ПсыIыгъыпIэр агъэкIэжьы

Адыгеим псыIыгъыпIэ анахь инэу итыр Шапсыгъэ псыIыгъыпIэр ары. Ар советскэ лъэхъаным дэгъоу агъэфедэщтыгъ, пынджыр къызщагъэкIырэ чIыпIэхэм зыщищыкIагъэм псыр акIагъахъощтыгъ, лэжьыгъэр агъэбагъощтыгъ.

ПсыIыгъыпIэм ишIуагъэ къа­кIоу илъэс 50-рэ агъэфедагъ, етIанэ псыр рагъэчъыжьи, зэ­рытыгъэ чIыпIэр зэхэкIыхьажьыгъагъ. 2007-рэ илъэсым къыщегъэжьагъэу псыубытыпIэр икIэ­рыкIэ шъыпкъэу агъэпсыжьынэу фежьагъэх, къэралыгъо программэ зэфэшъхьафхэм яшIуагъэкIэ мылъку IэпыIэгъур къафатIупщы.

Пэублэ Iофыгъохэр 2018-рэ илъэсым аухыгъагъэх, джыри ахэр лъагъэкIотэщтых. «Адыгея­мелиоводхоз» зыфиIорэ Гъэ­IорышIапIэм ипащэу Хьэпэе Азэмат ТАСС-м макъэ зэрэ­ригъэIугъэмкIэ, Шапсыгъэ псы­IыгъыпIэм игъэкIэжьын 2026-рэ илъэсым нэс къаухыщт.

IофшIэнхэр зырагъэжьагъэ­хэм къыщыублагъэу пIалъэу агъэ­нэфэгъагъэр 2015-рэ илъэ­сым, нэужым 2017-рэм нэсэу лъа­гъэ­кIотэгъагъ. ПсыIыгъыпIэм инэпкъхэм янахьыбэр агъэпытэгъах, къэнэжьыгъэр метрэ 400 фэдиз мэхъу. Гидротехническэ сооружениехэр икIэрыкIэу агъэ­уцужьыгъэх. IофшIэнхэм сомэ миллиардитIу фэдиз апэIуагъэ­хьагъ, хабзэр IэпыIэгъу къа­фэхъугъ.

А. Хьэпаем къызэриIорэмкIэ, тапэкIэ агъэцэкIэщт IофыгъохэмкIэ зэзэгъыныгъэхэр зэдашIыгъэх, тызхэт илъэсым ыкIэ нэс проектыр агъэхьазырыщт, къэралыгъо экспертизэ ашIыщт.

ПсыIыгъыпIэр загъэкIэжьыкIэ псыр къырагъэлъэдэжьыщт. Ащ ишIуагъэкIэ чIыгу гектар мини 2,5-м пынджыр къащагъэкIэу рагъэжьэжьыщт, пцэжъыехъуным ылъэныкъокIи федэ къытыщт. Джащ фэдэу туризмэм изэхэщэнкIи ишIуагъэ къэкIощт.

ПсыIыгъыпIэр зэрэзэтырагъэ­псыхьажьыщтым пэIуагъэхьащт ахъщэр къэралыгъо программэу «Развитие сельского хозяйства и регулирования рынков сельскохозяйственной продукции, сырья и продовольствия» зыфиIорэм къызэрэдилъытэу хабзэм къаIэкIигъэхьащт.
(Тикорр.).