ЗэкIамыгъэкIожьыщт ахъщэ IэпыIэгъу къаратыщт

Коронавирусым ыпкъ къикIыкIэ бизнесыр зэрыуцогъэ чIыпIэ къиным къикIыжьынымкIэ къэралыгъом амалэу аригъэгъотыщтхэм зэу ащыщ зэкIамыгъэкIожьыщт ахъщэ IэпыIэгъоу предприятиехэм къаритыщтыр.

Предприятиехэм агъэцэкIэн фэегъэ пшъэрылъхэм язэшIохын мы ахъщэ IэпыIэгъур пэIуагъэ­хьан алъэкIыщт – 2020-рэ илъэ­сым имэлылъфэгъу – жъоныгъо­кIэ мазэхэм яIофышIэхэм ялэжьапкIэ къафызэтырагъэнэным пае.

Нахь къыжъугурыIоным пае, бизнес цIыкIум ыкIи гурытым епхыгъэ компаниехэм яIофы­шIэхэм лэжьапкIэр аратынымкIэ ахъщэр къэралыгъом афызэкIигъэкIожьызэ ышIыщт, зы нэбгырэм телъытагъэу ар сомэ 12130-рэ мэхъу. Джащ фэдэу компанием нэбгыри 100-мэ Iоф щашIэмэ, IэпыIэгъур мазэм сомэ 1213000-рэ хъущт.

Мэлылъфэгъум и 1-м ехъулIэу компание гъэнэфагъэм нэбгырэ пчъагъэу Iоф щызышIэщтыгъэр процент 90-м нэсэу къызэтыригъэнэн ылъэкIыгъэмэ ахъщэр къыфатIупщыщт.

ЖъоныгъуакIэм и 1-м къыщегъэжьагъэу предприятиехэм ыкIи унэе предпринимательхэм зэкIамыгъэкIожьыщт ахъщэ къаратынымкIэ тхьапэхэр Федеральнэ хьакъулахь къулыкъум ыштэнхэу ригъэжьэщт. Ар Iу­дзы­гъэ шIыкIэм тетэу «Хьакъу­лахь зытырэм иунэе кабинет» зыфиIорэ едзыгъор къыхэжъугъэщынышъ, ищыкIэгъэ къэбарыр ежъугъэхьын шъулъэкIыщт.

Ахъщэ IэпыIэгъоу мэлылъфэгъу мазэм телъытагъэр къаратынымкIэ лъэIу тхылъхэр жъоныгъуакIэм и 1-м къыщегъэжьагъэу мэкъуогъум и 1-м нэс, жъоныгъуакIэм телъытагъэр къаратынымкIэ – мэкъуогъум и 1-м къыщегъэжьагъэу бэдзэогъум и 1-м нэс рагъэхьынхэ алъэкIыщт.

Мэлылъфэгъум телъытэгъэ ахъщэр жъоныгъуакIэм и 18-м къыщегъэжьагъэу компаниехэм ясчетхэм арагъэхьанхэу рагъэ­жьэщт. ЖъоныгъуакIэм пае мэкъуогъум къаратыжьыщт.

Ахъщэ IэпыIэгъур пстэумкIи бизнес цIыкIумрэ гурытымрэ ахэхьэрэ предприятие мин 500-мэ аIут IофышIэ миллиони 3-м ехъурэмэ къаратыщт.

Зэпахырэ узэу коронавирусым зызыщиушъомбгъугъэм илъэхъан экономикэм зыпкъ итэу хэхъоныгъэ егъэшIыгъэнымкIэ, кризисым пэшIуекIогъэ­нымкIэ Урысые Федерацием и Правительствэ IэпыIэгъу Iоф­тхьэбзэ тедзэхэу зэрихьащтхэм я Планэу зэхигъэуцуагъэм мы зигугъу къэтшIырэри мэлылъфэгъум и 16-м хагъэхьагъ.

Iэшъынэ Сусан.