Адыгэ Республикэм иминистрэхэм я Кабинет иунашъоу N 231-р зытетэу «Адыгэ Республикэм икъэралыгъо бюджет учреждениеу «Къэралыгъо кадастрэ уасэм игъэнэфэнкIэ Адыгэ республикэ гупчэр» зыфиIорэр зэхэщэгъэным ехьылIагъ» зыфиIоу 2018-рэ илъэсым чъэпыогъум и 26-м аштагъэм тегъэпсыхьагъэу къэралыгъо бюджет учреждениеу «Къэралыгъо кадастрэ уасэм игъэнэфэнкIэ Адыгэ республикэ гупчэр» зэхащагъ. Адыгэ Республикэм амыгъэкощырэ мылъкоу итым икадастрэ уасэ игъэнэфэнкIэ фитыныгъэ гъэнэфагъэхэр мы Гупчэм иIэх. Кадастрэ уасэр зэрящыкIагъэм, ащ шIуагъэу пылъым ыкIи уахътэу тешIагъэм зэшIуахын алъэкIыгъэхэм афэгъэхьыгъэу гущыIэгъу тыфэхъугъ кадастрэ уасэхэм ягъэнэфэнкIэ Гупчэм ипащэ ипшъэрылъхэр зыгъэцэкIэрэ Джэндар Мурат Мэдинэ ыкъом.
— Мурат, уахътэу тешIагъэм сыда къыжъудэхъугъэр?
— Илъэсым ехъугъ ныIэп Гупчэр зызэхащагъэр. 2020-рэ илъэсым мэкъумэщ мэхьанэ зиIэ, промышленностым къыхиубытэрэ чIыгухэм, анахьэу къагъэгъунэрэ чIыпIэхэм ыкIи псэуалъэхэм якадастрэ уасэ агъэнэфэщт. ХэбзэгъэуцугъакIэу щыIэм диштэу къэралыгъо кадастрэ уасэм игъэнэфэнкIэ къэбарэу къызIэкIэдгъэхьагъэр бэ мэхъу. Гупчэм Iофышхо егъэцакIэ амыгъэкощырэ мылъкум изытет зыфэдэм игъэунэфынкIэ. АщкIэ гъусэныгъэ адыриI чIыпIэ зыгъэIорышIэжьыным икъулыкъухэм ыкIи къэралыгъо хабзэм икъулыкъухэм. Амыгъэкощырэ мылъкум имониторинги зэпыурэп.
КъэсIуагъэм къыхэгъэхъожьыгъэн фае цIыф псэупIэхэм ячIыгухэмрэ капитальнэ псэолъэшIыным къыхиубытэхэрэмрэ игъэкIотыгъэу 2020-рэ илъэсым мы Iофтхьабзэм къызэрэхедгъэубытэщтхэр.
— Амыгъэкощырэ мылъкур зиунаемрэ бэджэндэу ар зыштэрэмрэ сыда ашIэн фаер кадастрэ уасэм фэгъэхьыгъэу?
— Амыгъэкощырэ мылъкум икадастрэ уасэ къикIырэр цIыфхэр жъугъэу хэлажьэхэзэ къэралыгъо кадастрэ уасэр гъэнэфэгъэныр ары. Мыщ лъэныкъуабэ къыхеубытэ: амыгъэкощырэ мылъкур чIыпIэу зыдэщыIэр, район гупчэм зэрэпэIудзыгъэр, коммуникациер щыIэ-щымыIэр, джащ фэдэу нэмыкI лъэныкъохэри. Ахэр зэкIэ къыхеубытэх кадастрэ уасэм игъэнэфэн. Мылъкум тыралъхьэрэ хэбзэIахьми, бэджэндыпкIэр зыфэдизми мэхьанэ яIэу щыт кадастрэ уасэр агъэнафэ зыхъукIэ.
— Амыгъэкощырэ мылъкур зиунаехэр къэралыгъо кадастрэ уасэм игъэнэфэн хэлэжьэн фитхэба?
— Фитых адэ, зиунаехэм анахь дэгъоу ахэм язытет хэта зыгъэунэфын зылъэкIыщтыр!
