Итеплъэ зыпкъ ригъэуцожьыгъ

Дунаим щызэлъашIэрэ адыгэ быракъым итеплъэ зыпкъ изыгъэуцожьыгъэ Дэрбэ Сэчнэт игукъэкIыжьхэр тищыIэкIэ-псэукIэ епхыгъэх.

— Адыгэ быракъым идэхагъэ лъэшэу сыгу рихьи, IофшIэным сыфежьагъ, — къеIуатэ Дэрбэ Сэчнэт. — Сурэтэу ашIыгъэхэм, нартхэм якъэбар къэзытхыжьыгъэ ХьадэгъэлIэ Аскэр къысигъэлъэгъугъэ тхылъым пэшIорыгъэшъэу защызгъэгъозагъ.

Искусствэм Iоф щызышIэщтыгъэ Дэрбэ Сэчнэт тхылъхэм яджэзэ, адыгэ бзылъфыгъэу лъэпкъ быракъыр зышIыгъагъэм иIэпэIэсэныгъэ шIогъэшIэгъоныгъ.

Мастэмрэ Iуданэмрэ къэпштагъэхэу уцышъо быракъым ихэдыкIынхэр зебгъажьэхэкIэ макIэп гум къихьащтыр. Адыгэ лъэ­п-къым итарихъ, зыкIыныгъэм игъэ­пытэн къипIотыкIыхэ пшIоигъощт.

Адыгэкъалэ культурэмкIэ и Унэшхо Адыгэ Хасэм изэIукIэу щыкIорэм лъэпкъым ибыракъ къычIахьи, тищыIэныгъэ щыщ хъужьыгъэ.

Илъэсхэр кIуагъэх. Адыгэ Рес­публикэр пытэу ылъэ теуцуагъ. Мыекъуапэ ипчэгу шъхьаIэу В.И. Лениным ыцIэ зыхьырэм мэфэкIышхоу щызэхащагъэм адыгэ быракъыр лъагэу щаIэ­тыгъ.

Республикэм и Лъэпкъ музей ратыжьыгъэ адыгэ быракъэу пчэгум щытлъэгъурэм нэбгырэ шъэ пчъагъэ екIолIагъ, шъхьащэ фашIыгъ, нэпэеплъ сурэтхэр атырахыгъэх.

Адыгэ быракъым фэгъэхьыгъэ орэдыр Къэралыгъо телерадиокомпаниеу «Адыгеим» иIофышIэу Беданыкъо Замирэ мэкъэ IэтыгъэкIэ къызыхедзэм, Дэрбэ Сэчнэт игушIуа­гъо бэмэ къыдагощыгъ, орэдыIом дежъыугъэх.

Лъэпкъыр зэрыгушхорэ адыгэ быракъыр Адыгэкъалэ имузей ратыжьыгъ, лъэгъупхъэ чIыпIэм къыщагъэлъагъо.

ЕМТIЫЛЪ Нурбый