ИкуупIэм хэтхэу

Аужырэ уахътэм зэрэдунаеу зыгъэ­гумэкIырэ Iофыгъом икуупIэ хэ­тых, пстэури зыщыщынэрэ узым бгъэгукIэ екIух. Лъэхъэнэ мыпсын­кIэм псэемыблэжьыныгъэ къызыхэз­гъафэхэрэм ыкIи узым рес­пуб­ли­кэм зызэрэщиушъомбгъурэм афэ­гъэхьыгъэу сымаджэхэу зэгуца­фэхэрэмрэ сымаджэхэмрэ къызэ­­Iуахыгъэ гъэхъужьыпIэм езыща­лIэ­хэрэм ыкIи ащ Iоф щызышIэхэрэм гущыIэгъу тафэхъугъ.

Апэ нэсыхэрэр

Республикэм IэпыIэгъу псынкIэмкIэ икъулыкъу бригадэ 51-мэ къагъэпсы, ахэм ащыщэу 17-р зэпхыгъэр къалэу Мыекъуапэ.

Зэпахырэ уз щынагъор иIэу зэгуцафэхэрэм Iоф адашIэнэу агъэнэфагъэр 4. Мыхэр нэбгырэ 27-мэ къагъэпсы ыкIи коронавирус къызэкIугъэу пэшIорыгъэшъэу агъэунэфыгъэ­хэм, республикэм ичIыпIэ пстэуми, алъагъакIохэрэр мыхэр арых.

Къыхэгъэщыгъэн фае, гъэтхапэм и 27-м къы­щыу­благъэу IэпыIэгъу псын­кIэр зычIэт унэм ахэр щэпсэух, яунагъохэм ахэ­хьажьхэрэп. Гъэлъэшыгъэу зыухъумэщтхэ хэу­шъхьафыкIыгъэ шъуашэ­хэр, анэгухэр зыухъумэхэрэр, жьыкъэщапIэхэм апае респираторхэу жьыр зыукъэбзыхэрэр зыхэтхэр, Iэлъэ тIурытIур мыхэм аужырэ уахътэм ящыгъыных.

— ХэушъхьафыкIыгъэ бригадэхэр афэтэгъакIох пскэхэрэм, зиплъырыгъэ къыдэкIуаехэрэм, жьымыгъот зиIэхэм. ТелефонкIэ тикъулыкъу къытеохэрэм апэрапшIэу тяупчIы зы­дэщыIагъэхэмкIэ, анахьэу тынаIэ зытедгъэтырэр IэкIыбым е тикъэралыгъо ичIыпIэхэу коронавирусыр къызщыхагъэщы­гъэхэм къарыкIыжьыгъэ­хэмэ е сымаджэхэу зэгуцафэхэрэм ягъусагъэ­хэмэ ары, — къытфиIотагъ Адыгеим IэпыIэгъу псынкIэмкIэ икъулыкъу ипащэ ипшъэрылъхэр зыгъэцэкIэрэ Сетэ Маринэ.

Мэлылъфэгъум и 2 чэщ-зы- мафэм пэшIорыгъэшъэу коронавирусыр АдыгеимкIэ къызыхагъэщыгъэ нэбгыри 3 IэпыIэгъу псынкIэм иIофышIэхэм зэпахырэ узхэмкIэ сымэджэщым нагъэсыгъ, тыгъуасэ мафэм сыхьатыр 1-м ехъулIэу джащ фэдэу зы нэбгырэ ащагъ.

Сымэджэщым

Адыгэ Республикэм зэпахырэ узхэмкIэ иклиническэ сы­мэджэщ коронавирусыр пэ­шIорыгъэшъэу къызыхагъэщы­хэрэм ыкIи ар къызфаушыхьатыжьхэрэм афытырагъэпсы­хьагъ. Мыщ зэкIэмкIи нэбгыри 120-рэ фэдиз чIэфэнэу щыт, къафащэхэрэм къахагъэщыгъэм елъытыгъэу зэтыраутыгъ — пэшIорыгъэшъэу агъэунэфыгъэхэу, ау Москва зиуз къыщамыушыхьатыжьыгъэхэр зы кIэ­лъэныкъом, къэлэ шъхьаIэм ща­гъэунэфыгъэу сымаджэхэр нэмыкI кIэлъэныкъом ачIагъэгъуалъхьэх.

 

Сымаджэхэм ягугъапIэх

Мы сымэджэщыр гъэтхапэм и 26-м къыщыублагъэу унэ афэхъугъ медицинэм иIофышIэ нэбгырэ 42-мэ! Ахэр яIахьылхэм, яунагъохэм джащ фэдизым ахэмыхьажьхэу, гъэлъэ­шыгъэ хэушъхьафыкIыгъэ шъуа­шэхэмкIэ фэпагъэхэу чэщи ма­фи сымаджэхэм яIазэх.

Тыгъосэрэ мафэм сыхьатыр 12-м адэжь мыщ нэбгырэ 31-рэ чIэлъыгъ, 19-мэ пэшIорыгъэшъ уплъэкIунхэр арашIылIагъэхэу, Москва джэуапэу къытыжьыщтым ежэх.

