Ешъуагъэхэу рулым Iусыгъэх

АР-м икъэралыгъо автоинспекторхэм Джэджэ райо­ным къулыкъур щахьызэ автомобилэу ВАЗ-р къагъэу­цугъ. Шэуджэн районым щыпсэурэ илъэс 28-рэ зы­ныбжь хъулъфыгъэу рулым Iусыгъэр ешъуагъэмэ къэ­зыушыхьатырэ медицинэ уплъэкIунхэр ышIынхэм къафе­зэгъыгъэп.

Нэужым инспекторхэм водителым къэбарэу пы­лъыр зэрагъэшIагъ. КъызэрэчIэкIыгъэмкIэ, мы илъэсым ищылэ мазэ ешъуагъэу хъулъфыгъэр къагъэуцуи, административнэ пшъэдэкIыжь ра­гъэхьыгъагъ. Джы ащ ылъэ­ныкъокIэ уголовнэ Iоф къызэIуахыгъ.

Мыщ фэдэ хъугъэ-шIагъэ Кощхьэблэ районми щагъэунэфыгъ. Мыекъуапэ щыщ илъэс 35-рэ зыныбжь хъулъфыгъэр ешъуа­гъэу «Хендаим» кIэрысэу къызагъэуцум медицинэ уплъэ­кIунхэр афишIыгъэхэп. ЫпэкIэ ащ гъогурыкIоным ишапхъэ­хэр лъэшэу ыукъуа­гъэхэу къычIагъэщыгъ.

Джащ фэдэу илъэс 39-рэ зыныбжь хъулъфыгъэр ешъуагъэу иавтомобилэу «Ладэм» исэу къаубытыгъ. КъэIогъэн фае, ешъуагъэу къагъэуцугъэхэм яавто­мобильхэр аIахыгъэх ыкIи хэушъхьафыкIыгъэ уцупIэм дагъэуцуагъэх. Унашъоу щыIэмкIэ, ятIонэрэу ешъуа­гъэу къагъэуцугъэ водительхэм илъэси 2-м нэс хьапс атыралъхьан алъэкIыщт.