Бэгъушъэ Хьазрэт Даутэ ыкъом мы илъэсым мэзаем и 5-м идунай ыхъожьыгъ. Лъытэныгъэшхо зыфашIыщтыгъэ нахьыжъыр зымышIэрэ Тэхъутэмыкъуае дэсыгъэп. Мы къуаджэм ар къыщымыхъугъэми, иятIонэрэ чIыпIэ гупсэу ылъытэщтыгъ. Хьалэлэу зэрэлажьэщтыгъэм, Iэдэбрэ цIыфыгъэшхорэ зэрэхэлъыгъэхэм афэшI къоджэдэсхэм ащ уасэ къыфашIыщтыгъ, идунай зэрихъожьыгъэр гукъэошхо ащыхъугъ.
Бэгъушъэ Хьазрэт 1936-рэ илъэсым къуаджэу Аскъэлае къыщыхъугъ. Ячылэ дэт гурыт еджапIэм дэгъу дэдэу щеджагъ. Хыныгъом илъэхъан колхоз хьамэм Iоф щызышIэщтыгъэ кIэлэеджэкIо бригадэм ипэщагъ.
1955-рэ илъэсым Хьазрэт дзэ къулыкъум ащи, транспорт отделением икомандирэу щытыгъ. Илъэсищ зытешIэм авиациемкIэ старшэ лейтенантэу ядэжь къыгъэзэжьыгъ. Краснодар дэт заводэу «Октябрэм» рабочэу Iоф щишIагъ, Аскъэлэе гурыт еджапIэм ибиблиотекарэу, ипионер отряд ипащэу щытыгъ.
1961-рэ илъэсым къыщегъэжьагъэу 1967-рэ илъэсым нэс Бэгъушъэ Хьазрэт Теуцожь автохозяйствэм щылэжьагъ. Автотранспортым игъэфедэнкIэ отделым ипащэу Iоф ышIэ зэхъум зэхэщэн амалхэр ныбжьыкIэм зэрэIэкIэлъхэр къэнэфагъ. Илъэсихым къыкIоцI Хьазрэт ишIуагъэкIэ Адыгеим автобус маршрут заулэ къыщызэIуахыгъ. Автомобиль хъызмэтым квартал къэс ипланхэр ыгъэцакIэщтыгъэх.
Партием пэщэ ныбжьыкIэм ичаныгъэ гу къылъити, 1967-рэ илъэсым КПСС-м и Теуцожь райком пропагандэмрэ агитациемрэкIэ иотдел иинструкторэу, етIанэ партийнэ-зэхэщэн IофхэмкIэ иотдел иинструкторэу агъэнэфагъ. Илъэс зытешIэм Бэгъушъэ Хьазрэт Теуцожь районым исхэм яфэIо-фашIэхэр зыгъэцэкIэрэ комбинатым директорэу агъэкIуагъ. Ащ комбинатым пэщэныгъэ зыщыдызэрихьэгъэ илъэси 5-м къыкIоцI цIыфхэм яфэIо-фашIэхэр зыщагъэцэкIэщтхэ унэхэр районым ичIыпIэ пстэуми ащагъэпсыгъагъэх. Къоджэ цIыкIухэм приемнэ пунктхэр, унэгъо кIоцIым щагъэфедэхэрэ пкъыгъохэр, лъэкъопылъхьэхэр зыщагъэцэкIэжьыщтхэ чIыпIэхэр, парикмахерскэхэр къащызэIуахыгъагъэх. Ахэм продукциеу къыдагъэкIырэр хэгъэгум икъэлабэмэ аIэкIагъахьэщтыгъ. ЦIыфхэм яфэIо-фашIэхэм ягъэцэкIэн фэгъэзэгъэгъэ Министерствэм и Щытхъу тхылъ ащ пэщэныгъэ зыдызэрихьэрэ комбинатым джащыгъум къыфагъэшъошэгъагъ.
Советхэм ялъэхъан пэщэ чанхэр ауж къинэрэ хъызмэтшIапIэхэм агъакIощтыгъэх ахэр къарагъэIэтыжьынхэу. Джащ фэдэу Бэгъушъэ Хьазрэти Кировым ыцIэкIэ щыт колхозэу Аскъэлае щызэхэщагъэм 1973-рэ илъэсым тхьаматэу агъакIуи, 1981-рэ илъэсым нэс ащ щылэжьагъ. КъэIогъэн фае пшъэрылъэу иIэхэр тхьаматэм дэгъоу зэригъэцакIэщтыгъэхэр. Ащ пэщэныгъэ зыщызэрихьэгъэ уахътэм къыкIоцI культурэмкIэ Унэу нэбгырэ 400-мэ ателъытагъэр, колхоз правлениер зычIэтыщт унэу тIоу зэтетыр, кIэлэеджэкIо 900 зыщеджэн ылъэкIыщт гурыт еджапIэр, былымIыгъыпIэхэр, автогаражыр, лэжьыгъэIыгъыпIищ, хьамэр, автоматическэ телефон станциер ыкIи нэмыкIхэр къуаджэм къыдэтэджагъэх. Ащ нэмыкIэу къоджэдэсхэмрэ учреждениехэмрэ апае псырыкIуапIэхэр агъэпсыгъэх, лъэмыджитIу ашIыгъ, селоу Краснэм иурам шъхьаIэ къыщежьэу Аскъэлае иурам пстэуми къанэсэу асфальт атыралъхьагъ.
