2007-рэ илъэсым зыфэдэ щымыIэ тхылъ гъэшIэгъонхэр титхылъеджапIэ къыIэкIэхьагъэх. Ахэр Венэ иинтернет-тучан къыщытщэфыгъагъэх. Сыда тхылъхэу нэмыцыбзэкIэ тхыгъэхэр къэтщэфынхэу зыкIэхъугъэр? А тхылъхэр зэкIэ адыгэмэ яхьылIагъэхэу, я 19-рэ лIэшIэгъум IэкIыб къэралыгъохэм къащыдэкIыгъэхэу, гъотыгъуае хъугъэмэ ащыщых.
Непэ зигугъу къэтшIыщт тхылъри ахэм ащыщ, нэмыцыбзэкIэ зэдзэкIыгъэу, Е.П. Лачиновам ироман-памфлетэу «Проделки на Кавказе» зыфиIоу 1844-рэ илъэсым Петербург къыщыдэкIыгъагъэр ары. Тхылъым тедзагъэр авторым ипсевдонимэу Хамар-Дабанов.
Петербург къызыщыдэкIыгъэр илъэситIу нахь мыхъоу, 1846-рэ илъэсым, «Московитянхэмрэ черкесхэмрэ» ыцIэу Лейпциг къыщыдагъэкIы.
Мы тхылъым упчIабэ къегъэуцу:
— сыда нэмыцхэм мы романым анаIэ къытырадзэнэу, арэу псынкIэу зэрадзэкIынышъ, къыдагъэкIынэу зыкIэхъугъэр?
— хъулъфыгъэ лъэкъуацIэр псевдонимэу авторым зыкIиштагъэр?
— авторым псевдонимэу Хамар-Добановыр къызкIыхихыгъэр?
— Кавказ заом ехьылIэгъэ романыр мы бзылъфыгъэм ытхынэу зыкIэхъугъэр?
Тхылъыр затхыгъэр Кавказ заом икуупIэ илъэсхэр ары. А лъэхъаным, зэрэдунаеу пIоми хъунэу, анэIу Кавказым къыфэгъэзэгъагъ. Зэо жъалымэу Урысые империем Кавказым ис цIыфхэм къаришIылIагъэр нахьыбэмэ аумысыщтыгъэ, зэуапIэм щыхъурэ-щышIэрэм ашIогъэшIэгъонэу къылъыплъэщтыгъэх. Ащ къыхэкIэу я 19-рэ лIэшIэгъум Европэм, анахьэу Германием, адыгэхэм яшъхьафит зэуакIэ, ящыIэкIэ-псэукIэ ехьылIагъэу тхылъ бэдэдэ къыдагъэкIыщтыгъэ.
Урыс литературэм макIэп къызэрэхафэщтыгъэр бзылъфыгъэ тхакIохэм атхыхэрэм псевдонимэу хъулъфыгъэ лъэкъуацIэ акIэтхагъэу. Бзылъфыгъэхэм ежь зэратхыгъэр къагъэлъэгъонэу фэягъэхэп. Зытхыгъэр зэрэбзылъфыгъэр къызашIэкIэ, критикхэм нахь зышIуагъанэщтыгъэ. Сыд фэдизэу къарамыгъэшIэнэу фэягъэхэми, нахь критик лъэшхэу, хэшIыкI ин литературэм фызиIэхэм къашIэщтыгъ, шъхьас амышIэу тхыгъэм щыкIагъэу иIэхэм акIагъэтхъыщтыгъэ. Мы романым нахь «нэшIукIэ» еплъынхэу инасып къыхьыгъ. Критикхэу В. Белинскэмрэ О. Сенковскэмрэ «мэхьанэшхо зиIэ роман…», «гъэшIэгъонэу тхыгъэ…» аIозэ хагъэунэфыкIыгъагъ.
Лачиновар унэгъо фэшIыгъэ бай къихъухьэгъагъ, зыфаер къыдэхъоу, гъэшIуагъэу апIугъ, гъэсэныгъэ дэгъу иIагъ. Урысыем зэфэнчъагъэу илъыр, цIыф къызэрыкIом ищыIакIэ зэрэхьылъэр, крепостной правэр зэрэцIыфыгъэнчъагъэр дэгъоу къыгурыIощтыгъэ. Ащ ыпкъ къикIэу 1825-рэ илъэсым Сенатскэ площадым урыс оркъ (дворян) ныбжьыкIэхэу декабристкIэ зэджагъэхэм восстаниеу къыщаIэтыгъагъэр игъоу ылъэгъущтыгъ, адыригъаштэщтыгъ. Восстаниер зызахэкъутэ уж япащэхэр палъагъэх, аукIыгъэх, къэнагъэхэм янахьыбэр Сыбыр ращыгъэх…
Илъэс зытIущ тешIагъэу пачъыхьэм декабристхэм ащыщхэм Сыбыр ссылкэр Кавказэу зэо мэхъаджэ зыщыкIорэмкIэ афызэблехъу.
