Унэгъуи 171-мэ аратыщт

УФ-м икъэралыгъо программэу «Обеспечение доступным и ком­фортным жильем и коммуна­льны­ми услугами граждан РФ» зыфиIорэм къыдыхэлъытагъэу Адыгэ Республикэм и ЛIышъхьэу КъумпIыл Мурат ипшъэрылъкIэ шъолъырым имуниципалитетхэм адэс унэгъо ныбжьыкIэхэм псэупIэ амалэу яIэхэр нахьышIу ашIыным фытегъэпсыхьэгъэ сертификатхэр аратыщтых.

— ГухэкI нахь мышIэми, мэфэкI шIыкIэм тетэу сертификатхэр яттыжьынхэ тлъэкIыщтэп. Пстэуми анахь шъхьаIэр цIыфым ипсауныгъ ары. Коронавирусым ыпкъ къикIыкIэ Iофхэм язытет зыфэдэр пстэуми къызэрагурыIорэм сицыхьэ телъ. Ау Iоф­тхьабзэхэр нахь макIэ зэрэхъугъэр социальнэ фэIо-фашIэхэм ягъэцэкIэн пэрыохъу фэхъунэу щытэп, — къыхигъэщыгъ КъумпIыл Мурат.

Унэгъо ныбжьыкIэхэм, сабыибэ зэрысхэм, ным, сабыигъом IэпыIэгъу афэхъугъэным фытегъэпсыхьэгъэ къэралыгъо программэхэр зэкIэ республикэм щыгъэцэкIэгъэнхэм мэхьанэшхо зэриIэр Адыгеим и ЛIышъхьэ къыхигъэщыгъ.

2020-рэ илъэсым унэгъо ныбжьыкIи 171-мэ сертификатхэр аратынхэу агъэнафэ. Iофтхьабзэм сомэ миллиони 166,5-рэ пэIуагъэхьащт. Сомэ миллион 37,3-р — федеральнэ бюджетым, сомэ миллион 55-м фэдизыр — республикэм, сомэ миллион 74,2-м ехъур — чIыпIэ бюджетхэм къа­хэхыгъэщт.
Шъугу къэдгъэкIыжьын, федеральнэ, республикэ ыкIи муниципальнэ программэхэр загъэцакIэхэрэ 2006-рэ илъэсым къыщегъэжьагъэу 2019-рэ илъэсым нэс унэгъо ныбжьыкIэ мини 2-м ехъумэ псэупIэ амалэу яIэхэр нахьышIу ашIын алъэкIыгъ.