Шапхъэу пылъхэр

Мызэу-мытIоу къызэрэхэтыутыгъэу, коронавирусым тикъэралыгъо зэлъимыкIуным пае УФ-м и Президент унашъохэу къышIыгъэхэм зэу ащыщ цIыфэу банкым чIыфэ къыIызыхыгъэхэм ар зэратыжьыщтыр мэзих пIалъэкIэ афызэкIэхьэгъэныр.

Шапхъэу ащ пылъхэм къызэращыдэлъытагъэмкIэ, мэлылъфэгъу мазэу тызыхэтым и 3-м ыпэкIэ чIыфэр, ипотекэри зэрахэтэу, зыгъэпсыгъэхэр ары ащ къыхиубытэщтхэр. «Каникулыр» зищыкIагъэхэм Iоныгъо мазэм и 30-м шIомыкIэу лъэIу тхылъхэр атынхэ фае.

ПIалъэр зэрэзэкIахьащтыр ежь чIыфэр къэзытыгъэр ары къэзгъэнэфэщтыр, ау ар мэзихым нахьыбэщтэп. НахьыпэкIэ ар зэрэптыщтыгъэр къэзыушыхьатырэ тхылъхэр ищыкIэгъэщтых.

ГущыIэм пае, вирусыр къеуалIи цIыфыр ыгъэсымэджагъэмэ, зэпахырэ узым ыпкъ къикIэу илэжьапкIэ къыщыкIагъэмэ, иIофшIэн чIинагъэу, цIыфхэм IофшIапIэхэр къязытырэ къулыкъум иучет хэуцуагъэмэ ахэр къэзыушыхьатырэ тхылъхэри ри­хьылIэнхэ фае.
Банкым пIалъэр цIыфым фызэкIимыхьан фитэп, сыда пIомэ федеральнэ хэбзэгъэуцугъэм ар къыщыдэлъытагъ.

ХЪУТ Нэфсэт.