Танкэу «Андырхъое Хъусен»

Урысыем и Къыблэ шъолъыр щызэхащэгъэ кощырэ къэгъэлъэгъонэу «ТекIоныгъэм иэше­лон» зыфиIорэм иэкспонат шъхьаIэу алъы­тагъэр «Андырхъое Хъусен» ыIоу зытетхэгъэ танкэу ИС-3-р ары. Щылычым хэшIыкIыгъэ танкыр Къыблэ дзэ округым иартиллерийскэ бригадэу Адыгеим щыIэм ичIыналъэ тет.Советскэ танк хьылъэу ИС-3-р 1944-рэ илъэсыр ары ашIынэу зырагъэжьэгъагъэр, 1945-рэ илъэсым ижъоныгъокIэ мазэ апэрэ танк купыр къыдагъэкIыгъагъ. Танкым топ тетыгъ, щылыч тегъэчъыхьэ­гъагъ. ИС-3-хэр заом хэлэжьэнхэу игъо ифэгъагъэхэп, ау 1945-рэ илъэсым Iоныгъом и 7-м ТекIоныгъэм ипарадэу зэхащэгъагъэм ахэр апэ итыгъэх.

Тидзэхэм Берлин заштэм я 2-рэ Гвардейскэ танк армием итанкистхэр ИС-3-хэм арысхэу урамхэм къырыкIогъагъэх. США-м, Великобританием, Фран­цием яцIыфхэм ахэр за­лъэгъухэм «абзэхэр ыубыты­гъагъэх».

ШIэхэу танк-саугъэтыр зытет постаментым къытыращынышъ Ростов хэкум ащэщт. Мэлылъфэгъум Iофтхьабзэу «ТекIоныгъэм иэшелон» зыфиIорэр ащ къыщырагъэжьэщт. Акциер Урысыем и Къыблэ шъолъыр зэрэщытэу щыкIощт. Экспонат гъэшIэгъоныр лIыхъужъыцIэ зыхьырэ къалэхэм, УФ-м исубъектхэм якъэлэ гупчэхэм, мэшIокугъогу зэхэкIыпIэ станциехэм къащагъэлъэгъощт. ЧIыпIэ зэфэшъхьаф 29-мэ «ТекIоны­гъэм иэшелон» хагъэлэжьэрэ экспонатхэм нэIуасэ щафашIыщтых, концертхэр къатыщтых.