Сымэджэщым чIэфагъэхэм ащыщэу 3-мэ аныбжь илъэс 50-м ехъугъ. Илъэс 17 ыкIи 23-рэ зыныбжьхэми узыр къяу­тэкIыгъэу сымэджэщым ащя­Iазэх.
— Коронавирусыр къызэу­тэкIыгъэхэм япсауныгъэ изытет уигъэрэзэнэу щыт, ящыкIэ­гъэ медицинэ IэпыIэгъур ятэгъэгъо­ты, уц IэзэгъухэмкIи, хэушъхьафыкIыгъэ щы­гъынхэмкIи щыкIагъэ тиIэп, — къытфиIотагъ Адыгэ Респуб­ликэм зэпахырэ узхэмкIэ икли­ническэ сымэджэщ иврач шъхьа­Iэ иIэнатIэ зыгъэцэкIэрэ Лъэустэнджэл Розэ. — ЗиIоф хьылъэ дэдэу зи ахэтэп.

АдыгеимкIэ апэ къэсымэджагъэр мэхъужьы

ЗэкIэми апэ коронавирусыр тиреспубликэкIэ къызхагъэ­щыгъэ сымаджэр мэфибгъу фэдиз хъугъэ IэзапIэм зычIэ­лъыр. Лъэустэнджэл Розэ къызэриIуагъэмкIэ, ар хъужьыгъэмэ къэзыгъэунэфыщт анализхэр тIогъогогъо Iахынхэшъ, ахэм узыр къазыхамыгъэщыкIэ, чIатхыкIыжьыщт. Апэрэ анализыр ащ тыгъуасэ Iахыгъ, зы мафэ зытешIэкIэ, ятIонэрэри рагъэтыщт.

Илыягъэу угумэкIынэу щытэп

Адыгеим IэпыIэгъу псын­кIэмкIэ икъулыкъу ипащэ ипшъэ­рылъхэр зыгъэцэкIэрэ Сетэ Ма­ринэ къызэриIуагъэмкIэ, цIыфхэр илыегъащэу зэрэгу­мэкIыхэрэм ишыхьат хъугъэшIагъэхэу яплъырыгъэ нэмыкI ушъхьагъу имыIэу къыдэкIоя­гъэу, ялъыдэкIуае лъэшыщэ хъугъэу агъэунэфыхэрэр.

— Рэхьатэу, умыгумэкIыщэу, къэралыгъо къулыкъухэм, медицинэм иIофышIэхэм, санитарнэ къулыкъухэм къаIорэр бгъэ­цакIэу ущыIэн, къэбзэныгъэм ишапхъэхэм уатетын фае, имы­­щыкIэгъэ дэдэу унэу узыщыпсэурэр къэубгынэ хъущтыгоп, — еIо ащ.

ШъушIэным пае

БлэкIыгъэ чэщ-зымафэм ­апкъышъол иплъырыгъэ дэкIоягъэу, пскэхэу, жьымыгъот яIэу къафытеуагъэхэм адэжь Адыге­имкIэ дэкIыгъуи 138-рэ, Мые­къуапэ изакъоу 68-рэ IэпыIэгъу псынкIэм зэшIуихыгъ, ахэм ащыщэу 3-р пэшIорыгъэшъэу коронавирусым епхыгъэу зэпа­хырэ узхэмкIэ сымэджэщым, 2-м пневмоние яIэу республикэ IэзапIэм анагъэсыгъэх. НеврологиемкIэ отделениеу мыщ иIэм чIыпIэ ащыфыхахыгъ ащ фэдэ сымаджэхэм ыкIи пэтхъу-Iутхъу зиIэхэм. ЧIэхьэпIэ шъхьафи фашIыгъ нэмыкIхэм зэпахырэ узыр апымыхьаным пае.

Пэтхъу-Iутхъу уз мыхьылъэ зиIэхэр яунэхэм арысхэу зэIэзэжьых.

Къэралыгъо мылъкукIэ

Медицинэм иIофышIэхэм ящынэгъончъагъэ апшъэрэ Iофыгъохэм зэращыщыр къыхегъэщы Адыгеим и ЛIышъхьэу КъумпIыл Мурат. Хэушъхьа­фыкIыгъэ шъуашэхэу, пкъыгъо­хэу узым пэуцужьхэрэм агъэфедэн фаехэмкIэ щыкIагъэ щы­мыIэным фэшI бюджет мылъку къатIупщыгъ. Уц Iэзэгъухэм ящэфын рызэшIуахынэу сомэ миллион 50 джыри республикэ бюджетым къыхагъэкIыгъ. Федеральнэ мылъкоу сомэ миллион 54-мкIэ меди-цинэ оборудование къызIэкIа­гъэхьащт.

— Врач пэпчъ ищыIэныгъэ къэтыухъумэн фае, — къыIуагъ КъумпIыл Мурат. — Ахэр ары узэу къежьагъэм пэуцужьхэрэр, щыкIагъэ яIэнэу щытэп.

ЩыIэныгъэм джыри зэ къеу­шыхьаты медицинэм иIофышIэ­хэр япсэемыблэжьыныгъэ, зы­шъхьамысыжьхэу, ягупсэхэм апэIапчъэхэу типсауныгъэ икъэу­хъумэн зэрэфэлажьэхэрэр.

ТХЬАШЪУЕГЪЭПСЭУ пстэу­ми шъотэIо мы лъэхъэнэ мыпсынкIэм Iофэу зэшIошъу­хырэмкIэ!

Шъхьащэ къышъуфэтэшIы!

МэщлIэкъо Саид.