Зэпахырэ узым пэшIуекIогъэнымкIэ Iофыгъо шъхьаIэхэр

Коронавирусым пэшIуекIогъэнымкIэ Оперативнэ штабым изэхэсыгъоу тыгъуасэ щыIагъэр зэрищагъ Адыгеим и ЛIышъхьэу КъумпIыл Мурат.

Урысыем и Президентэу Владимир Путиным шъолъырхэм апашъхьэ къыгъэуцугъэ пшъэрылъхэм ягъэцэкIэн зэхэсыгъор фэгъэхьыгъагъ. АщкIэ анахь шъхьаIэу щытыр — зэпахырэ узым зимыушъомбгъуным лъыплъэгъэныр ыкIи Iоф­хэм язытет нахь зыпкъ зиуцокIэ режимэу щыIэр нахь «гъэшъэбэгъэныр» ары.

— Къэралыгъом ипащэ къызэрэхигъэщыгъэмкIэ, регионхэм яIофхэм изытет зы­фэдэм елъытыгъэу ежьхэм унашъохэр ашIынхэ алъэ­кIыщт. Респуб­ликэм непэ ко­ронавирусыр къызэщыте­тIэжэн тэлъэкIы. Шапхъэу щыIэхэр зыгъэцэкIэрэ цIыф­хэм инэу сафэраз. Ау узы­гъэрэзэн зэфэхьысыжьхэр тшIынхэр джыри жьыIо. Арышъ, мы узым тыпэшIуе­кIоным, ыпэ­кIэ щыIэкIэ-псэу­кIэу тиIагъэм тытехьажьыным фэшI жъоныгъокIэ мэфэкI мафэхэм унэхэм шъуарыс, шапхъэхэр жъугъэцакIэх, — къыIуагъ КъумпIыл Мурат.

Мэлылъфэгъум и 29-м ехъу­лIэу республикэм щыпсэурэ нэбгырэ 44-мэ амбулаторнэ шIыкIэм тетэу яIазэх, стационарым — нэбгыри 110-рэ щыIэх. Реанимацием сымэджи 7 илъ, тхьабылым жьы къезыгъэщэрэ аппаратым нэбгыри 3 пыгъэ­нагъ. Нэбгырэ 48-мэ япсауныгъэ зэтеуцожьыгъ, 3-мэ ядунай ахъожьыгъ.

Роспотребнадзорым АдыгеимкIэ и ГъэIорышIапIэ ипащэу Сергей Завгороднем къызэри­IуагъэмкIэ, непэрэ мафэм ехъу­лIэу нэбгырэ 163-мэ корона­ви­русыр яIэу республикэм ща­гъэунэфыгъ.

Мы узым икъыхэгъэщынкIэ Адыгеим ушэтын 16 474-рэ щызэхащагъ, мы къэгъэлъэгъонымкIэ пэрытныгъэ зыIыгъ ре­гионхэм ащыщ. Тест-системэ мини 8,6-м ехъу IэпэчIэгъанэу щыI. Мы узым пэшIуекIогъэным фэшI врач 293-рэ ыкIи медсестра 1141-рэ Iудзыгъэ шIыкIэм тетэу рагъэджагъэх.

Медучреждениехэм амалэу аIэкIэлъхэм ахэгъэхъогъэныр пшъэрылъ шъхьаIэу зэрэщытыр Адыгеим и ЛIышъхьэ хигъэунэфыкIыгъ, ащкIэ профильнэ ведомствэм пшъэрылъ гъэнэфагъэхэр фишIыгъэх. Джащ фэдэу мы узым пэуцужьыхэрэ медицинэм иIофышIэхэм Iэпы­Iэгъу афэхъугъэным, ящыкIагъэр арагъэгъотыным анаIэ ты­рагъэтынэу къафигъэпытагъ.