Декабристхэу Сыбыр къикIыжьыгъэхэр Е. Лачиновам инэIосагъэх, ащыщхэри иныбджэгъугъэх. Ахэр ссылкэм ащэхэ зэхъум хьазаб мыухыжьэу зыхэтыгъэхэр Лачиновам къыфаIуатэщтыгъэх, ягупшысэ-гукIаехэр къыдагощыщтыгъэх. Анахь къин зыщалъэгъущтыгъэр Байкал кIыб щыIэ къушъхьэтхэу, Хамар-Дабанов зыцIэм зэпырыкIыхэ зыхъукIэ арыгъэ.
Гъогу хьылъэ кIыхьэр афэмыукIочIэу иаджал щызыгъотыгъэри мэкIагъэп. Къушъхьэтхыр къызызэранэкIышъукIэ, Сыбыр чIыпIэу къащыфагъэнэфагъэм нэсынхэу гугъэ яIэ хъущтыгъэ.
Декабристхэм яIоф зэрэдыригъаштэрэр, гукIэгъоу афыриIэр авторым шъхьэихыгъэу къыIон фимытыгъэми, псевдонимэу ыштагъэмкIэ къыгъэлъэгъуагъ.
1836 — 1840-рэ илъэсхэм Екатерина Лачиновам иунагъо Ставрополь ыкIи Тифлис адэсыгъ. Ишъхьэгъусэу Николай Лачиновыр генералыгъ, урысыдзэм ибригадэ ипэщагъ, ипщыкъоу, декабристэу Евдоким Лачиновым штабым Iоф щишIэщтыгъэ. Урысыдзэм иIэшъхьэтетмэ, заом Iут офицермэ ахахьэщтыгъ, ахэкIыщтыгъ, ащ ыпкъ къикIэу зэуапIэм щы- хъурэ-щышIэрэм дэгъоу щыгъозагъ.
Кавказым цIыфхэу исхэр къаухъумэхэу, гъэсэныгъэрэ культурэрэ къафахьэу аIозэ зызэраухыижьырэр зэрэпцIыр, зэрэшъорышIыгъэр авторым еумысы.
Ар дэгъоу къегъэлъагъо Урысыем гъэсэныгъэмкIэ иминистрэу С. Уваровым иIофышIэгъухэм зэрафигъэпытэщтыгъэм: «…не скупитесь на темные краски при описании отсталости «инородцев»…»
Урысыдзэм хэбзэнчъагъэу, жъалымыгъэу Кавказым щызэрихьэщтыгъэр, офицермэ яIэдэбынчъагъэ, генералмэ дзэ зещэным хэшIыкI тэрэз зэрэфырямыIэр авторым шъхьэихыгъэу къеIо.
Бэрэ къыхэкIыщтыгъэ чылэу зао зэрашIылIэгъагъэр рэхьатыжьыгъэу, ятIонэрэу тебанэхэу ахъункIэу, дэсхэр аукIыхэу, джыри зы «текIоныгъэшхо» къыдахыгъэу аIозэ, рапорт нэпцIыхэр Петербург агъэхьыхэу, агу рихьырэр зыIэкIалъхьэу, Iэшэ-шъуашэхэр шIухьафтынэу Iэшъхьэтетмэ афашIыхэу.
Адыгэхэу зишъхьафит фэбанэхэрэм ыгу зэряIурэр, лъытэныгъэ зэрафишIырэр тхылъым игерой шъхьаIэу Александр Пустогородовым игущыIэхэмкIэ авторым къегъэлъагъо: «Воля ваша, я люблю их дикую честность! Возьмите черкеса, разберите его как человека — что за семьянин! Как набожен! Он не знает отступничества, несмотря на тяжелые обряды своей веры. Как он трезв, целомудрен, скромен в своих потребностях и желаниях, как верен в дружбе, как почтителен к духовенству, к старикам, к своим родителям! О храбрости нечего и говорить — она слишком известна… Когда же дело общественное призовет его к ополчению, с какою готовностью покидает он все, забывает вражду, личности, даже месть и кровомщение! Черкесов укоряют в невежестве, но взгляните на их садоводство, ремесла, особенно в тех местах, где наша образованность не накладывала просвещенной руки своей, и вы согласитесь со мною…»
Илъэхъэнэгъухэм (современникхэм) къызэраIожьырэмкIэ, Апэрэ Николай лъэшэу мы тхылъым ыгъэщтэгъагъ, къыдэкIыгъахэхэр псынкIэу аугъоижьынхэу, къыдагъэкIынэу Iизын язытыгъэхэм яфэшъуашэ ягъэгъотыгъэнэу полицием иначальникэу Дубельт унашъо фишIыгъагъ.