Бэгъушъэ Хьазрэт зипэщэгъэ колхозым былым пIашъэу шъхьэ мини 3-м ехъу, къо мини 2 щаIыгъыгъ, псычэтхэмрэ чэтжъыехэмрэ бэу щахъущтыгъэх, коц, натрыф, хэтэрыкI бэгъуагъэ ренэу къахьыжьыщтыгъ. Зы лъэхъанэ горэм ауж къинэщтыгъэ хъызмэтыр чIыгулэжьынымкIэ гъэхъэгъэшхохэр зиIэ колхозхэм ахалъытэ хъужьыгъагъэ.
1981-рэ илъэсым тичIыпIэгъу Тэхъутэмыкъое хьалыгъугъэжъэ заводым идиректорэу агъэнафэ. Мыщи чанэу Iоф зэрэщишIагъэм ишыхьат хьалыгъугъэжъапIэр игъэкIотыгъэу зэрагъэцэкIэжьыгъэр, хьалыгъоу ыкIи нэмыкI тхьацухэкIхэу чэщ-зымафэм тонн 18 къызэрэдагъэкIыщтыгъэр, хэку социалистическэ зэнэкъокъухэм чIыпIэ пэрытхэр къазэращыдихыщтыгъэр.
1985-рэ илъэсым КПСС-м и Краснодар крайком Апшеронскэ районымкIэ Хъыдыжъ дэт эфирышI совхоз-заводым ипэщэнэу Хь.Д. Бэгъушъэр ыгъэкIуагъ. ДиректорыкIэм мыщи гъэхъэгъэшIухэр щишIыгъэх. КПСС-м и Апшеронскэ райком, райисполкомым, КПСС-м и Краснодар крайком, крайисполкомым, ВЛКСМ-м икрайком язэIэпахырэ быракъ плъыжьыр мызэу, мытIоу заводым а лъэхъаным къыфагъэшъошагъэх.
Бэгъушъэ Хьазрэт Теуцожь гъомылэпхъэшI комбинатэу зиIофхэр зэтезыгъагъэм директорэу 1988-рэ илъэсым агъакIо. ПэщакIэр загъэнэфагъэм бэ темышIэу сокышI цехыр мыщ зыпкъ щырагъэуцожьы, лэжьакIохэр ыпкIэ хэмылъэу зыщышхэнхэ алъэкIыщт шхапIэри къыщызэIуахы. ЫужкIэ Пэнэжьыкъуае хьалыгъугъэжъапIэ, IэшIу-IушIухэр къызыщашIыщт цех, тучан агъэпсыгъэх. Адыгэкъали щапIэ къыщызэIуахыгъ, лэжьыгъэхэмрэ продукцие хьазырымрэ зычIэлъыщтхэ складхэр ашIыгъэх. ТIэкIу-тIэкIузэ комбинатым федэшхо къыIэкIахьэ хъугъэ ыкIи щэфакIохэм ишIуагъэ аригъэкIэу фежьагъ. ГущыIэм пае, поселкэу Заречнэм дэсхэм апае псы къычIэщыпIэ ыгъэпсыгъагъ.
Бэгъушъэ Хьазрэт пстэумкIи илъэс 55-рэ Iоф ышIагъ, ащ щыщэу илъэс 35-рэ пэщэ IэнатIэхэм аIутыгъ. ЕтIани къэIогъэн фае хъызмэтшIэпIэ, предприятие зэфэшъхьафхэм гъэхъагъэ хэлъэу пэщэныгъэ зэрадызэрихьагъэм дакIоу общественнэ, политикэ Iофхэми чанэу зэрахэлэжьагъэр.
1970-рэ илъэсым къыщегъэжьагъэу ар народнэ депутатхэм я Теуцожь район Совет, лэжьакIохэм ядепутатхэм я Тэхъутэмыкъое, я Пэнэжьыкъое, я Аскъэлэе къоджэ советхэм, Адыгэкъалэрэ Теуцожь районымрэ янароднэ депутатхэм я Совет ядепутатэу илъэс 20 фэдизрэ щытыгъ.
