Адыгеим экономикэ хэхъоныгъэмрэ сатыумрэкIэ иминистрэ агъэнэфагъ

Адыгеим экономикэ хэхъоныгъэмрэ сатыумрэкIэ иминистрэ иапэрэ гуадзэу щытыгъэ Геннадий Митрофановыр а ведомствэ шъыпкъэм иминистрэу агъэнэфагъ. Ащ фэгъэхьыгъэ Указым республикэм и ЛIышъхьэу КъумпIыл Мурат кIэтхэжьыгъ.

Геннадий Митрофановыр 1979-рэ илъэсым къэхъугъ. Къалэу Мыекъуапэ иадминистрацие экономикэ хэхъоны­гъэмкIэ икомитет промышленностымкIэ ыкIи предпринимательствэмкIэ иотдел иведущэ специалистэу 2001-рэ илъэсым лэжьэныр ригъэжьагъ. 2003-рэ илъэсым къыщегъэжьагъэу 2010-рэ илъэсым нэс администрацием иведомствэхэм IэнэтIэ зэфэшъхьафхэр ащызэрихьагъэх. 2010-рэ илъэсым къыщегъэжьагъэу 2018-рэ илъэсым нэс Адыгеим IофшIэнымрэ социальнэ хэхъоныгъэмрэкIэ и Министерствэрэ финансхэмкIэ и Министерствэрэ яэкономическэ отделхэм пэщэныгъэ адызэрихьагъ. Рес­публикэм и ЛIышъхьэ и УказкIэ 2018-рэ илъэсым итыгъэгъазэ Адыгеим экономикэ хэхъоныгъэмрэ сатыумрэкIэ иминистрэ иапэрэ гуадзэу ар агъэнэфагъ.