Тхылъыр пчъагъэкIэ 1200-рэ хъоу къыдагъэкIыгъагъ. Ащ щыщэу 900-м ехъу жандармэмэ къаугъоижьыгъ. Пщыми, иIумэтхэми агу къеуагъ, ау экземпляр 300 фэдиз цIыфхэм аIэкIэхьагъ. «Проделки на Кавказе» тхылъ гъотыгъуаехэм ахэхьагъ.
Московскэ университетым ипрофессорэу, цензорэу Н. И. Крыловыр, тхылъым икъыдэгъэкIынкIэ Iизын язытыгъэр иIофшIэн IуагъэкIыгъагъ. Ащ игукъэкIыжьхэм къащитхыщтыгъэ жандармерием иIэшъхьэтет къеджи, ыдэжь зычIахьэм лъэшэу зэрэщынэгъагъэр: «…стою, ни жив, ни мертв, и думаю себе, что тут делать… Орлов … приглашает и указывает на стоящее возле него кресло. Вот я, потихоньку и осторожно сажусь себе на самый краешек кресла. Вся душа ушла в пятки…»
Сыда мыщ фэдизэу мы тхылъым щынагъоу Урысыем иимператоррэ ащ къешIэкIыгъэхэмрэ халъэгъуагъэр?
Мы упчIэм иджэуап Урысыем ивоеннэ министрэщтыгъэу Чернышовым ыIогъагъэр: «Книга эта тем вреднее, что в ней что строка, то правда».
Апэрэ Николай а министрэ дэдэм риIогъагъэу alo: «Мы ничего не знаем о Кавказе, а эта дама открывает нам гла-за!»
Военнэ Iэшъхьэтетхэм общественностым рагъэшIэнэу зыфэмыягъэхэр зэкIэ Лачиновам «къычIиупхъукIыгъэх».
А лъэхъаным атхыгъэ тхылъхэм ахэтыгъэп мыщ фэдэу кавказ заом щыхъурэ шъыпкъэр къизыIотыкIырэр.
Илъэсишъэрэ тIокIитIурэм ехъу тешIагъэу ятIонэрэ тедзэгъур 1985-рэ илъэсым къалэу Ставрополь къыщыдэкIыгъ. ТхакIоу Сергей Бойко тхылъым игущыIапэ къыщитхыщтыгъ: «Это было счастьем русского народа того времени, что в его среде находились смелые люди, которые, подобно автору этой книги, раскрывали читателям глаза на истинную суть событий…»
ТишIэныгъэлэжьхэу Лейпцигрэ Ставропольрэ къащыдэкIыгъэ тедзэгъуитIур зэзыгъэпшагъэхэм нэмыцмэ къыдагъэкIыгъэр нахь икъоу алъытэ.
Нэмыцмэ къыдагъэкIыгъэр этникэм ылъэныкъокIэ нахь игъэкIотыгъэу щыт. «Фактический материал» зыфаIорэр: адыгэмэ ятеплъэ, яIокIэ-шIыкIэхэр, ящыгъын-шъошэ зехьакIэ, Iашэу аIыгъыр кIэзыгъэнчъэу къэтыгъ. ТэркIэ анахь мэхьанэ ин зиIэмэ ащыщ адыгэ тарихъым пытэу хэуцуагъэхэу, Кавказ заом илIыхъужъхэу Хъырцыжъ Алэмрэ ШэрэлIыкъопщымрэ «зытетыгъэхэ шъыпкъэм тетхэу» къызэригъэлъагъохэрэр. Тхылъым сурэт гъэшIэгъон дэт ШэрэлIыкъопщым ипIуррэ идзэкIолIхэмрэ кIыгъухэу. Лейпциг къыщыдэкIыгъэм илексикэ материал нахь бай, адыгэ гущыIэхэу джырэкIэ тымыгъэфедэжьхэу, архаизмэкIэ заджэхэрэр къыхэфэх.
Мы тхылъыр историкхэм, этнографхэм, лингвистхэм, адыгэ лъэпкъым къырыкIуагъэр зэзыгъашIэ зышIоигъохэм ашIогъэшIэгъонынэу тэлъытэ. ШIэныгъэлэжьхэм Iоф дашIэмэ, джыри гъэшIэгъоныбэ къызэрэхагъэщыщтым щэч хэлъэп. Тииздательмэ тащэгугъы гъотыгъуае хъугъэ тхылъым анаIэ тырадзэнэу, джыри зэ къыдагъэкIыжьынэу. Тиотдел иIофышIэхэм тхылъхэр оцифровкэ ашIыгъэх, фаем оригиналми, электроннэ версие шIыкIэмкIи Iоф адишIэн ылъэкIыщт.
Мы тхыгъэмкIэ мурадэу тиIагъэр тхылъ гъэшIэгъоным шъунаIэ тешъодгъэдзэныр, нэIуасэ шъуфэтшIыныр ары.
Хъурмэ Рахьмэт.
Адыгэ къэралыгъо университетым ишIэныгъэ тхылъеджапIэ икъутамэу тхылъ гъотыгъуаехэмрэ Iэпэрытххэмрэ зычIэлъым ипащ.