Пэщэ чанэу зыкъызэригъэлъэгъуагъэм, зыфэгъэзэгъэ Iофым хэшIыкIышхо зэрэфыриIагъэм афэшI правительствэм Хь. Д. Бэгъушъэм тын зэфэшъхьафхэр къыфигъэшъошагъэх. Ар Советскэ Дзэм иотличник, цIыфхэм яфэIо-фашIэхэр зыгъэцэкIэрэ къулыкъум иотличник. 1970-рэ илъэсым медалэу «За доблестный труд» зыфиIорэр, 1976-рэ илъэсым орденэу «Знак почета» ащ къыфагъэшъошагъэх. Джащ фэдэу Адыгэ Республикэм и Къэралыгъо Совет – Хасэм, Тэхъутэмыкъое районым иадминистрацие, Тэхъутэмыкъое районым инароднэ депутатхэм я Совет ящытхъу тхылъхэр Бэгъушъэ Хьазрэт къыратыгъэх. А пстэур къызыкIэкIуагъэр общественнэ Iофхэм чанэу зэрахэлэжьагъэр, сыд фэдэрэ Iофи хэкIыпIэ къыфигъотын зэрилъэкIыщтыгъэр, гуетыныгъэ фыриIэу илъэсыбэрэ пащэу зэрэлэжьагъэр, теубытагъэ зэрэхэлъыгъэр ары.
Бэгъушъэ Хьазрэт общественнэ IофшIэнэу ыгъэцэкIагъэхэм анахьэу къахигъэщыщтыгъэр сэкъатныгъэ зиIэхэм я Тэхъутэмыкъое район обществэ иправление итхьамэтэ годзэ IэнатIэ зэрэIутыгъэр ары. Пащэм лъытэныгъэу къыфашIыщтыгъэм мыщ щыхэхъуагъ. КъыфэIорышIэрэ организациехэм анэмыкIэу, районым ис пстэуми ащ осэшхо къыфашIы хъугъагъэ.
Бэгъушъэ Хьазрэт бын-унэгъо дахи иIагъ. Ишъхьэгъусэу Хьарэхъу Нэфсэтрэ ежьыррэ зэгурыIохэу илъэс 50 зы щыIэныгъэ гъогу зэдырыкIуагъэх. Ныбджэгъухэм апкъ къикIыкIэ Хьазрэтрэ Козэт къыщыхъугъэу Краснодар сатыушI училищым щеджэщтыгъэ Нэфсэтрэ 1969-рэ илъэсым нэIуасэ зэфэхъугъагъэх. НэбгыритIум янасып зэхэлъэу къычIэкIи, мэзэ заулэ нахь темышIэу джэгу афашIыгъ. Зэшъхьэгъусэхэм пхъурэ къорэ зэдапIугъ. Саиди, Руслъани апшъэрэ медицинэ гъэсэныгъэ зэрагъэгъоти, цIыфхэм япсауныгъэ икъэухъумэн зыфагъэзагъ.
Саидэ IэнэтIэ лъагэм нэсыгъагъ. Регион хэхъоныгъэмкIэ ыкIи фармацевтическэ компаниешхом хэхъоныгъэ егъэшIыгъэнымкIэ директорэу щытыгъ. Ар игъонэмыс зэрэхъугъэр, аварием зэрэхэкIодагъэр унагъомкIэ утынышхо хъугъэ.
Бэгъушъэ Руслъан IэпэIэсэныгъэшхо зиIэ врач-хирургэу щыт, бэшIагъэу Инэм район сымэджэщым пэщэныгъэ дызэрехьэ.
Тэтэжъыр ипхъорэлъфхэу Дианэ, Анжелинэ, Алинэ лъэшэу ащыгушIукIыщтыгъ.
ЦIыф хьалэлэу, гупсэу щытыгъэ, цIыфыгъэшхо зыхэлъыгъэ Бэгъушъэ Хьазрэт иунагъо исхэмкIэ ренэу щысэтехыпIэу щытыгъ. ТапэкIи ащ игугъу шIу нэмыкIкIэ ашIыщтэп.
Бэгъушъэ Хьазрэт гъэсэпэтхыдэ фэдэу ренэу икIалэ риIощтыгъ еджэ зэпытынэу, ишIэныгъэхэм ахигъэхъонэу, хьалэлэу Iоф ышIэнэу, ишIуагъэ цIыфхэм аригъэкIынэу. Тым игущыIэхэр къыгъэшъыпкъэжьыхэзэ, Бэгъушъэ Руслъан ищыIэныгъэ гъогу непэ пытэу рэкIо.
ЗэзыдзэкIыгъэр
ЛIышэ Саныет.