъу, реанимационнэ IэпыIэгъу ягъэгъотыгъэнымкIэ зэкIэ ищыкIагъэр щыI. Ублэгъум елъытыгъэмэ, узым фэгъэхьыгъэу врачхэм джыдэдэм ашIэрэр нахьыб. Джы нахь пасэу ащ фэдэ узыр къахагъэщын алъэкIы. Ащ епхыгъэу ежь сымаджэри, ар къэзыуцухьэхэрэри нахь ухъумагъэ мэхъух, зэпахырэ узми ащ фэдизэу зиушъомбгъурэп. Мы узым щынэгъошхо къызэрэздихьырэр респуб­ликэм исхэм къазэрагурыIуагъэм мэхьанэшхо иI. Республикэм ихэбзэ Iэ­шъ­хьэтетхэр ары цIыфхэм ящыIэныгъэ къэухъумэгъэнымкIэ, тIэкIу-тIэкIузэ шэп­хъэ гъэнэфагъэхэм атекIыжьыгъэнхэмкIэ пшъэдэкIыжь зыхьыщтхэр.

Коронавирусыр республикэм къы­щызэутэлIэгъагъэхэм азыныкъо нахьыбэмэ япсауныгъэ зэрэзэтеуцожьыгъэм емылъытыгъэу Iофхэр мыщкIэ зэрэхьы­лъэу къэнэжьых. Санитар шапхъэхэр дэх имыIэу къыдалъытэхэзэ, ыпэкIэ агъэуцугъэгъэ шапхъэхэм атекIыжьынхэ фае. Ащ охътэ шIукIае ыкъудыищт, джары цIыфхэм Iэдэбышхо зыкIахэлъын фаер.

Зыныбжь илъэс 65-м шъхьадэкIы­гъэхэр, хэужъыныхьэгъэ уз зиIэхэр джыри яунэхэм арысынхэмкIэ шъолъыр­хэм япащэхэм амалхэр зэрэзэра­хьэ­хэрэм хэгъэгум ихэбзэ Iэшъхьэтетхэм гъунэ лъафыщт. ЦIыфхэр жъугъэу зы­хэлэжьэрэ Iофтхьабзэхэр джыри зэрэ­хэгъэгоу щызэхащэхэ хъущтэп. Гъот макIэ зиIэхэм, илъэс 16-м нэс зыныбжь кIэлэцIыкIухэр зэрыс унагъохэм, кIэлэ­егъаджэхэм, медицинэ, со­циальнэ IофышIэхэм IэпыIэгъу ягъэгъотыгъэнымкIэ Iофтхьэбзэ тедзэ заулэ рахъухьагъ.

Хэгъэгум ипроизводстви джыдэдэм чIыпIэ къин зэритыр къэIогъэн фае. Урысыем и Президент ащ егъэгумэкIы ыкIи IофшIэн зимыIэхэм япчъагъэ нахь макIэ шIыгъэнымкIэ, предприятиехэм, бизнес цIыкIумрэ гурытымрэ IэпыIэгъу ягъэгъотыгъэнымкIэ, IофшIэпIэ чIыпIэхэр къэухъумэгъэнхэмкIэ хэкIыпIэ заулэ игъо къафилъэгъугъ.

Адыгэ Республикэм инахьыжъхэм я Совет хэтхэр коронавирусым пэуцужь­хэрэм, зисэнэхьат пшъэрылъ зыгъэца­кIэхэрэм лъэшэу афэразэх. Тэ джыри зэ республикэм исхэм зафэтэгъазэ, коронавирусым зимыушъомбгъунымкIэ шапхъэхэм, санитар шапхъэхэм адэмыхынхэу ятэIо. Тызэсэгъэ щыIакIэм къызыфэдгъэзэжьыщтыр тэры зэлъы­тыгъэр. Лъэшэу шъусакъ! Узыр къы­шъупымыхьанымкIэ зэшъушIылIэн фаехэм шъунаIэ нахь атежъугъэт!

ГъукIэлI Нурбый.
Адыгэ Республикэм инахьыжъхэм я Совет итхьамат.