Адыгеим икъоешIхэм къакъоуцуагъ

Адыгэ къуаер къыдигъэкIынэу Адыгеим ихъызмэтшIапIэхэм анэмыкI зыпарэми фитыныгъэ имыIэнэу УФ-м мэкъу-мэщымкIэ и Министерствэ зырихъухьагъэр илъэсыбэ хъугъэ. Арэу щыт­ми, нэмыкI субъектхэм япредприятиеу ащ дезымыгъа­штэ­рэр, адыгэ къуаер къыдигъэкIыным фэбанэрэр бэ. Ахэм ащыщ Брянскэ хэкум ит хъызмэтшIапIэу ЗАО-у «Умалат» зы­фи­Iорэр. Товарым ар къызща­шIыгъэ чIыпIэм ыцIэ етыгъэным фэгъэхьыгъэ тхы­лъэу УФ-м мэкъу-мэ­щымкIэ и Министерствэ Адыгеим икъоешIхэм къаритыгъэхэр законым димыштэхэу ылъытэнхэу Москва и Арбитражнэ хьыкум ащ зыфигъэзэ­гъагъ. А тхылъхэм тихъызмэтшIапIэхэм анэмыкI адыгэ къуаер зыпарэми къыдигъэкIын зэрэфимытыр къаушыхьаты.

Хьыкумыр «Умалатым» илъэIу тхылъ джырэблагъэ хэплъагъ, ау дыригъэштагъэп. Министерствэм къы­тыгъэхэ тхылъхэр законым диштэхэу ылъытагъ.

Шъугу къэдгъэкIыжьын адыгэ къуаем непэ уасэу фашIырэр гъэпытэгъэным ыкIи ар къэзышIыхэрэм IэпыIэгъу ятыгъэным фэшI мы продукциер къыдэзыгъэкIыхэрэм я Союз 2017-рэ илъэсым зэрэзэхащагъэр. Ащ хэхьагъэх щэм хэшIыкIыгъэ гъомылапхъэ къыдэзыгъэкIырэ заводэу Джэ­джэ ыкIи Красногвардейскэ районхэм арытхэр, ЗАО-у «Молкомбинат «Адыгейский», ООО-у «Тамбовский», ООО-у «Мол­завод Новый», ООО-у «Адыгейский молочный завод» зы­фиIо­хэрэр. Союзым ипащэр ООО-у «Там­бов­скэм» иге­неральнэ директорэу Лъэустэнджэл Мурат.