Ащ епхыгъэу къэралыгъо кадастрэ уасэм игъэнэфэнкIэ хэбзэгъэуцугъэу щыIэм къыщыдэлъытагъ амыгъэкощырэ мылъкур зиунаехэм къафэгъэзагъэ хъугъэ псэуалъэхэм яфэшъошэ уасэ аратыным ифитыныгъэ яIэнэу. Ащ пае псэуалъэр зиунаем е ащ иофициальнэ лIыкIо псэуалъэм фэгъэхьыгъэ декларациер аритын фае. ПэшIорыгъэшъэу амыгъэкощырэ мылъкум уасэу фашIыгъэм ар емызэгъ хъумэ, отчетымкIэ зыдыримыгъэштэрэ лъэныкъом къыпкъырыкIызэ, мэфэ 50-м къыкIоцI тхылъ афигъэхьынэу фитыныгъэ иI.
Декларацием зэрэхэплъэщтхэ шIыкIэр Урысые Федерацием экономикэ хэхъоныгъэмкIэ и Министерствэ иунашъоу N 318-р зытетэу 2019-рэ илъэсым мэкъуогъум и 4-м къыдэкIыгъэмкIэ ухэсыгъэ хъугъэ.
Адыгэ Республикэм икъэралыгъо бюджет учреждениеу «Къэралыгъо кадастрэ уасэм игъэнэфэнкIэ Адыгэ республикэ гупчэм» исайтэу https://gko-adyg.ru. декларацием итын фаехэм нэIуасэ защыфэшъушIын шъулъэкIыщт.
— Декларациер сыдэущтэу аIэкIэбгъэхьан плъэкIыщта?
— Декларациер мыщ фэдэу аIэкIэбгъэхьан плъэкIыщт:
1. Къэралыгъо кадастрэ уасэмкIэ Адыгэ республикэ гупчэм пшъхьэкIэ зыфэбгъэзэщт. Ар зыдэщыIэр: 385000, Адыгэ Республик, къ. Мыекъуапэ, ур. Пролетарскэр, 304-р;
2. ПочтэмкIэ бгъэхьын хъумэ, а адрес дэдэр къэнэжьы;
3. Электрон шIыкIэм тетэу: adyg.gko@mail.ru.
Амыгъэкощырэ мылъкум фэгъэхьыгъэ къэбарэу декларацием итыр зэкIэ джырэкIэ кIуачIэ зиIэ хэбзэгъэуцугъэм къыпкъырыкIырэ пшъэрылъхэм адиштэн фае. Ахэм ахэхьэх ЕГРН-м къыхэтхыкIыгъэхэр, справкэхэр, письмэхэр, зэфэхьысыжьхэр, къэралыгъо хабзэмрэ чIыпIэ зыгъэIорышIэжьынымрэ якъулыкъухэм, экспертхэм, организациехэм къагъэхьазырыгъэ тхылъхэр ыкIи нэмыкIхэр. Амыгъэкощырэ мылъкум хэхьэрэ пкъыгъом уасэ фашIын зыхъукIэ а пстэури къыдалъытэ.
Гупчэр мэфэ 50-м къыкIоцI декларацием хэплъэн фае. Ащ зыхэплъэрэ нэужым IофшIэгъу мэфи 5-м шIомыкIэу джэуапыр аIэкIигъэхьажьынэу щыт.
Мыщ дэжьым хэгъэунэфыкIыгъэн фае кадастрэ уасэм игъэнэфэн лъэныкъуабэ хэлажьэзэ, шъхьэихыгъэу зэрэкIорэр. Мылъкур зиунаехэр ары анахьэу етIани игъэкIотыгъэу ащ хэлажьэхэрэр. Ащ мэхьэнэ гъэнэфагъэ иI. Амыгъэкощырэ мылъкум къыхиубытэрэр зиунаеу щытым чаныгъэ къызхигъэфэн фае кадастрэ уасэм игъэнэфэн кIэух тэрэз фэхъунымкIэ.
ДэгущыIагъэр
Тхьаркъохъо Сафыет.