Хэбзэукъоныгъэхэр пэшIорыгъэшъэу щыгъэзыегъэнхэмкIэ республикэ межведомственнэ комиссием зичэзыу зэхэсыгъо иIагъ. АР-м и ЛIышъхьэу КъумпIыл Мурат иунашъокIэ ар зэрищагъ АР-м хэгъэгу кIоцI IофхэмкIэ иминистрэу Владимир Алай. 
Iофтхьабзэм хэлэжьагъэх гъэцэкIэкIо къулыкъухэм ыкIи муниципальнэ образованиехэм япащэхэр, Адыгеим ихэбзэухъумэкIо къулыкъухэм ялIыкIохэр. Телефон гъэпцIакIохэм апэшIуекIогъэнхэм, гъэсэныгъэм иучреждениехэм рэхьатныгъэр ащыухъумэгъэным зэхахьэм щатегущыIагъэх.
Сотовэ зэпхыныгъэр ыкIи интернет амалхэр къызыфагъэфедэхэзэ гъэпцIакIохэм зэрахьэхэрэ бзэджэшIагъэхэр къызэрэчIагъэщыхэрэм ыкIи ахэм зэрапэшIуекIохэрэм игъэкIотыгъэу къатегущыIагъ ведомствэм уголовнэ лъыхъунымкIэ игъэIорышIапIэ ипащэу Эдуард Кобзарь. Ащ къызэриIуагъэмкIэ, гъэпцIагъэ зыхэлъ шIыкIэу бзэджашIэхэм къызыфагъэфедэхэрэр зэтефыгъэх. Ахэр зэкIэ зэзыпхыхэрэр цIыфхэм егъэлыегъащэу бзэджашIэхэм цыхьэ зэрафашIырэр ары.
2015-рэ илъэсым къыщегъэжьагъэу мы лъэныкъомкIэ бзэджэшIагъэу зэрахьагъэхэм япчъагъэ хэпшIыкIэу хэхъуагъ. 2019-рэ илъэсым гъэпцIакIохэм бзэджэшIэгъэ 328-рэ щызэрахьагъэу Адыгеим щагъэунэфыгъ. ЗэкIэмкIи республикэм щыпсэухэрэ цIыфхэм сомэ миллион 11 чIэнагъэ ашIыгъ. Мы илъэсыр къызихьагъэм къыщыублагъэу мыщ фэдэ хъугъэ-шIэгъэ 70-м ехъу министерствэм къыхигъэщыгъ.
— Ведомствэм ипащэ иунашъокIэ полицием иоперативникхэм ыкIи иуполномоченнэ участковэхэм ямызакъоу, республикэмкIэ хэгъэгу кIоцI къулыкъум иIофышIэхэр къыхэдгъэлажьэхэзэ пэшIорыгъэшъ Iофтхьабзэхэр цIыфхэм адызетэхьэх. БлэкIыгъэ илъэсым мыщ фэдэ Iофтхьэбзэ мин 30 фэдиз цIыфхэм афызэхэтщагъ. IофшIэным шIуагъэ къытэу зэхэщэгъэнымкIэ зишIуагъэ къакIохэрэм ащыщ министерствэм ипресс-къулыкъу. ГъэпцIакIохэм зябгъэгъэделэ зэрэмыхъущтым епхыгъэ пэшIорыгъэшъ Iофтхьабзэхэр ахэм ренэу зэхащэх, — къыIуагъ полковникым.
Министрэу Владимир Алай къызэриIуагъэмкIэ, IофшIэнэу агъэцакIэрэм шIуагъэ къытыным фэшI полициер изакъоу бзэджашIэхэм апэшIуекIон ылъэкIыщтэп. Мы IофшIэным нэмыкI хэбзэухъумэкIо къулыкъухэр, муниципалитетхэр ыкIи общественностыр чанэу къыхэлэжьэнхэ фае.
— Сотовэ зэпхыныгъэр ыкIи интернет амалхэр къызыфагъэфедэхэзэ гъэпцIакIохэм зэрахьэхэрэ бзэджэшIагъэхэм якъычIэгъэщын къинэу щыт. Арышъ, мэхьанэ ин зиIэр бзэджэшIагъэ къэмыгъэхъугъэныр, цIыфхэр ащ щыухъумэгъэнхэр ары. Ащ пае ахэр икъоу къэбарым щыбгъэгъозэнхэу, гъэпцIакIохэм зарагъэгъэделэ зэрэмыхъущтыр агурыбгъэIонэу щыт, — къыIуагъ министрэм.
Анахьэу финанс ыкIи чIыфэтыным ифэIо-фашIэхэр цIыфхэмкIэ Iэрыфэгъу зэрэхъугъэр бзэджашIэхэм къызыфагъэфедэ. Арышъ, мы лъэныкъомкIи Iофхэр гъэлъэшыгъэнхэ фаеу зэхэсыгъом къыщаIуагъ. Банкхэм, финанс ыкIи чIыфэ зытыхэрэ организациехэм, сотовэ зэпхыныгъэхэм яоператорхэм хэбзэухъумэкIо къулыкъухэм зэпхыныгъэ адыряIэу яIофшIэн зэхащэмэ ишIуагъэ къызэрэкIощтыр къыхагъэщыгъ.
Джащ фэдэу гъэсэныгъэм иучреждениехэм рэхьатныгъэр къащыухъумэгъэнымкIэ, кIэлэеджакIохэм алъэныкъокIэ зекIокIэ дэйхэр зэрамыхьанхэмкIэ пэшIорыгъэшъ Iофтхьабзэхэм, Адыгеим ирайонхэм ащызэхащэгъэхэ народнэ дружинэхэм яIофшIэн зэрагъэпсырэм зэхэсыгъом щытегущыIагъэх.
ЦIыфхэр бэу зыхэлэжьэхэрэ Iофтхьабзэхэм язэхэщэнкIэ народнэ дружинэм хэтхэр полицием IэпыIэгъушIу къызэрэфэхъухэрэр министрэм шIукIэ афилъэгъугъ. Анахьэу мы лъэныкъомкIэ Мыекъопэ ыкIи Джэджэ районхэм ащызэхэщэгъэ дружинэхэм опытэу аIэкIэлъымкIэ адрэ районхэм къадэгощагъэх.
КIАРЭ Фатим.